لاریسا(ہمگام نیوز)یونان کے شمال میں واقع شہر لاریسا کے قریب ایک مسافر ٹرین اور مال بردار ٹرین کے درمیان تصادم کے نتیجے میں کم از کم 32 افراد ہلاک اور درجنوں زخمی ہو گئے ہیں۔
یہ واقعہ منگل کی رات پیش آیا، جس کے بعد ریسکیو اور امدادی کارکنوں نے زندہ بچ جانے والوں کی مدد کے لیے رات بھر کام کیا۔
مسافر ٹرین یونان کے دارالحکومت ایتھنز سے روانہ ہوئی تھی اور تھیسالونیکی شہر جا رہی تھی جبکہ اس میں تقریباً 350 افراد سوار تھے۔
فائر سروس نے اطلاع دی ہے کہ تقریباً 40 ایمبولینسیں جائے وقوعہ پر موجود ہیں، جن میں پیرامیڈیکس زخمیوں کی دیکھ بھال کر رہے ہیں۔
بچ جانے والوں کو تلاش کرنے کے لیے رات بھر کام کرنے والے امدادی کارکنوں نے افسوسناک مناظر بیان کیے ہیں۔
ایک امدادی کارکن نے یونان کے سرکاری ٹی وی کو بتایا کہ ’ہم لوگوں کو زندہ، زخمی حالت میں نکال رہے ہیں۔ ان میں مردہ بھی ہیں۔ ہم ایک بڑے المیے سے گزر رہے ہیں۔‘
حادثے میں بچ جانے والے مسافروں نے بھی حادثے اور ٹرین سے بچ نکلنے کی تفصیلات بتائی ہیں
