یورپ ءَ سال 1983 ءَ آجوئی جنز ءُ آجوئی لوٹوکیں گلانی لسٹے جوڑ کنگ بوت، اے لسٹ ءِ تہ ءَ 1983 ءَ گر دانکہ 1945 ءَ آجوئی لوٹوکیں جنز ءُ گلانی چیز نزار ات ءُ یکجاہ کنگ ءُ نبشتہ کنگ بوت انت، ایشی ءَ چہ یورپ ءَ یک سد ءُ چِل ءُ ایشیا ءَ یک سد ءُ پازدہ یک، سد ءُ چاردہ براعظم امریکہ ءُ ھشتاد ءُ چار اپریکہ ءَ، ایدگہ پورائیں جھان ءَ 569 جتا جتائیں ٹولی ھوار ات- اے درستیں ٹولیانی تہ ءَ تھنا چندے ٹولی آجوئی گرگ ءَ سوبین بوتگ انت ایدگہ دنیا ءَ چہ انچو بیگواہ بوت انت چش کہ زوراکیں ڈائینا سور چہ دنیا ءَ بیگواہ بوت انت۔
پد ءَ 1990 داں 1996 دنیا ءِ تہ ءَ نود ءُ ھشت ٹولی ءَ تھنا دنیا ءَ را وتی نیمگ ءَ دلگوش گور کنائینگ ءَ سوبین بوتگ انت ایدگہ دنیا ءِ تہ ءَ بیگواہ بوتگ انت انچو کہ گند ئے سھب ءِ سرا استال گار بہ بنت۔
اے سوب مندیں تیوگیں جھدانی یک ھساب بورگ ڈول بوتگ، آ اِش بوتگ آیاں وتی جیڑہ ءَ را دنیا جیڑہ جوڑ کنگ ءَ سوبین بوتگ انت- آیانی لس مھلوک آیانی ھک ءَ اَت، آ وتی جھد ءَ (long turm)دراج کش کنگ ءَ سوبین بوتگ انت آیانی راجی رھبند یکے اَت ءُ جوان اَت آجوئی ءِ ھک ءَ اَت، آیاں آشوب ءُ راجی آجوئی ءِ تپاوت زانتگ ءُ وتی راج ءَ را ھنداں، ٹکاں ءُ زات ءُ ٹولیاں بھر نہ کتگ آ یک راجے بوتگ انت وتی جھد اِش دیم ءَ برتگ۔
پوکُو ءِ لیکہ ءِ رد ءَ ھما جنز کہ روس بھر ءُ بانگ ءَ رند ھرچی جنزے بنا بوت آیاں وتی راہ شمشت ءُ آ بے سوب بوت انت آ جھد ءِ جھدکاراں بے کساس کربانی داتگ بلے انگت بے سوب بوتگ انت، بے سوبی ءَ پد وھدے ھرکس ءَ کہ پوکو ءِ لیکہ ءِ رد ءَ کار کتگ راجی راہ کش اتگ ءُ جھد کتگ آ کربانیاں ابید سوب مند بوتگ انت۔
راجی جھد امنچو دراج کش بیت جیڑھے نہ انت بلے آیانی مول ءُ مراد، وژن ءُ پالیسی تچک ءُ پلگار بہ بیت آ کسانیں مدتے وتی جھد ءَ سوبین بنت، ھر وھد ءَ زورگیر کوشست کنت کہ دراج کشیں مُدت ءِ تہ ءَ مردماں دلپروش بہ کنت دانکہ راجی جھد ءَ آسرے دات مہ کن انت چہ جھد ءَ دلپروش بہ بنت بلے جھد مزنیں مدتاں پد سوبین بنت راجانی جوڑشت ءَ مدت رؤ انت راجی جھد پشتکانی کربانی دیگ ءَ پد سوبین بنت چش کہ ویتنام ءِ جھد، بیست ءُ ھشت سال ءِ جدوجھد ءَ پد 1973 سوبین بوتگ ات، ھندوستان ءِ راجی جنز ءَ سد سال جتگ چش کہ 1947 ءَ گلامی سانکلاں آجو بوتگ، ہری ٹیریا ءِ جھد 31 سال جتگ پد ءَ 1991 ءَ سوبین بوتگ انت۔
راجی جھد ھما وھد ءَ وتی راہ ءَ درکیت وتی منزل ءَ شموش ایت جھدانی تہ ءَ مردم ءُ رھشون، زاتی واھشتانی ھاترا دراج کشیں جھد ءَ ابید وھدی ھساب ءَ زاتی واھشتانی ھاترا گوں راجی جھد ءَ سنگین نہ بنت ھمے سوب ءَ راجی جھد تاوان بار بنت۔
دراج کشیں راجی جھد تچک ءُ گیشتگیں راہ، لیکہ ءُ راجی یکمشتی بنیاد ءَ بہ بیت آ وتی جیڑہ ءَ دنیا ءِ جیڑہ جوڑ کنگ ءَ سوبین بنت کجام اوں وھد ءَ وتی آجوئی ءِ گرگ ءَ سوبین بنت گلامی ءِ تھاری ءَ نوکیں سھبے ءِ رنگ ءَ بدل کت کن انت۔
