! مـــنـــی وتـــــــن 

منی وَتـــن یک پچیں دیارے

منی وتن دشت و کوھسارے

منی وتـــــن کیچگ و تیابے

منی وتن پٹ و ریگزارے

منی وتـــن ھرچی است منیگنت

منی وتـــــــن بگجتانی کھچر

منی وتن ، شوانگانی بُندر

منی وتــــــــن بزگرانی ھنکیں

منی وتن کوچیانی پَژدر

منی وتـــن ھرچی است منیگنت

منـــی وتن کلگانی تصویر

منی وتن ، مهتگانی زمزیر

منــــی وتن کنگرانی بازار

منی وتن سرگلانی شمشیر

منی وتـــن ھرچی است منیگنت

منی وتـــــن مَهدن ھزانگ

منی وتن زر و سھرءِ چانگ

منی وتن نپتءِ سیاھیں ساوڑ

منی وتن پمن دُرّءِ دانگ

منی وتـــن ھرچی است منیگنت

منی وَتن،گـَندَگنت ،که جوان انت

منی وَتن، پَمّن سَکّ گِران انت

منی وَتن ، مادر انت بلوچ ءِ

منی وَتن، سیاهسرءِ گِدان انت

منی وتـــن ھرچی است منیگنت

منی وَتن زِندگی ءِ سیت انت

منی وَتن،پاکیں مئے مَسیت انت

منی وَتن،مئے مَیار و ننگنت

منی وَتن، مئے رَواج و ریت انت

منی وتـــن ھرچی است منیگنت

منی وَتن ، پاشِنت سیم و دَنگ ءَ

منی وَتن بُرت نه بیت گوں جنگ ءَ

منی وتن، گِیهلانی لوگ انت

منی وتن تو بَرئے چی رنگ ءَ

منی وتـــن ھرچی است منیگنت

منی وتن ! من دَیاں گواهی

منی وتن دیسته سَک تباهی

منی وتن ، هِچ نداته هِزمان

منی وتن شَئے نه انت بهایی

منی وتـــن ھرچی است منیگنت

منی وتن مَکّه انت نصیر ءِ

منی وتن کوٹنت رِند امیر ءِ

منی وتن هَمّلءِ مئیار انت

منی وتن هچ نه بیت گزیر ءِ

منی وتـــن ھرچی است منیگنت

میر گلخان نصیر ـ کراچی ۲۱ جولای ۱۹۶۵

کلیات نصیر تاکدیم : 553 و 554