تربت، کیچ | 24 جون 2026
تربت(ھمگام نیوز) بلوچ یکجہتی کمیٹی (بی وائی سی) کے رہنماؤں ڈاکٹر ماہ رنگ بلوچ اور سبغت اللہ شاہ جی بلوچ کو سنائی گئی عمر قید کی سزا کے خلاف آج تربت شہر میں مکمل شٹر ڈاؤن ہڑتال کی گئی۔ ہڑتال کے دوران شہر بھر کی مارکیٹیں اور کاروباری مراکز بند رہے جبکہ عوام نے قید رہنماؤں اور ان کی حقوق و انصاف کی جدوجہد کے ساتھ یکجہتی کا اظہار کیا۔
مقامی ذرائع کے مطابق تربت کے بیشتر تجارتی مراکز مکمل طور پر بند رہے اور عوام نے سزا کے فیصلے کو مسترد کرتے ہوئے اسے سیاسی مزاحمت کو خاموش کرنے اور بلوچ قوم کی آواز دبانے کی کوشش قرار دیا۔
ہڑتال کے دوران بعض علاقوں میں دکانیں دوبارہ کھلوانے کی کوششوں کی اطلاعات بھی سامنے آئیں، تاہم اس کے باوجود شٹر ڈاؤن ہڑتال بڑی حد تک کامیاب رہی اور عوام نے اجتماعی مزاحمت اور اتحاد کا مظاہرہ کیا۔
مظاہرین اور ہڑتال کے حامیوں کا کہنا تھا کہ ڈاکٹر ماہ رنگ بلوچ اور شاہ جی بلوچ کے خلاف دیا گیا فیصلہ بلوچ عوام کے بنیادی حقوق، سیاسی آزادیوں اور انصاف کی جدوجہد کو دبانے کی ایک کوشش ہے، جسے عوام قبول کرنے کے لیے تیار نہیں۔
شہر میں ہڑتال کے باعث معمولاتِ زندگی متاثر ہوئے جبکہ مختلف حلقوں نے قید رہنماؤں کی رہائی کا مطالبہ بھی دہرایا۔
ہڑتال کے شرکاء نے “بی وائی سی رہنماؤں کو رہا کرو” اور “ہم بی وائی سی رہنماؤں کے ساتھ ہیں” جیسے نعروں کے ذریعے اپنی حمایت کا اظہار کیا۔
