روچے ماں گنج کلات ءِ پٹاں
بلوچانی ڈگار بے مٹاں
بهارگاه ءِ نوبت ءِ بُنگیج ات
نوکیں زندے زرت درچک لٹاں
،
هرجه رُمب اتنت موریکاں
کڈک جهد کناں په وتی نان
سَکک هم تَچاں و مَیدان
گوئمز هم هونژگ ات په وتی شان
،
سارتی هم شُتت و هَلّان ات
مُلاؤک همود مَلّان ات
بال ات ، په کهیب جَلّان ات
کاسلونک هور وتی بَلّان ات
،
هرگوشکے روان ات آپ ءَ
شئیراں هم جناں گوں چاپ ءَ
گرم ات هم دلی پیتاپ ءَ
وارتت ئی سبزگاں هم گواپ ءَ
،
لُڈاں و روان ات کنداں
چاراں و سئیل کناں هر هنداں
سلاماں هم دیاں دلبنداں
سِٹک هم جناں ماں شِنداں
،
کرگوشک دیست دجک سلامی دات
مهراں زند ءِ هم کرتش یات
دیما ترگوں سیکُرّ تران بوت
دروتاں دات وتیگاں دلشات
،
آزمان هم پراه بے گواز ات
ساپ ات ، روشن ات ، بے راز ات
مولُم وش ات و وش ناز ات
دلکشی ءِ زمانگ ءِ ساز ات
،
چه بیرک ءِ تیهُریں کُهبنداں
چِست بانز په سواد- مُلک گِنداں
دور شت ، رودبار چه در شُت
پٹاں گنج کلات رَست شنداں
،
چارست هر دمگ بے مَٹ ات
جازموریانی زر ءِ آ وَٹ ات
گوک ات و رَمگ و گامیش ات
هُشتر و بَگجتانی پَٹ ات
،
گِدان ات جاهے و تگردی لوگ
جاهے لوگے ات و کِشار و جوگ
جاهے هم کلاتے بیران
جاهے کبر ات و گاریں بوگ
،
هر جاه اے بلوچ ءِ هَند ات
بیران، هم بلوچ ءِ دلبند ات
بانز گَشت که به رَوت وتی لوگ ءَ
شُدیگ بوتگ ات و هم ژند ات
،
بِرگشت ، راه ءَ دیستی سک دور
روشن و روژنا روچ ءِ نور
میتگ شاهگاں ات آبات
سبز و میزران تاں بمپور
،
جاشک ءِ چه کَش و میناب گوئست
تاں پیشی گنج کلات ءِ پَٹاں رَست
شکار ءِ هُلّ چِست بیت ماں سر
دشت و کوه ءَ چاریت چئے هست
،
دورءَ چه ودی کرگوشک بوت
بانز دات هم زراب جَهلَگ ءَ زوت
چو تیر چه کمان شُت جهل ءَ
په شکار ءَ بوتگ ات سَکّی لوت
،
هرگوشک ءَ په آتک چستی کنت
گُژن ءِ وتی زراب ءَ تَسلّه دنت
شئیرے ترونگلیں دَؤر ءِ وَنت
زمانگ ءِ هست بلے جند ءِ پَنت
،
سیکُرّ دیست وکاب ءِ بال ءَ
نیّت هم بدیں گوں جنجال ءَ
شانتی ڈنگراں چار ٹال ءَ
بانزل و گردن ءِ شپتال ءَ
،
گُٹ ءِ نُکّ بُن ءَ تیر سُپته
بانزل ٹنگ و گونڈل رُپته
پاد ءِ پنجگی مُٹ بوته
کوارّ ات و ڈگار وتی چُپته
،
بانز سُست و دمان چَپی بوت
هرگوشک چه رَهَز رَکّست زوت
دوستی ساه بکش په دوست بوت
گروناکی گوں ساه هم بوت دوت
،
گوں نیکاں ، نیک بیت هر وهد یار
دوستی و همبلی ءَ سکّی ءَ دار
دور گند تو ببئے دوری ءَ چار
شکاری بیت شکار هم سد وار
،
هر وهد سوب نه بیت زلم ءِ یار
چوشیں واهگاں ، بَنت گمسار
سر زور هم پُرُش انت ، بنت بیکار
همبل شیر تبیں ، دار وتی سار !
کریم بلوچ _ تهل
15.11.2021
 |
ReplyForward
|
