پاکستان گرے لسٹ میں شامل،ماہ ستمبر میں بلیک لسٹ میں جانےکا امکان

( ھمگام ڈیسک نیوز ) اطلاعات کے مطابق ریاست پاکستان کی داخلہ و خارجہ کی ناکام پالیسیز کی وجہ سے بین القوامی دنیا نے اسے قابل سزا گردانا، فنانشل ایکشن ٹاسک فورس کے حالیہ اجلاس میں امریکہ، برطانیہ، جرمنی اور فرانس نے پاکستان کو گرے لسٹ میں شامل کرنے کے حق میں ووٹ دیا ۔ جبکہ پاکستان کے حلیف ممالک تصور کیے جانے والے ممالک ترکی، چین اور سعودی عرب نے بھی اس فیصلے کی حمایت کی ۔جس کی وجوہات پر بات کرتے ہوئے ان کا مزید کہنا تھا کہ فرانس نے پاکستان کو گرے لسٹ میں شامل کرنے کی بات اس لیے کی کہ فرانس کی طرف سے پاکستان میں حافظ سعید کے خلاف کارروائی کرنے کے لیے زیادہ دباؤ تھا، لیکن اس کے باوجود حافظ سعید کی کالعدم تنظیم کو مختلف نام سے انتخابات میں حصہ لینے کی اجازت دی گئی۔تجزیہ نگاروں کا کہنا ہے کہ پاکستان کی جاری پالیسیز کو دیکھ کر اس کو فروری میں شامل کیا جا چکا تھا لیکن پاکستان کو دہشت گردی کے لیے مالی وسائل کی روک تھام کے لیے اقدامات کرنے کا بھی کہا گیا تھا۔ جن پر عمل درآمد کی صورت میں پاکستان اس لسٹ میں آنے سے بچ سکتا تھا۔ لیکن پاکستان رکن ممالک کو ان اقدامات سے اچھی طرح سے مطمئن نہیں کر سکا۔ان کا کہنا تھا کہ پاکستان کی ٹیم میں ماہرین اور تجربہ کار افراد شامل نہیں تھے جس کے باعث نگران حکومت کی بھیجی جانے والے ٹیم ٹاسک فورس کے ارکان کو قائل کرنے میں ناکام رہی۔ایف اے ٹی ایف کا اگلا اجلاس ستمبر میں ہوگا اور زیادہ امکان ہے کہ پاکستان کو موثر اقداما ت نہ کرنے پر اگلے قدم کے طور پر ‘ بلیک لسٹ’ بھی کیا جاسکتا ہے ۔ جس سے پاکستان کو نہ صرف معاشی وسیاسی طور پر نقصانات کا سامنا ہو سکتا بلکہ بین الاقوامی سطح پر پاکستان کے تشخص کو مزید نقصان پہنچ سکتا ہے۔ایف اے ٹی ایف ایک بین الحکومتی ادارہ ہے جسے 1989 میں منی لانڈرنگ اور دہشت گردی سے منسلک مالی معاونت کی روک تھام اور بین الاقوامی مالیاتی نظام کو اس سلسلے میں درپیش خطرات سے بچانے لیے قائم کیا گیا تھا۔پاکستان اس سے قبل 2012 سے 2015 تک فنانشل ایکشن ٹاسک فورس کی گرے لسٹ میں رہ چکا ہے۔پاکستان کی نگران وزیر خزانہ ڈاکٹر شمشاد اختر کی کوششوں کے باوجوددہشت گردی کے لیے مالی وسائل کی ترسیل پر نظر رکھنے والی عالمی تنظیم’فنانشل ایکشن ٹاسک فورس’ (ایف اے ٹی ایف) نے پاکستان کو بالآخر گرے لسٹ میں شامل کردیا گیا ۔