اربیل(ہمگام نیوز) عراق کے نیم خود مختار کرد علاقے میں کردستان کی آزادی کے سوال پر ہونے والے ریفرنڈم میں 92 فیصد ووٹروں نے عراق سے الگ ہونے کے حق میں ووٹ دیا ہے۔ یہ بات کردستان میں کرائے جانے والے متنازعہ ریفرنڈم کے دو روز بعد کُرد حکام کی طرف سے نتائج کا سرکاری اعلان کرتے ہوئے بتائی گئی ہے۔ کردستان کے الیکشن کمیشن کے حکام نے علاقائی دارالحکومت اربیل میں ایک پریس کانفرنس کرتے ہوئے بتایا کہ پیر کے روز ہونے والے ریفرنڈم میں 33 لاکھ سے زائد ووٹروں نے کُردستان کی آزادی کے حق میں ووٹ دیا۔ اس طرح یہ تعداد کُل ڈالے گئے ووٹوں کا 92.73 فیصد بنتی ہے۔ حکام کے مطابق اس ریفرنڈم میں ووٹ ڈالنے کی شرح 72.61 فیصد رہی۔
