بساک کراچی ھنکین ءِ لس دیوان برجم دارگ بیتگ، زکریہ بلوچ ہنکینی کارمستر ءُ زیشان بلوچ ہنکینی کارگشاد گچین کنگ بیتگ اَنت۔بلوچ اسٹوڈنٹس ایکشن کمیٹی

کراچی: (ہمگام نیوز) بلوچ اسٹوڈنٹس ایکشن کمیٹی کراچی ھنکین ءِ لس دیوان ھنکینی کارمستر زکریہ بلوچ ءِ سروکی ءَ برجم دارگ بیتگ۔ دیوان ءِ ھاسیں مہمان بنجاہی ہالرسانی کارگشاد اُزیر بلوچ اَت۔ دیوان ءِ بن گپ بنجاہی سرکیولر، ہنکینی اھوال، نگد کاری، گَل کاری، ہندی ءُ میان استمانی سیاسی جاورہال ءُ آؤکیں گامگیج بیتگ اَنت۔

دیوان ءَ بنجاہی سنگت ءَ بنجاہی سرکیولر ونت کہ آئی ءِ تہ ءَ گل ءِ بنجائی کمیٹی دیوان ءِ اہوال ءُ گل ءِ کار ءُ پہ دیمی کاراں زرتگیں فیصلہ دیوانءِ دیم ءَ ایر کت اَنت۔ بنجاہی کارءُ پالیسیانی سرءَ دلجمی ءَ گوں تران ءَ پد دیمی بن گپ ہنکینی اہوال اَت کہ آئی ءِ تہ ءَ کراچی ہنکین ءِ گوستگیں کارانی سرجمیں اہوال دیوان ءِ دیم ءَ ایر کنگ بیت اَنت ءُ دیمی بن گپ نگد کاری ءَ کارانی گہتر کنگ، ہنکین ءِ نزوریانی سرءَ نگد کنگ بوت ءُ ہنکینی زمہ واراں وتی نزوری من اِت اَنت ءُ پیمان کُت کہ آوکیں زمہ وار اِش ردیاں گِر اَنت ءُ ادارہ ءَ گیش مہکم کنگءَ وتی جہد ءَ تُرند کن اَنت۔
گل کاری ءِ بن گپ ءَ بنجاہی سنگت ءَ تران کنان ءَ گوْشت کہ مرچی ادارہ بلاہیں پندے ءِ بُرگ ءَ پد اے جاہ ءَ اِنت ءُ یک سنجیدہ ئیں سیاستے ءَ گوں دیم ءَ جُنزگ اِنت۔ بلے ہنکین ءِ تہ ءَ لہتیں بے سریں گال بند کارمرز بیگ ءِ رواج گندگ بیگ اِنت کہ اِش ردیں زہنیت جوڈ کنگ ءَ اَنت پہ درور نیوٹرل مردم ءُ غیر سیاسی مردم، سافٹ ءُ ریڈیکل سیاست ءُ ایدگہ، اِش کُل بے سریں گالبند اَنت ءُ بے سمائی ءَ مئے زہنانی تہ ءَ اشاں جاہ کتگ، کسے اگاں وت ہمت ءُ جہد کت نہ کنت گڈا لبز نیوٹرل ءُ غیر سیاسی آں کارمرز کنت ءُ وتءَ بے میار کنگ ءِ کوشست کنت بلے بلوچستان ءَ سیادی داروکیں ورنائے بیھ ہم غیر سیاسی بیت نہ کنت، اگاں کسے وتءَ نیوٹرل گوْش ایت گڈا آ پاد پِر دنت ءُ وتی نزوری ءُ کار نہ کنگ ءِ جواز پیداگ کنگ اِنت۔ دومی نیمگ ءَ ما گوْشیں کہ مارا زالبولانی سرءَ کار کنگی اِنت، اِش گپ رد اِنت، زالبول زناں بلوچ چاگرد ءَ چہ دریں مردم اَنت کہ آہانی سرءُ جتا کار کنگ ءِ گپ بہ بیت! زالبول ہم یکیں ہساب ءَ بلوچ چاگرد ءِ بھر اَنت۔ زالبوالانی سرءَ کار کنگ ردیں گپے بلکیں زالبول ءَ گوں ہواری ءَ کار کنگ ءِ گپ بہ بیت۔ ادارہ ءِ دستور ءُ لوگو ءِ تہ ءَ تچک زاہر اِنت کہ کتاب ءَ داروکیں یک دستے زالبول ءِ گڈا دومی مردین ئیگ اِنت پمیشکا ادارہ ءَ اے پرْک ءُ پیر ہلاس کتگ گڈا باسکاں ہم ہمے پرک ءُ پیر وتی بے سمائی ءِ تہ ءَ کشگی اِنت۔

سنگت ءَ دیمتر ءَ تران کنان ءَ گوْشت کہ ادارہ ءِ تہ ءَ ما ڈسپلین ءِ گپ ءَ کنیں کہ نیست اِنت، ڈسپلین ہست بس پجاہ آرگ، زیرگ ءُ عمل کنگی اِنت۔ اے ڈسپلین اِنت کہ سنگت اے دیوان ءَ نشتگ ءُ گوش دارگ ءَ اَنت یا ایدگہ گل ءِ کار بنت کہ گوں پابندی ءَ سنگت کن اَنت اِش، پمیشکا ڈسپلین ہست اِنت بلے سنگت پجاہ آرگ ءَ نزوری کن اَنت پمیشکا ڈسپلین نزور بیت۔ ادارہ ءِ مہکم کنگ ءَ وتی تہ ءَ ادارہی سِنچ ودی کنگ ءُ گل توک ءَ چیں مہکم کنگی اِنت گڈا ڈن ءَ لس نودربریے ءِ رہشونی بیت کنت۔ ہمنچو ادارہ توک ءَ چیں مُہر ءُ مہکم بیت ہمنچو ڈنی نودربرانی چاگرد سیاسی بیت کنت۔

دیوان ءَ سرجمیں بنگپانی سرءَ تران کنان ءَ پد دیمی بن گپ ہندی ءُ میان استمانی سیاسی جاورہال اَت کہ سنگتاں جاورانی سرءَ وتی چمشانک ایر کت اَنت ءُ گڈی بن گپ آوکیں گامگیج اَت کہ آئی ءِ تہ ءَ ہستیں ہنکینی کابینہ ہلاس کنگ بیت ءُ نوکیں کابینہ گچین کنگ بیت۔ نوکیں کابینہءِ تہ ءَ زکریہ بلوچ کارمستر، موسیٰ بلوچ کمک کارمستر، زیشان بلوچ کارگشاد، نواز بلوچ کمک کارگشاد ءُ حمل بلوچ ہالرسانی کارگشاد گچین کنگ بیت اَنت۔
دیوان ءِ گُڈسرءَ نوک گچین بیتگیں سنگت سوگند دیگ بیت اَنت ءُ دیوان ہلاس کنگ بیت۔