ھاران (ہمگام نیوز) بلوچ اسٹوڈنٹس ایکشن کمیٹی ھاران ھنکین ءِ آرگنائزنگ باڑی دیوان بنجاہی کماش شبیر بلوچ ءِ سروکی ءَ برجم دارگ بیتگ۔ دیوان ءِ مہمان ھاس بنجاہی ہالرسانی کارگشاد اُزیر بلوچ بیتگ۔ دیوان ءِ بن گپ پجاری دیوان، بنجاہی سرکیولر، گلَ کاری ءُ آؤکیں گامگیج بیتگ اَنت۔
دیوان ءِ اولی بن گپ پجاری بھر اَت کہ کُلیں سنگتاں وتی پجار کُت ءُ دومی بن گپ بنجاہی سرکیولر ءِ تہ ءَ بنجاہی سنگتاں سرکیولر ونت کہ آہیءِ تہ ءَ بنجاہی کمیٹی دیوان ءِ اھوال ءُ پہ آوکیں کارانی واستہ فیصلہ ھوار اِت اَنت۔
دیوان ءِ دیمی بن گپ گَل کاری اَت کہ آہی ءِ تہ ءَ بنجاھی سنگتاں تران کنان ءَ گوْشت کہ ھاران یک مزنیں سیاسی گراونڈے ءُ اد ءِ ورنا چہ بلوچ راجی سیاست ءَ باسما اَنت ءُ راجی زمہ واریاں سرپد ءُ پوھ اَنت۔ ھاران ءِ نودربر سیاست بلاہیں مدتےءَ یلہ بیتگ ءُ اد ءِ ورنا جوانیں سیاسی پلیٹ فارمے ءَ چہ زبھر بیتگ اَنت بلے گل ءِ سنگتانی جھد ءِ برورد ءَ مرچی ادارہ یک جوانیں سیاسی ماھولے ودی کنگ ءَ سوبین بیتگ ءُ نی ہمے ماھول گیش گِہتر ءُ مہکم کنگی اِنت داں ورنایاں دلجمیں سیاسی تلو ءُ ماھولے بہ رسیت ءُ گوں بلوچ نودربر سیاست ءَ ہمگرنچ بہ بنت۔ بگندے ادارہ ءَ کمو پیسرءَ آئگی بیتگ بلے ہمنچو وھد کہ لگیتگ اے وھد ہمے سیاسی ماھول ءُ گَل کاری ءِ سرءَ درکار بیتگ اَنت داں ادارہ مہکمیں رنگے ءَ اوشتات بہ کنت۔
سنگتاں دیمتر ءَ تران کنان ءَ گوْشت کہ ھاران ءِ تہ ءَ راجدوستی ءِ مہکم بیگ ءِ مستریں دروراں چہ یکے اِش اِنت کہ ادءَ نودربر سرفیس سیاست نہ بیتگ بلے ورنا ءُ مردمانی تہ ءَ راجی سِنچ ءُ پِگر زندگ بیتگ ءُمسترں وشی گپ اِش بیت کہ مردم پہ سیاسی جُھدءَ ھُدوناک بیتگ اَنت۔ دومی ھاران ءِ ہوالہءَ وتگڈیں لہتے ھیال بیتگ کہ ادءَ دین پرستی ہست بلے گواچنی گپ اِش اِنت کہ ھاران ءِ چاگرد بلوچستان ءِ ایدگہ میتگانی ڈولءَ یک سیکولر چاگردے کہ ادءَ مھلوک دین ءِ پرک ءُ پیرءَ بُرز بلوچ ءِ بستار ءَ زندگ اِنت کہ اشانی تہ ءَ ھندو کمیونٹی ءِ مردمانی گوں چاگرد ءَ برابری ءِ بستار ءَ زند گوازینگءُ وتءَ بلوچ سرپد بیگ مستریں درور اَنت۔ اد ءِ ورنایانی تہ ءَ ہم سیکولر ءُ بلوچ دوستیں پگرے ہست کہ ورنا گوں جتائیں کسانیں کمیونٹیاں ھوار یکجاھ راجی بستار ءَ چاگرد ءِ بھر اَنت بلے ہمے پِگر گیشتر سِنگارگ ءُ مہکم کنگ لوٹیت۔ ادارہ ءِ تہ ءَ ہندو کمیونٹی ءِ سنگت ہم ھوار اَنت ءُ سیاسی جُہد ءِ بھر اَنت کہ وتی تہ ءَ وت سیاسی ءُ پگری عمل ءِ سوبمندی اِنت۔ اے بلوچ راجدوستی ءِ مہکمی اِنت کہ بلوچ وتءَ سرجم راجے سرپد بیت۔
گڈسرءَ سنگتاں تران کنان ءَ گوْشت کہ ھاران ءِ گراونڈ کمو چہ بلوچ راجی سیاست ءَ گستہ کنگ بیتگ کہ آہی ءِ مستریں سوْب مئے ھیال ءَ بلوچ نودربر سیاست ءِ نہ بیگ بیتگ، بلے نی ادارہ ءَ وتی اسٹرکچر جوڈ کتگ ءُ ہمے جہد بیت کہ اد ءِ نودربر سیاست مہکم کنگ بہ بیت ءُ ورنا راجدوستی ءِ لیکہ ءِ بنیاتءَ ایدگہ بلوچ ورنایاں گوں نزیک کنگ ءُ ھوار کنگ بہ بنت داں بلوچ وتی راجی بستار ءَ ھکیگیں رنگے ءَ دیست بہ کنت ءُ پہ راج ءَ جہد بہ کنت۔
دیوان ءِ تہ ءَ سرجمیں بنگپانی سرءَ تران کنان ءَ پد گُڈی بن گپ آؤکیں گامگیج اَت کہ آہی ءِ تہ ءَ نوکیں ھنکین جوڈ کنگ بیت ءُ پہ ھنکین ءَ جتائیں فیصلہ زیرگ بیت اَنت۔ ھاران ءِ نوک جوڈ بیتگیں ھنکینی آرگنائزنگ باڑی ءِ تہ ءَ عدنان بلوچ ھنکینی آرگائزر، بلوچ ڈپٹی آرگنائزر، زیبا بلوچ، امُل بلوچ ءُ اِشراک بلوچ آرگنائزنگ کمیٹی ءِ باسک گچین کنگ بیت اَنت۔
دیوان ءِ گُڈسرءَ گچین بیتگیں کابینہ ءُ ھنکینءِ باسک سوگند دیگ بیت اَنت کہ سنگتاں وتی زمہ واریاں مھکمیں رنگے ءَ پیلو کنگ ءِ پیمان کُت ءُ دیوان ہلاس کنگ بوت۔
