بلوچستان ءِ آجوئی ءِ راھبند

بَند 20: بامکسدیں جمھوریت ءِ مانزمانی دیگ ءِ یک الّمی ئیں شرتے ایش انت کہ جمھوری چاگردے اڈ دیگ بہ بیت۔ ایشی ءِ تہ ءَ دومی چیزاں ابید آزاتیں ھالرسان ءَ تاکاری، آزاتیں دیوان ءُ گل، اکتساد ءِ برابری ءِ موہ ءُ موکہ، شریں وانگ ءُ زانگ ءُ باز گلّی سیاست انت۔ بامانائیں جمھوریت تنا وھدی روتگ جت نہ کنت دانکہ چاگرد، دود ءُ ربیدگ، سیاست، کانون، اخلاقیات، اکتساد ءُ راجے ءِ چپ ءُ چاگرد زوراکیں تاکتانی دست ءَ بہ بیت۔ اے چیزانی نہ بوھگ ءِ سوْب ءَ جمھوریت ھُشکیں نام ءِ جمھوریت  بیت ءُ اے جمھوریت ءَ پہ ملٹری ءِ زوردستی ءُ کوْزہ گیری ءَ چیر دیگ ءِ ھاترءَ کارمرز کنگ بیت۔

بَند 21: چہ زوراک ءُ زورگپتیں استان ءِ نیمگءَ بلوچ سیاسی بندیگانی بے شرْت ءُ سَلاہ ءَ زوتاں زوت چہ زنداناں آجو کنگ۔

بَند 22: ھواریں راجانی گل، راجی ءُ میان استمانی بنیادمی ھکّانی گلانی نیمگ ءَ یک کمیٹی یے اڈ دیگ بہ بیت کہ بلوچستان ءِ گار ءُ بیگواھیں مردمانی بابت ءَ پٹّ ءُ پول بہ کنت ءُ اے وڑیں ڈوہداریں مردماں انساپ ءِ ھاترءَ میان استمانی آمیدگس ءِ دیم ءَ پیش  بہ کنت۔

بَند 23: جنگ ءُ جیڑھانی گیشوارگ :

ا ) چوشکہ بلوچستان ءِ سرءَ گئیر کانونی کوْزہ کنگ بوتگ ، درھیں کوْزہ گیریں تاکتاں بلوچستان ءَ چہ بے شرت ءَ در کپگی انت۔ اگاں اے وڑ کنگ نہ بوت گڑا اے میان استمانی چاگرد ءِ کانونی ءُ اخلاقی زمہ واری بیت کہ گئیر کانونی ئیں کوْزہ ءَ ھلاس کنگ ءِ ھاترءَ بلوچستان ءِ توکءَ دزمانجنی بہ کنت۔

ب) کوْزہ گیریں تاکتانی در کپگ ءَ رند میان استمانی چاگرد ءَ لوٹیت کہ آ سیمسراں رکگّ ئے ، سیاسی ءُ کانودی ادارھاں اڈ دیگ ءِ ھاترءَ بلوچستان ءِ مدد ءُ کمک ءَ بہ کنت۔

پ) بلوچستان ءِ ادارُکی (عبوری) سرکار 24 ماھانی تہ ءَ لس گچین کاریاں اڈ دنت ءُ سیاسی واک ءُ وت مَستری (اختیار) بلوچ کوم ءِ گچین بوتگیں مردمانی دست ءَ دیگ بیت ۔

بَند 24 : بلوچستان ءِ تہءَ چہ رسانک ءِ سرءَ بندش ھلاس کنگ بہ بیت ءُ زور گپتگیں بلوچستان ءِ کلیں ھند ءُ دمگاں راجی ءُ میان استمانی رسانک، بنیادمی ھکانی گل ءُ کمک رسینوکیں گلاں روگ ءُ رسگ ءِ موہ دیگ بہ بیت ۔

بَند 25: آجوئی ءِ ھاترءَ گھگیریں جنزانی ءُ سلاہ بندیں اڑ ءُ جنجالانی رِدءَ “چارمی جنیواکنونشن” ءِ کانون کہ کوْزہ گیریں استان ءِ بابت ءَ انت، سرجمیں وڑ ءَ کاربند بہ بیت۔