یوکرین : (ہمگام نیوز) یوکرین میں کئی ماہ کے دوران روسی میزائل حملوں کی بدترین لہر کے بعد ایک دن کا سوگ منایا جا رہا ہے، جس میں کم از کم 41 افراد ہلاک اور 166 زخمی ہوئے ہیں۔
دارالحکومت کیف میں بچوں کا مرکزی اسپتال ان عمارتوں میں شامل ہے جو پیر کے روز ملک بھر کے شہروں میں متاثر ہوئیں۔
یوکرین کے سب سے بڑے بچوں کے ہسپتال اومٹڈیٹ چلڈرن ہسپتال کے ایک حصے پر میزائل سے حملہ کیا گیا جس کے نتیجے میں دو افراد ہلاک ہو گئے اور ملبے تلے زندہ بچ جانے والوں کی تلاش منگل کی علی الصبح تک جاری رہی۔
دوسری جانب یوکرین کی سرحد سے متصل روس کے جنوبی علاقے بیلگورود کے گورنر نے کہا ہے کہ گزشتہ 24 گھنٹوں کے دوران یوکرین کے حملوں میں چار افراد ہلاک ہوئے ہیں۔
پیر کے روز روس نے کیف اسپتال کو نشانہ بنانے کی تردید کرتے ہوئے کہا تھا کہ اسے یوکرین کے فضائی دفاعی میزائل کے ٹکڑوں سے نشانہ بنایا گیا تھا جبکہ یوکرین نے کہا تھا کہ اسے روسی کروز میزائل کی باقیات ملی ہیں۔
یوکرین کے صدر ولادیمیر زیلنسکی نے اس حملے کو ‘سفاکانہ’ قرار دیا اور اپنے روسی ہم منصب ولادیمیر پیوٹن کو ‘خونی مجرم’ قرار دیا۔
نیٹو منگل کے روز واشنگٹن میں ایک سربراہی اجلاس منعقد کرنے کی تیاری کر رہا ہے، جہاں یوکرین پر حملے پر فوجی بلاک کا ردعمل ایجنڈے میں سرفہرست ہوگا۔
