خاش(ہمگام نیوز ) اطلاع کے مطابق ایرانی مقبوضہ بلوچستان کے ضلع خاش کے علاقے ایرندگان میں قابض ایرانی فورسز کے اہلکاروں کی مبینہ گھات لگا کر فائرنگ کے نتیجے میں دو بلوچ شہری شہید ہوگئے۔
تفصیلات کے مطابق، اتوار 15 نومبر 2026 کی علی الصبح تقریباً 4 بجے دو بلوچ شہری خاش شہر سے ایرندگان کی جانب سفر کر رہے تھے کہ ضلع خاش کے علاقے ایرندگان کے مرنتاک کے مقام پر قابض ایرانی فورسز کے اہلکاروں نے مبینہ طور پر ان کے راستے میں گھات لگا کر فائرنگ کی، جس کے نتیجے میں دونوں شہری شہید ہوگئے۔
ذرائع کے مطابق شہید ہونے والے دونوں بلوچ شہریوں کی شناخت محی الدین مارندگانی (علمی) المعروف میادین ولد رحمت اور آرش جمال زہی کے ناموں سے ہوئی ہے۔ دونوں کا تعلق علاقے ایرندگان سے تھا اور وہ خاش کے رہائشی تھے۔
ذرائع کے مطابق، دونوں شہری خاش سے ایرندگان کی جانب جا رہے تھے کہ مرنتاک کے علاقے میں تعینات فورسز کے اہلکاروں نے ان کے راستے میں گھات لگا کر ان پر فائرنگ کردی۔
ذرائع نے مزید بتایا کہ دونوں شہریوں کی شہادت کے بعد ان کی لاشیں فورسز کے اہلکاروں نے سرد خانے منتقل کردیں اور تقریباً سات گھنٹے بعد ان کی میتیں اہل خانہ کے حوالے کی گئیں۔
دوسری جانب مقبوضہ بلوچستان پولیس کے نائب سربراہ مرتضیٰ جوکار نے ایک بیان جاری کرتے ہوئے خاش کے علاقے ایرندگان میں گاڑیوں کی مسلح ڈکیتی کرنے والے ایک گروہ کو ہلاک کرنے کا دعویٰ کیا ہے۔ ان کے مطابق، پولیس اہلکاروں کے ساتھ مسلح جھڑپ کے دوران اس گروہ کے دو ارکان ہلاک ہوگئے۔
تاہم، باخبر ذرائع کی فراہم کردہ معلومات کے مطابق، مذکورہ دونوں بلوچ شہری خاش سے ایرندگان کے راستے میں قابض ایرانی فورسز کے اہلکاروں کی مبینہ گھات اور فائرنگ کے نتیجے میں مارے گئے ۔
رپورٹ مرتب کیے جانے تک واقعے کی اصل صورتِ حال، فائرنگ کے حالات اور پولیس حکام کی جانب سے پیش کیے گئے دعوے کی مزید تفصیلات سامنے نہیں آ
سکی تھیں۔


