پشاور(ہمگام نیوزڈیسک) جمعیت علماء اسلام (ف) کے سربراہ اور پاکستان کے پارلیمانی سیاستدان مولانا فضل الرحمان نے پاکستان کے موجودہ داخلی و خارجی سنگین صورتحال کے بارے بیان دیتے ہوئے کہا ہے کہ ہمسایہ ممالک کے ساتھ باڑ لگانا مسائل کاحل نہیں، بقول ان کے افغانستان اورایران ہماری قومیتوں سے براہ راست رابطے کررہے ہیں۔
پشاور میں پارٹی کی مرکزی مجلس عاملہ کے اجلاس کے بعد میڈیا سے بات چیت کرتے ہوئے مولانا فضل الرحمان نے کہا کہ پاکستان معاشی بحران کے بعد اب سیاسی بحران کاشکارہے، موجودہ حکومت کے بارے میں کہا کہ یہ جعلی حکومت ہے جسے عوام کی حمایت حاصل ہے نہ ان میں حکومت کرنے کی اہلیت ہے، وزراء کو ناکامی کی بنیاد پر تبدیل کیا گیا اور نئے لوگ لائے گئے،وزارت داخلہ توعمران خان کے پاس تھی مطلب وہ بھی ناکام تومستعفی کیوں نہیں ہوئے؟
مولانا فضل الرحمان نے کہا کہ پاکستان میں ٹیکنوکریٹس کی حکومت ہے اس لیے عمران خان مستعفی ہوں اورنئے انتخابات کرائے جائیں، مہنگائی اپنی آخری حدوں کو چھو رہی ہے، غرباء کاجینا محال ہوگیا ہے، پاکستان کے معیشت کی کشتی ہچکولے کھارہی ہے،یہ حکومت بجٹ پیش کرنے کی صلاحیت نہیں رکھتی، آئی ایم ایف بجٹ پیش کرے گا۔
جے یو آئی ف کے سربراہ نے کہاکہ پورے ملک میں امن وامان کی صورت حال مخدوش ہے،سترہ سالہ دہشت گردی کے خلاف جنگ کاکیافائدہ ہوا؟تجاوزات کی آڑمیں لوگوں کے گھر گرائے جارہے ہیں ,8 ماہ میں یومیہ 15 ارب کاقرضہ لیاگیا،چندماہ میں جوقرضہ لیاگیاتیس سالوں سے زائدہے عدالتی تحقیقات کرائی جائیں کہ یہ سب پیسہ کہاں گیا؟
