لندن (ھمگام نیوز ) ماں برتانیا ءَ بلوچ راجی زْرمبشت ( بی این ایم ) ءِ پہ بلوچستان ءِ آجوئی ءُ ماں بلوچستان ءَ مردمی اگبالانی بارہ ءَ آگاھی باوست ءِ بنداتی بھر گْوستگیں روچ ءَ آسر بیتگ۔ آگاھی باوست ءِ بنداتی بھر ءَ بی این ایم ءِ باسکاں لندن شھر ءَ پنتاک بھر کرتگ۔
بی این ایم ءِ باسکاں گدان جتگ ءُ برتانیا ءِ شھرمنند بلوچستان ءَ پاکستانی زوراکی ءُ بلوچ راج ءِ چیردستیں جاور ءِ بارہ ءَ سھی کرتگ اَنت۔
چہ بی این ایم ءِ نیمگ ءَ بھر کنگ بیتگیں پنتاک ءِ سرھال اَت ، بلوچ زْرمبشت ءِ بارہ ءَ سرپدی ، مزدانک ءُ آجوئی ءِ لوٹ۔
چہ بی این ایم برتانیا تک ءِ نیمگ ءَ گْوشگ بیتگ کہ دیمتر ءَ برتانیا ءِ دگہ شھراں ھم آگاھی باوست ھلائینگ بیت۔
آیاں وتی باوست ءِ میان ءَ گوں برتانیا ءِ شھرمننداں راھوت کرتگ ءُ آیاں گْوشتگ بی این ایم پہ وتواجہ ءُ وتواکیں بلوچ مھترھند ءِ جوڑ کنگ ءَ جھد کنوکیں پرایمنیں سیاسی گلے۔ بی این ایم بلوچ راج ءِ جھگیر اِنت کہ وتی آجوئیں مھترھند ءِ لوٹوک اِنت کہ آ اود ءَ آیانی مڈی آیانی وتی دست ءَ بہ بہ اَنت ءُ آ وتی جیڑہ ، کار ، سیاست ءُ چاگرد ءِ بارہ ءَ وت مستر بہ بہ اَنت۔
آیاں برتانیا ءُ میان استمان ءِ سر ءَ زور داتگ کہ بلوچ راج ءِ واکداری اگبال ءَ بہ من اَنت ءُ بلوچستان ءِ آجوئی ءِ زْرمبشت ءِ پلہ مرزی بہ کن اَنت کہ پاکستان ءَ زیردست کرتگ ءُ چہ آجوئی ءَ زبھر کرتگ۔