واشنگٹن (ہمگام نیوز ویب ڈیسک ) امریکی محکمہ خارجہ کی ترجمان ہیتھر نوریٹ نے پاکستانی دفتر خارجہ کے ترجمان ڈاکٹر محمد فیصل کے ہمراہ مائیک پومپیو کے دورہ پاکستان کی تفصیلات بیان کرتے ہوئے کہا کہ امریکی وزیر خارجہ مائیکل آر پومپیو نے اسلام آباد میں وزیراعظم پاکستان عمران خان اور دیگر سول و ملٹری شخصیات سے ملاقاتیں کیں جبکہ ان کے ہمراہ امریکی چیئرمین جوائنٹ چیفس آف اسٹاف جنرل جوزف ایف ڈنفورڈ بھی موجود تھے۔اعلامیے کے مطابق امریکی وزیر خارجہ اور چیئرمین جوائنٹ چیفس آف اسٹاف نے وزیراعظم عمران خان کو اپنی حکومت بنانے پر مبارکباد دی اور سول اداروں کو مزید مضبوط کرنے کے عزم کو خوش آئند قرار دیا۔
امریکی وزیر خارجہ نے پاکستانی حکام سے ملاقات میں پاک امریکہ تعلقات، مشترکہ مفادات کے شعبوں جیسا کہ دو طرفہ تجارت اور تجارتی تعلقات میں وسعت کی اہمیت کو اجاگر کیا۔امریکی محکمہ خارجہ کی جانب سے جاری بیان کے مطابق پاکستانی وزیر خارجہ شاہ محمود قریشی سے ملاقات میں امریکی وزیر خارجہ مائیک پومپیو نے مشترکہ ترجیحات بشمول علاقائی امن و استحکام کے فروغ کے لیے پاکستان اور امریکہ کے مل کر کام کرنے کے امکانات اور اہمیت پر تبادلہ خیال کیا۔ مائیک پومپیو نے پاکستانی حکام کو یہ پیغام بھی پہنچایا کہ پاکستان کو خطے کے امن و استحکام کیلئے خطرہ بننے والے دہشتگردوں اور جنگجوؤں کے خلاف مستقل اور فیصلہ کن اقدامات اٹھانے کی ضرورت ہے۔مریکا کی جانب سے جاری اعلامیے کے مطابق پاکستانی حکام سے اپنی ملاقاتوں میں مائیک پومپیو نے اس بات پر بھی زور دیا کہ افغانستان میں مذاکرات کے ذریعے قیام امن میں پاکستان اہم کردار ادا کرسکتا ہے۔امریکی وزیر خارجہ نے آرمی چیف سے ملاقات میں دونوں ملکوں کے درمیان انسداد دہشتگردی کے شعبے میں مزید گہرے تعاون کی امید کا بھی اظہار کیا۔اور ساتھ ہی مائیک پومپیو نے پاکستان کو دہشتگردوں اور جنگجووں کے خلاف مستقل وفیصلہ کن اقدامات اٹھانے کی ضرورت پر زوردیا۔
پاکستان کو دہشتگردوں کے خلاف مستقل وفیصلہ کن اقدامات اٹھانے کی ضرورت ہے:امریکہ
