بلوچستان: مختلف اوقات میں پیش آنے والے حادثات میں 6 افراد جاں بحق، 5 زخمی
بلوچستان (ہمگام نیوز) مقبوضہ بلوچستان کے مختلف مقامات و اوقات میں پیش آنے والے حادثات کے دوران خاتون سمیت 6 افراد جاں بحق جبکہ ایک بچی سمیت 5 افراد زخمی ہوگئے۔
تفصیلات کے مطابق سبی کے محلہ قصاب میں گھر کی دیوار گرنے سے ایک خاتون ملبے تلے دب کر جاں بحق ہوگئی، جاں بحق ہونے والی خاتون مقامی صحافی اور نجی چینل کے رپورٹر ظاہر عباس کی والدہ تھی۔
قلات میں کار گاڑی الٹنے سے ایک شخص جاں بحق جبکہ 2 افراد زخمی ہوگئے، خضدار سے قلات آنے والی کار گاڑی قلات کے قریب کوئٹہ کراچی شاہراہ ریچ کے مقام پر تیز رفتاری کے باعث الٹ گئی، جس کے نتیجے میں ڈرائیور موقع پر ہی جاں بحق ہوگیا جبکہ ان کے ساتھی شدید زخمی ہوگئے، جانبحق ہونے والے ڈرائیور کی شناخت خضدار کے رہائشی ہندو تاجر وجے کمار کے نام سے ہوی ہے جبکہ زخمی ہونے والوں کے نام علی نواز اور عمران سکنہ خضدار بتایا جارہا ہے۔
مزید تفصیلات کے مطابق مچھ میں آب گم کے میدانی علاقے میں مزدا اور گاڑی کے تصادم سے دو افراد جانبحق ہوگئے اور ژوب کے علاقے ڈی آئی خان قومی شاہراہ خاورینہ کے مقام پر ٹرک الٹنے سے دو افراد جان بحق اور ایک شخص زخمی ہوگیا۔
دکی میں مکان کی چھت گرنے سے 5 سالہ بچی شدید زخمی ہوگئی جبکہ کوئٹہ کے علاقے مشرقی بائی پاس میں نامعلوم افراد نے خنجر سے وار کرکے عبدالرحمان نامی شخص کو زخمی کردیا۔
