سوراب (ہمگام حال) گوادر ءَ چِہ واتر کتگیں بلوچ راجی مچُی ءِ کاروان تربت ، پنجگور ءُ گریشہ ءَ مُچّی ءُ دیوان کنان ءَ مرچی سوراب ءَ سربوت، کہ آیاں سرجمیں ھَند ءُ دمگاں بلوچ مہلوک ءَ مزنیں کساسے ءَ ہمراہداری کتگ ءُ ہرزرتگ ات۔
قوم ءَ ہر جاگہ ءُ دمگاں بلوچ راجی مچُی ءِ گوں مزنیں کساسے ءَ گوں مزنیں شرپے ءَ وش اتک کتگ۔
درستیں جلسہانی تہا لکّانی ہساب ءَ مردماں بہر زرتگ ءُ ہمراہداری پیشداشتگ۔
گریشہ ءَ چِہ بلوچ راجی مچُی ءِ کاروان مرچی نیمروچ ءِ ساہت 2:00 ءِ نزیک ءَ سوراب ءَ رَستگ کہ اودا سوراب ءِ مردماں بلوچ راجی مچی ءِ کاروان ءَ جوانیں وڑے ءَ وش اتک کتگ ءُ جلسہ ءَ ہزارانی کساس ءَ بلوچ مہلوک ءَ بہر زرتگ۔
ڈاکٹر ماہ رنگ بلوچ ءَ ہوار دگہ رہشوناں گشتانک داتگ۔
جلسہ ءِ گُڈسر ءَ بلوچ راجی مچُی ءِ شہیدانی یات ءَ راجی سوگندی دیوان کنئگ بوتگ۔
گُڑسر ءَ راجی مُچّی ءِ رہشوناں سوراب ءِ بہرزرتگیں مردمانی منتواری گپتگ۔
