زاہدان (ہمگام نیوز) رپورٹ کے مطابق اتوار 15 نومبر 2026 کو قابض ایرانی فورسز اور سکیورٹی اداروں نے زاہدان شہر کے علاقے کورین کے گاؤں چاہ داؤد میں بڑے پیمانے پر کارروائی کرتے ہوئے باپ بیٹے سمیت دو بلوچ شہریوں کو گرفتار کر لیا۔
ذرائع نے گرفتار ہونے والے دونوں بلوچ شہریوں کی شناخت تقریباً 42 سالہ نعمت اللہ شہ بخش ولد شاہ دوست اور ان کے تقریباً 20 سالہ بیٹے یاسین شہ بخش کے ناموں سے کی ہے۔ دونوں کا تعلق اور رہائش زاہدان شہر کے کورین کے علاقے چاہ داؤد سے بتائی جاتی ہے۔
ذرائع کو موصول ہونے والی اطلاعات کے مطابق، درجنوں فوجی اور نجی گاڑیوں میں سوار قابض ایرانی فوج اور سکیورٹی اہلکاروں نے مذکورہ گاؤں پر دھاوا بول دیا۔ اس دوران باپ بیٹے کو حراست میں لینے کے ساتھ فائرنگ بھی کی گئی، جس سے علاقے کے رہائشیوں میں خوف و ہراس پھیل گیا۔
ذرائع نے مزید بتایا کہ کارروائی میں شریک اہلکار شہریوں کی متعدد قیمتی اشیا بھی اپنے ساتھ لے گئے، جن میں موبائل فون، ایئر کنڈیشنر، کئی موٹر سائیکلیں، ایک گاڑی اور گھروں میں موجود سونے کے زیورات شامل ہیں۔
اطلاعات کے مطابق، گرفتار ہونے والے یاسین شہ بخش ایک محنت کش بلوچ شہری ہیں، جو کچھ عرصہ قبل تہران میں مزدوری کرنے کے بعد اپنے آبائی علاقے واپس آئے تھے۔ جبکہ ان کے والد نعمت اللہ شہ بخش مویشی پالنے اور متعدد بھیڑیں رکھنے کے ذریعے اپنے خاندان کا گزر بسر کرتے تھے۔
رپورٹ کی تیاری تک اس کارروائی کی اصل وجوہات، دونوں شہریوں کی گرفتاری کے اسباب، ان پر عائد ممکنہ الزامات، حراست کے مقام اور ان کی موجودہ صورتحال کے بارے میں کوئی مصدقہ معلومات سامنے نہیں آ
سکی ہیں۔


