لندن (ھمگام نیوز) آجوئی بلوچستان جنُز (ایف بی ایم) ءِ بنجاھی کماش ءُ بلوچ راجی رھشون واجہ ھیربیار مری ءَ یک جارے ءِ تہ ءَ وتی ھیال درشان کنان ءَ گْوشت کہ 7 دھک اِنت کہ بلوچ ءُ پشتون راج یک ھیلکاریں باڑھی کُشندھے ءِ دیمپان اَنت کہ آ بلوچ ءُ پشتونانی ھون ءَ چہ وتی تُن ءَ پروشگ ءَ اِنت بلے آئی ءِ تُن پُرشگ ءِ نام ءَ نہ زانت۔
آئی تران کنان ءَ گْوشت کہ یک وھدے ءِ تہا بلوچستان ءُ پھتونستان ءَ را یک مزنیں کساسے ءَ نشانگ آماچ کنگ یک انچیں باڑھی کُشندھے (پاکستان) ءِ کارست اَنت کہ آ سک ءَ ھیلکار اِنت۔ اِے کُشندہ ءِ روشت ءُ کُشت ءُ کْوش ءِ داب ءَ چہ اِے زانگ بیت کہ اِے کُشندہ گْوں بلوچ ءُ پشتوناں بے کساس نپرت کنت۔ مُردنی بلوچ ءُ پشتون دگہ کسّے ءَ را یک شِشکیاسے ءِ کساس ءَ تاوان نہ داتگ۔
راجی رھشون واجہ ھیر بیار مری ءَ گْوشت کہ شال ءِ تہا وکیلانی سر ءَ بوتگیں مزنیں اُرش، شال ءِ تہا پُلوس کیڈٹانی سر ءَ بوتگیں اُرش ءُ انوگیں مستُنگ ءِ تہ ءَ نیکراھی مچّانکی ءِ سر ءَ بُوتگیں اُرش کہ چہ ایشی ءَ پنجاہ ءَ گْیش مردم بیران بوت اَنت، اِے پیمیں اُرشانی بابت ءَ مردم اّلم جْیڑ اِیت کہ بلوچ ءُ پشتونانی سر ءَ اِے پیمیں اُرش کنگ یک انچیں دژمنے ءِ کارست اَنت کہ آ بلوچ ءُ پشتونانی سر ءَ بے کساس نپرت کنت۔ اِے پیمیں بلوچ دژمنی ءِ تیوگیں اُرش اِے شون ءَ دنت کہ بلوچ ءُ پشتون ءِ دُژمن سک ءَ مھکم ءُ ھیلکاریں کُشندھے۔
آئی ءَ گْوشت کہ اِے دژمن دگہ کس نہ اِنت بلکیں اِے پنجاپ ءِ لشکر اِنت کہ آ بلوچ ءُ پشتون لس مھلوک ءِ سر ءَ اُرش کار اِنت۔ اِے ھما باڑھی کُشندہ اِنت کہ ایشی ءَ را انگریز ءَ ھندستان ءِ آجوئی ءِ جنز ءِ بگیری ءَ کارمرز کرتگ۔ اِے ھما لشکر اِنت کہ ایشی ءَ بنگال ءِ تہا اسلام ءِ نام ءِ سر ءَ کُشت ءُ کوش کرتگ، اِے کُشندھیں لشکر ءَ اوگانستان ءَ را چہ دَھکاں گْوں ھونریچ کرتگ۔ ایشی ءَ کشمیر ءِ تہا تباھی کرتگ، اے لشکر ءَ 70 ءِ دھک ءَ اردن ءِ تہ ءَ پلستینی آنی کُشت ءُ کْوش کرتگ۔ انوگیں اھد ءَ بلوچ ءُ پشتون ایشی ءِ نشانگ ءَ اَنت۔
بلوچ راجی راھشون ءَ گْوشت کہ پنجاپ ھر وھد ءَ اوگانیاں چہ بلوچستان ءَ دَر کنگ ءِ گپ ءَ کنت، ھالاںکہ اِے اوگانی پشتون گیشتر پشتون ھنکیناں جاھمنند اَنت کہ آیاناں ڈیورنڈ لکیر ءِ وسیلہ ءَ برتانیہ ءَ بھر کرتگ، ایشانی تہ ءَ لھتیں بلوچ ءِ زمین ھم ھوار اِنت بلے بلوچ ءَ را گْوں ایشی ءَ ھِچ جْیڑہ نیست۔ بلے برتانیہ ءِ کش اِتگیں لکیر، ڈیورنڈ لکیر ءَ را پنجاپ ءَ یک نیمون ءُ بھانگے جْوڑ کرتگ ءُ ڈیورنڈ لکیر ءِ اِے نیمگ ءَ را وتی میراس سرپد بوگ ءَ اِنت کہ ایشی ءَ را گْوں پنجاپ ءَ دُور ءِ ھِچ سیادی نیست۔ ڈیورنڈ لکیر ءَ بلوچ ءُ پشتون ءِ سرڈگار بھر کرتگ کہ آئی ءَ را نہ اوگانستان من اِیت ءُ نہ کہ بلوچستان۔
راجی رھشون ھیربیار مری ءَ اِے گپ چِست کرت کہ گْوستگیں 76 سال اِنت اِے دَمگ کہ آھود ءَ بلوچ ءُ پشتون جاھمنند اَنت، اِے جاہ پرچے ایمن نہ بیت۔ آھر اِے کجام تاگت اِنت کہ آئی ءَ اِے دمَگ ءِ راجاناں گُژنگی ءُ چکچینی ءِ نیمگ ءَ چگل داتگ۔ مئے سانمنداناں ھژدری اِنت کہ اِے کُشندہ ءِ کارستاں یک جوانیں دابے ءَ دُگنیا ءِ دیم ءَ بیار اَنت تانکہ اِے دمگ ءِ جاھمنندیں راجاناں اْیمنی ءُ وشھالی بہ رَس اِیت۔
بلوچ راجی رھشون ءَ وتی درشان ءِ گُڈ سر ءَ گْوشت کہ اِے ھیلکاریں کُشندہ بلوچستان ءُ پھتونستان ءِ تہ ءَ برجاھیں کُشت ءُ کوشاناں انڈیا ءِ سر ءَ مُشگ ءِ یک مزنیں ھُنرے زانت۔ اِے کُشندہ ءِ دست ءِ پروشگ ءِ وھد اَھتگ کہ ما اِے باڑھی کُشندہ ءَ را نہ ایوک ءَ میان استمانی تبک ءَ ایشی ءِ کارستاں پدّر بہ کن اَنت بلکیں وتی ھَند ءَ ھم یک مھکمیں دابے ءَ لانک بندگی اِنت۔ پشتون کہ آ بلوچ ءِ ھمساھگ اِنت، آئی ءَ را ھم اِے گپ پھمگی اِنت کہ اِے دَمگ تاں چُنت وھد ءَ بے زمیریں پنجاپی جرنلانی دست ءِ چیر ءَ پادمال کنگ بیت۔
