نبشتانک ـ ڈاکٹر شکیل بلوچ
ھمگام بلوچ
لْیکہ ھما راہ ءُ راھبنداناں گْوش اَنت کہ چہ آئی ءِ وسیلہ ءَ تو راستی ءَ چار ئے ءُ گِند ئے، آئی ءَ تاں سَر بوگ ءِ واست ءَ کِشک ءُ راھاں گِیشین ئے۔ چُشکہ راجکاری ءِ تہ ءَ جُتا جُتائیں لْیکہ بہ اَنت۔
رَاجدوستی ھما لْیکہ اِنت کہ تو آئی ءِ تہ ءَ وتی راج ءِ نَپانی ھاتر جُھد کن ئے، اِے لْیکہ ترا گْوں وتی راج ءَ بَندوک کنت، ترا گْوں راج ءِ گَم، سکّی، وشیاں ھمگنچ کنت۔ تو دُگنیا ءِ آ دگہ درستیں چِیزاں چہ بالا ءُ بُرز وتی راج لْیک ئے، وت ءَ وتی راج ءِ یک پُسّگے ءِ گْوشگ ءَ پَھر ءُ شان کن ئے کہ من بلوچے آں۔
راجی ورنا وانندھیں گَل کہ آئی ءِ لْیکہ راجدوستی اِنت گُڑا آ ورنایاں وتی راج ءَ گْوں مِھر ءُ نزّیکی ءِ سِکْین ءَ دَنت۔
راجدوستیں گل وتی لْیکہ ءِ سر ءَ گْوں زوراکیں تاگتانی دیم ءَ کدی سرجھل نہ کن اَنت، وتی لْیکہ ءِ سر ءَ کدی ھم سودہ نہ کن اَنت۔ کجام گل چہ وتی لْیکہ ءِ راہ ءَ در اَھت گُڑا آئی ءِ ھَستی ءَ چہ نہ بوگ ءُ گاری جْوانتر اِنت۔
بی ایس ایپ بلوچ نودربرانی ھما گل اِنت کہ آ بلوچ راجی کارانی ءُ نپانی تہ ءَ ھِچ زوراکیں تاگتانی دیم ءَ سَرجھلی ءَ نہ کنت ءُ نہ کہ وتی راجی ورنایانی جزباتاں گْوں گوازی کنت۔ چُشکہ بازیں نیمگ ءَ بوتگ ءُ انگت بوگ ءَ اِنت۔
لبزانک (لٹریچر)
لبزانک گل (تنظیم) ءِ باسکانی مگزی ردومی، باسماھی، زانشت ءُ سرپدی ءِ وسیلہ اِنت۔ لبزانک گل ءِ باسکانی کِشک ءَ گیشین اِیت ءُ آیاناں لْیکہ ءِ سر ءَ گامزن بوگ ءُ روگ ءِ ساھتاں آیوکیں اڑاندھانی گیش ءُ گیواری ءَ، جاوراں گْوں ھمدپیں توجیل زورگ ءُ دیم ءَ جُنزگ ءِ سکین ءَ دنت ءُ باسکاناں ھِچ نِزور کنگ ءُ پُرشگ ءَ نئیل اِیت، پرچے کہ کجام راہ ءِ بابت ءَ ترا سسا ءُ سماہ بوت گُڑا تو کدی نِزور نہ بہ ئے بلکیں اڑاندھاں چہ تو دربرگ ءِ جُھد ءَ کن ئے۔ لبزانک اِے کُلیں اڑاندھانی راھاں گِیشین اِیت ءُ تئی راھاں پچ کنان کنت۔
پہ نام اگاں ھَزار تاکبند بْیار ئے اگاں آ تئی راجی جْیڑھاں، ورنایانی راجکاری، ھستیں اَھد ءِ جاوراں گْوں ھمدپ نہ بوت گُڑا آ تاکبند (میگزین) کدی ورنایانی مگزی ردومی ءَ نہ کنت ءُ آئی ءَ را نودربر راجکاری ءِ تہ ءَ ھِچ ارزشت نہ بیت۔
چُشکہ مِھرگڑھ تاکبند (میگزین) گْوں ھستیں اَھد راجکاریں جاور، جْیڑہ، راجکاری ءِ لْوٹانی ھساب ءَ نبشتانک ھوار کنگ بوتگ اَنت، کہ جُتا جُتائیں سرھالانی سر ءَ نبشتہ کنگ بُوتگ اَنت۔ انچش کہ پْیسر ءَ بی ایس ایپ “زانش” سیریز شِنگ کرتگ اَت، کہ آ بلوچ راجکاریں گلانی تہ ءَ اولی گامگیج بوتگ کہ بی ایس ایپ ءِ لبزانکی پتر (لٹریری کمیٹی) ءَ زرتگ۔ زانش ءِ تہ ءَ راجکاری گالبند ھوار بوتگ اَنت کہ آیانی وانگ چہ یک راجکاریں باسکے راجکاری ءِ بُنکی پیچ ءُ تاباں سرپد بیت ءُ گپ ءُ باوستانی تہ ءَ راجکاری ءِ زبان ءَ سرپد بیت۔
مِھرگڑھ تاکبند اُمیت اِنت کہ بلوچ ورنایانی واست ءَ یک انچیں ٹیکی یے کہ چہ آئی ءِ وانگ ءُ دربرگ ءَ بازیں سماھی ءُ سرپدی رس اِیت۔
بی ایس ایپ ءِ زانشت ءُ سرپدی ءِ دِرچ یکشل ءَ برجاہ بیت۔ مِھرگڑھ تاکبند ءَ چہ پد دومی “زانش” ءِ چن ءُ لانچ بِندات بیت۔ ھمے پیم ءَ نودربراناں راجی باسماھی ءِ واست ءَ اِے جُھد برجم دارگ بیت۔
کُجام لبزانک (لٹریچر) کہ آ تئی راجی سِنچ ءُ مارِشت ءَ ودی مہ کنت گُڑا آ وڑیں لبزانک ھِچ ارزِشت نہ دار اِیت۔ اگاں چِنچو تاکبند کہ شِنگ کنگ بیت گُڑا آئی ءِ تہ ءَ نبشتانک ءُ ھستیں دور ءِ لْوٹاں ھمدپ بہ بنت گُڑا ورنا چہ آئی ءِ وانگ ءَ سرپدی دربرت کرت کن اَنت۔
بی ایس ایپ ءِ سنگتانی جُھد دائم ءَ برجاہ بات۔
بی ایس ایپ ءِ جُھد پہ بلوچ نودربرانی اِلم، زانشت ءُ یکمشتی ءَ ـ
