پیرس ( ہمگام نیوز ) یورپی یونین کے صدر چارلس مائیکل نےکہا ہے کہ یورپی یونین اور سعودی عرب مشترکہ مقاصد کے حصول کے لیے آگے بڑھیں گے۔
اس کا بات کا اظہار انہوں نے ہندوستان میں منعقدہ جی 20 سربراہی اجلاس میں ہونے والی ملاقاتوں کی روشنی میں، سعودی ولی عہد شہزادہ محمد بن سلمان کے ساتھ ملاقات کے دوران کیا۔
انہوں نے ایکس پلیٹ فارم (سابقہ ٹوئٹر) پر اپنے اکاؤنٹ پر ایک ٹویٹ میں آج اتوار کو کہا کہ نئی دہلی میں کل شروع ہونے والے جی 20 سربراہی اجلاس کے موقع پر ہونے والی ملاقات نے یونین اور سعودی عرب کے درمیان دوطرفہ تعلقات کو فروغ دیا۔
انہوں نے اس بات پر بھی زور دیا کہ دونوں فریق تمام عالمی اور علاقائی چیلنجوں سے نمٹنے کے علاوہ دو طرفہ تعلقات کے تمام پہلوؤں پر کام کرتے رہیں گے۔
اقتصادی راہداری
اس سے قبل ، سعودی ولی عہد نے کل اعلان کیا تھا کہ ہندوستان، مشرق وسطیٰ اور یورپ کے درمیان اقتصادی راہداری منصوبے کے حوالے سے مفاہمت کی یادداشت پر دستخط کیے گئے ہیں۔ انہوں نے مزید کہا کہ یہ منصوبہ بنیادی ڈھانچے کی ترقی اور بحالی، بندرگاہوں کو جوڑنے، سامان اور خدمات کی گزر گاہ میں اضافے اور متعلقہ فریقوں کے درمیان تجارتی تبادلے کو بڑھانے میں معاون ثابت ہوگا۔
انہوں نے یہ بھی واضح کیا کہ یہ راہداری توانائی کی برآمد اور درآمد کے لیے پائپ لائنوں کی توسیع میں بھی کردار ادا کرے گی تاکہ عالمی توانائی کی سپلائی کی حفاظت کو بڑھایا جا سکے۔
انہوں نے کہا کہ یہ ایم او یو صاف توانائی کو فروغ دینے اور تمام فریقوں کے لیے روزگار کے نئے اور معیاری مواقع اور طویل مدتی فوائد پیدا کرنے کی کوششوں کی حمایت کرتا ہے۔
قابل ذکر ہے کہ یہ منصوبہ دو الگ الگ راہداریوں پر مشتمل ہے، مشرقی کوریڈور جو ہندوستان کو خلیج سے ملائے گا، اور شمالی کوریڈور جو خلیج کو یورپ سے ملاتا ہے۔
ان میں ریلوے بھی شامل ہے۔ اپنے قیام کے بعد یہ جہازوں سے لے کر ریلوے تک ایک سرحد پار نیٹ ورک تشکیل دے گا تاکہ موجودہ زمینی اور سمندری نقل و حمل کے راستوں کو سامان اور خدمات کے گزرنے کے قابل بنایا جا سکے۔
