آواران (ھمگام ھال) بلوچ اسٹوڈنٹس پرنٹ نیمگ ءَ چہ “مھرگڑھ لبزانکی ءُ زانشتی مراگش” ءِ درگت ءَ پنتاک ءَ گْوشگ بوتگ کہ بلوچ راج! دُگنیا ءِ تہ ءَ ھما راجاں دیمروئی کرتگ کہ آ راج ءِ ورنایاں وانگ ءُ زانگ ءِ پِڑ ءَ وت ءَ مُھکم کرتگ، بے وانگ ءُ زانشت ءَ یک چاگردے کدی ھم دیمروئی کرت نہ کنت۔ اگاں کجام چاگرد ءِ تہ ءِ لس مھلوک چہ سسّا ءُ زانت ءَ دور بوت گُڑا آ چاگرد روچ پہ روچ پدمنتگ بُوان بیت۔ یک ناوانندھیں ءُ پدمنتگیں چاگردے ءِ تہ ءَ ھَر وڑیں سِلکاری، پدمنتگی، نادراھی سر چِست کن اَنت۔ زانشت مردم ءِ سیمی چَم ءِ بستار ءَ اِنت۔ آ سیمی چم بنی آدم ءَ راست ءُ چپ، نُکس ءُ تاوان، نپ ءُ پائدگ ءِ بابت ءَ سرپدی دَنت ءُ آئی ءَ را راستیں کِشک ءَ پْیش دار اِیت۔ بے زانشت ءَ راج سر بتگ بیت آ کْوریں بنی آدمے ءِ دروشم ءَ کدی وتی راستیں کشک در گپت کرت نہ کنت ءُ وتی ابدمانیں منزل ءَ پْول اِت کرت نہ کنت۔ منزل ءِ پْولگ ءُ دیم ءِ جُنزگ ءِ واست ءَ مارا زانشت ءِ پِڑ ءَ وت ءَ مھکم کنگی اِنت۔
پنتاک ءَ گْوشگ بوتگ کہ گُلیں راج ءِ ورنایاں! یک راجے ءِ جاور کدی مَٹ بوت ءُ گِھتر بوت کرت نہ کن اَنت تاں وھدے کہ آ راج وتی جاوراں وت مَٹ کنگ ءِ جُھد ءَ مہ کنت۔ یک چاگردے ءِ تہ ءَ بدلی آرگ ءُ گِھتری آرگ ءَ ورنائیں وانندہ وتی کِرد ءَ جْوانیں دابے ءَ پیلو کرت کن اَنت۔ راج ءِ وانندھیں ورنایانی زمہ واری اِنت کہ آ وتی لس مھلوک ءِ تہ ءَ سرپدی آرگ ءِ جُھد بہ کن اَنت۔ بے سرپدی ءُ زانشت ءَ راج ءِ جاور کدی مٹ نہ بنت، بلکیں روچ پہ روچ جاور نہ گیگ بوان بہ اَنت، راج پدمنتگ بوان بیت، گُژنگی، بزّگی واری ءُ بے آسراتی راج ءَ را انگیر کنان کن اَنت۔ وھدے کہ راج چہ بُنکی آسراتیاں زبھر بوت گُڑا آئی ءِ جْیڑگ ءِ بودِشْت ھلاس بیت، اگاں راج ءِ ورنایاں وتی باندات ءِ بابت ءَ نہ جْیڑ اِت گُڑا آئی ءِ آیوکیں باندات تھار بیت۔
پنتانک ءَ گوشگ بوتگ کہ مَڑاھداریں ورنایاں! بلوچ اسٹوڈنٹس فرنٹ بلوچ راج ءِ ھما نودربر گل اِنت کہ آئی ءِ لیکہ راجدوستی ءِ لْیکہ اِنت، آئی ءِ مستریں لْوٹ ءُ گزر ھمیش اِنت کہ بلوچ راج چہ تھاری ءِ در بیت ءُ رژنائیں راھے ءَ کشکے ءَ رھادگ بہ بیت ءُ میان اُستمانی راجانی پیم ءَ دیمروئی بہ کنت۔ یک راجے تاں وھدے وت ءَ زِندگ داشت کرت کنت وھدے کہ آ راج ءِ ورنا وتی لبزانک ءُ زانشت ءَ سر ءَ گْوں دل ءَ پھکی ءَ جُھد بہ کن اَنت۔ اگاں کجام راج ءَ وتی لبزانک ءِ سر ءَ کار نہ کرت، وتی زبان ءِ سر ءَ کار نہ کرت، وتی دود ءُ ربیدگ شُمْوش اِت اَنت گُڑا آ راج زُوت دُگنیا ءِ تہ ءَ وتی پجّار ءَ گار کنت۔ یک زندگیں راجے ءَ را وتی لبزانک ءِ دیمروئی ءِ واست ءَ باز کار کنگ لْوٹ اِیت، مراگش ءُ دیوان اڑ کنگ لْوٹ اَنت، زانشتی مراگش اڑ کنگ لْوٹ اَنت تاںکہ مراگش ءَ لس مھلوک بیت ءُ ساڑی بہ بیت چہ زانتکار کواس ءُ لبزانکاراں دربرگ ءِ جُھد ءَ بہ کنت۔
گْوشگ بوتگ کہ بلوچ راج ءِ گُلیں ورنایاں! راجی سماہ ءُ سرپدی ءِ واست ءَ بلوچ اسٹوڈنٹس فرنٹ آواران ھنکین ءِ نیمگ ءَ چہ “مِھرگڑھ لبزانکی ءُ زانشتی مراگش” ءِ نام ءَ یک مراگشے 8 جلکشان ءَ گورنمنٹ بوائز ماڈل ھائی سکول آواران نیابت ءَ برجم داتگ بوگ ءَ اِنت، اِے مراگش ءِ مْول مراد ایش اِنت کہ بلوچ ورنایانی تہ ءَ وانگی ءُ زانشتی سِنچ ودی بہ بیت ءُ آواران ھنکین ءِ تہ ءَ وانگی ربیدگ دیمروئی بہ کنت۔ اِے مراگش ءِ تہ ءَ جُتا جُتائیں سرھالانی سر ءَ گْوشتانک دیگ بیت، دیم پہ دیمی باوست (پیمل ڈسکشن) بیت، شئر ءُ شائری، کسمانک ءُ ساز ءُ زیملی دیوان برجاہ دارگ بیت۔
آئی ءِ تھا گْوشگ بوتگ کہ اِے وڑیں مراگش ھما وھد ءَ سوبمَنْد بہ اَنت وھدے کہ چاگرد ءِ ھر یک ورنایے مراگش ءَ وتی مراگش سرپد بہ بیت آئی ءِ تہ ءَ بَھر بہ زُور اِیت۔ اِے لبزانکی ءُ زانشتی مراگش ءِ سوبمَنْدی ھاتر ءَ بلوچ راج ءِ ورنا، زانتکار، کواس، لبزانکار ءُ آ دگہ پِڑ ءَ گْوں بندوکیں لس مھلوک ءَ گْوں دستبندی کن اَیں کہ آوت ءَ اِے مراگش ءَ ساڑی بہ کن اَنت تاںکہ مئے چاگرد ءِ تہ ءَ لبزانکی ءُ زانشتی ربیدگ دیمروئی بہ کنت۔ وھدے کہ لبزانکی ءُ وانگی ربیدگ یک چاگردے ءِ تہ مُھکم بوت اَنت گُڑا آ چاگرد وت ءَ ھر پِڑ ءَ مھکم کنت ءُ دیمروئی کنت۔ مئے پدمنتگی ءِ مستریں سوب مئے ناوانندھی، لبزانک ءُ زانشت ءَ دوری اِنت۔ بْیا اِت لبزانک ءُ زانشت ءَ نزیکی کن اِت تاکہ بلوچ راج ھم دگنیا ءِ آ دگہ زندگیں راجانی پیم ءَ یک زندگیں راجے ءِ بستار ءَ دیم ءَ بیت۔
“راست گْوَشتن ءُ راست کُرتن ءُ راست زانگ ءَ ھمباز”
“بد گْوشتن ءُ بد کرتن ءُ بد زانگ ءَ انگار”
(سید)
بلوچ اسٹوڈنٹس فرنٹ آواران ھنکین
