لندن (ہمگام نیوز) پری بلوچستان مومنٹ ءِ جارکش ءَ وتی شنگ کرتگیں درشان ءِ تہ ءَ گشتگ کہ سر وزیری گچینکاریاں زورگیپتیں بلوچستان ءِ اندر ءَ اے رنگ ءَ کہ بلوچ راج ءَ وتا دور داشتگ پیش داشتگ اے وشی ئے گپ انت زورگیریں ایران ءِ زلم ءُ زوراکیاں چہ ابید بلوچ راج ءِ دلاں پہ وتی سرڈگار ءِ آجوئی ءُ پہ زورگیر ءَ بیزاری ءِ چراگ انگت ٹمبگ ءَ انت۔
درشان ءِ تہ ءَ دیمتر ءَ گشتگ ئے کہ رستگیں ھالانی رد ءَ کہ اسلامی انکلاب ءَ پد اولی رنداں اصلاح پسند ءُ جوانیں سروکے گچینکاریاں سوبین بوتگ ءُ ایشی ءَ چہ بازیں چیزانی شری ءِ امید دارگ بوھگ ءَ انت بلے ما اے گپ ءَ ابید لیس پلیس ءَ تچک ءَ گشگ لوٹاں کہ ایران بلوچستان ءِ رو ایرنندی بھر ءِ سر ءَ تاگت ءِ زور ءَ زورگیر انت ءُ ھمے پیم ءَ ایران ءِ اندر ءَ کسے اصلاح پسندے یا ترقی پسندے اگدہ دار بیت یا دگہ قدامت پسندے ءُ کٹریں مزھبی بیت، بلوچ راج ءُ ایران ءِ میان ءَ ھستیں زورگیر ءُ زورگیپتی ءِ سیادی وتی جاہ ءَ ھست انت ءُ بلوچ سرڈگار ءِ سرجمیں آجوئی ءَ داں زورگیر ءُ زورگیپتی ءِ سیادی داں ھمے پیم یک ھساب ءَ برجم بیت۔
درشان ءِ تہ ءَ دیمتر ءَ گشتگ ئے کہ زورگیریں ایران ءِ انتظامی بابت ءَ کہ انوں چل ءُ پنچ سال انت پیسر انت کٹریں مزھبی سوچ ءِ ساھگ ءَ انت بلے بلوچ راج ءِ سرا ایرانی زورگیری ءَ سد سال ءَ گیش انت ایشی ءَ چہ اولی رنداں وتگڑیں جمھوریت پسند مھمد مُسدک ءُ پد ءَ سیکیولر پگر داروک رزا شاہ پھلوی ایران ءِ انتظامی سروک بوتگ، بلے راج دپتر شاھد انت بلوچ راج ءُ ایران ءِ گوں ما سیادی ھما وھد ءَ چہ مرچی داں ءُ زورگیری ءِ ھلاسی ءَ داں زورگیپت ءُ زورگیر گشگ بیت ءُ اگاں اے راستی ءَ چہ کسے انکار کنگ بہ لوٹ ایت مرچی ایران ءِ زورگیپتیں بلوچستان ءِ لس مھلوک ءِ سما داری ءِ بہ چار ایت گچینکاری ءِ کساس کم بوتگ انت ءُ بے زاری بلوچ لس مھلوک ءِ سیاسی سما داری ءِ راستیں ترجمانی ءَ کنت بلوچ راج ءِ اندر ءَ سیاسی، دودمانی ءُ مزھبی چکچینی ءُ زلم ءُ زورکیانی دیمپان انت۔
ایشی ءَ چہ ابید میان استمانی ھال سر کنوکاں لوٹیت آ ایران ءِ زورگیپتیں بلوچستان اندر ءَ زورگیریں ایرانی لشکر ءِ دستان بلوچ راج ءِ ھمک روچیں کشت ءُ کوش مالی تنگ دستی ءَ بچار انت آیاں باور بیت ھر کار ءَ بندوکیں بلوچ زلم ءُ زوراکی، ناروائیانی دیمپان انت ھمے پدر بیت کہ بلوچ ءُ ایران ءِ سیادی تھنا زورگیری ئیگ انت۔
جارکش ءَ دیمتر ءَ گشتگ ایران ءِ زورگیپتیں بلوچستان ءِ بلوچاں وتی سیاسی ءُ چاگردی سما داری گیشتر پراہ شاھیگان کنگ ءُ یکجاھیں بلوچستان ءِ آجوئی ءِ ھاترا گام تیز کنگ لوٹ انت بلوچاں وتگڑیں ایرانی گچینکاریاں دزکش ات ءُ منارینت کہ بلوچ راج ءِ جیڑہ ایران ءِ رجیم مٹ بوھگ ءِ جیڑہ ءَ چہ انگت مستریں جیڑھے ءُ ھمے رنگ ءَ بلوچ لس مھلوک ءَ زورگیریں انتظامی حکومت سازی ءِ واستا گچین کنگ ءِ سر ءَ بے زاری درشان کتگ اے باز وشی ءِ گپ انت بلے زورگیپتیں بلوچستان ءِ سرجمیں آجوئی ءِ واستا باز کار کنگ لوٹ ایت۔
درشان ءِ تہ ءَ گشتگ ئے بلوچ راج وتی اندر یکجاہ ءُ یکمشتی ودی بہ کنت دوئیں زورگیرانی(پاکستان ءُ ایران) ءِ ھلاپ ءَ وتی راہ ءَ یک بہ کن انت پرچا کہ بلوچستان یکیں سرڈگار ءُ یکیں ھاک انت چش کہ مارا اوں زورگیریں جتائیں پجار ھاتر نہ کنگی انت ایران ءُ پاکستان دوئیناں چہ بلوچ وتی ماتیں وتن ءِ آجوئی ءُ وتواجھی ءِ واستا وتی سیاسی پگر ءُ عمل گیش ءَ چہ گیش پراہ شاھیگان کنگی انت۔
جارکش ءَ گوشگ انت کہ بلوچ راج اے راستی ءَ چمانی دیم ءَ بہ کنت کہ پاکستان ءُ ایران جتا جتائیں ریاست انت ءُ بلے بلوچستان ءِ زورگیری ءِ جیڑہ ءَ یک ءُ دومی مدت کن انت بلوچ راج وت پرچا پاکستان ءُ ایران ءِ زورگیری ءَ بھر ءُ بانگ انت ما ھمے سرپد بیں بلوچ راج ھستی ءِ مانزمان راجی بنیاتاں وتی اندر ءَ یکجاہ ءُ یکمشتی دیمروئی دیگ ءَ ءُ دوئیں زورگیریں ریاستانی ھلاپ ءَ وتی سیاسی قوت کار بندگ ءُ آجوئی گرگی انت۔
