زاہدان (ہمگام نیوز) اطلاع کے مطابق ایرانی مقبوضہ بلوچستان کے مختلف علاقوں میں فائرنگ اور بارودی سرنگ کے دھماکے کے تین الگ الگ واقعات میں تین بلوچ شہری جاں بحق جبکہ دو زخمی ہوگئے۔ واقعات ایرانشہر اور ضلع گلشن کے علاقوں میں پیش آئے۔
تفصیلات کے مطابق، 8 نومبر 2026 کو ایرانشہر کے علاقے سجادشہر میں عیدگاہ کے سامنے ایک مسلح شخص نے دو بلوچ شہریوں پر فائرنگ کردی، جس کے نتیجے میں دونوں زخمی ہوگئے۔
زخمیوں کی شناخت 22 سالہ مبین کمالی ولد عیدمحمد اور 28 سالہ عمر کمالی ولد بلوچ کے ناموں سے ہوئی ہے۔ دونوں کا تعلق ایرانشہر کے علاقے سجادشہر سے ہے۔
ذرائع کے مطابق، فائرنگ کا واقعہ صبح تقریباً 11 سے 11:30 بجے کے درمیان پیش آیا۔ مبین کمالی کو تین گولیاں لگیں، جو ان کے پہلو، پھیپھڑے اور گردے کے حصوں میں پیوست ہوئیں۔ انہیں تشویش ناک حالت میں خاتم الانبیاء اسپتال کے انتہائی نگہداشت وارڈ (ICU) میں داخل کیا گیا ہے، جبکہ عمر کمالی بھی گولی لگنے سے زخمی ہوئے ہیں اور زیرِ علاج ہیں۔
رپورٹ کے مطابق، فائرنگ کی وجوہات اور مسلح شخص کی شناخت تاحال معلوم نہیں ہوسکی۔ دونوں زخمیوں کے اہل خانہ نے واقعے کے بعد متعلقہ عدالتی حکام سے رجوع کرتے ہوئے حملہ آور کے خلاف شکایت درج کرائی ہے۔
ایک دوسرے واقعے میں 10 نومبر 2026 کی صبح 30 سالہ بلوچ شہری امید کدخدایی زخموں کی تاب نہ لاتے ہوئے جاں بحق ہوگئے۔ وہ تقریباً 21 روز قبل بزمان سے ایرانشہر جانے والی شاہراہ پر نامعلوم مسلح افراد کی فائرنگ سے زخمی ہوئے تھے۔
ذرائع کے مطابق، امید کدخدایی ولد عیسیٰ کا تعلق ضلع نیکشہر کے علاقے بنت کے گاؤں دفتولگ سے تھا۔
ذرائع کا کہنا ہے کہ 29 اکتوبر 2026 کو نامعلوم مسلح افراد نے ان کی گاڑی رکوانے کے بعد ان پر فائرنگ کردی، جس کے نتیجے میں انہیں تین گولیاں لگیں۔ زخمی حالت میں انہیں کرمان شہر کے ایک اسپتال منتقل کیا گیا، جہاں کئی روز تک زیرِ علاج رہنے کے باوجود وہ 10 نومبر کی صبح دم توڑ گئے۔
تاحال حملہ آوروں کی شناخت، فائرنگ کے محرکات اور واقعے کی مزید تفصیلات سامنے نہیں آسکی ہیں۔
دریں اثنا، 9 نومبر 2026 کو ضلع گلشن کے علاقے کلگان کے سیاھان میں بارودی سرنگ کے دھماکے سے ایک بلوچ چرواہا جاں بحق ہوگیا۔
ذرائع نے جاں بحق شہری کی شناخت قادر بخش سیاھانی ولد نورمحمد کے نام سے کی ہے۔ وہ شادی شدہ اور تین بچوں کے والد تھے اور گاؤں بنسر، علاقے سیاھان کلگان کے رہائشی تھے۔
مقامی ذرائع کے مطابق، قادر بخش اپنے مویشیوں کی دیکھ بھال کے لیے گاؤں کاشوک کے قریب موجود تھے کہ ان کے گھر سے تقریباً چار کلومیٹر کے فاصلے پر ایک بارودی سرنگ سے ٹکرا گئے۔ دھماکے کے نتیجے میں انہیں شدید زخم آئے اور وہ موقع پر ہی دم توڑ گئے۔
مقامی ذرائع کا دعویٰ ہے کہ مذکورہ علاقے میں سپاہ پاسداران انقلاب ایران کی جانب سے بارودی سرنگیں بچھائی گئی ہیں۔ یہ علاقہ چرواہوں، خانہ بدوش قبائلی خاندانوں اور عام شہریوں کی آمدورفت کے لیے استعمال ہوتا ہے، جس کے باعث وہاں موجود بارودی سرنگیں مقامی آبادی کی زندگیوں کے لیے مسلسل خطرہ بنی ہوئی ہیں۔
رپورٹ کے مطابق، اس علاقے میں اس سے قبل بھی بارودی سرنگوں کے دھماکے ہوچکے ہیں۔ تقریباً دو سال قبل اسی علاقے میں ایک خاتون بھی بارودی سرنگ کے د
ھماکے میں جاں بحق ہوئی تھیں۔
