لندن (ہمگام نیوز) پری بلوچستان مومنٹ ءَ جارکش ءَ وتی درشان ءِ تہ ءَ گشتگ کہ زورگیریں ایران ءِ گچینکاریاں بھر نہ زورگ پہ راجی جنز ءَ جوانیں مستاگے کرار داتگ، ھمے بابت ءَ گل ءَ ایران ءِ زورگیپتیں بلوچستان ءِ جاھمنندیں بلوچانی منت گیپتگ کہ آیاں ایرانی گچینکاری بائیکاٹ کتگ ءُ ھوٹانی کچ ءُ کساس کم کتگ۔
جارکش ءَ دیمتر ءَ بلوچ راج ءِ زورگیریں ایران گچینکاری کساس کم کتگ بھر نہ زرتگ ءُ دنیا ءِ دیم پدر کتگ کہ بلوچ راج ایران ءِ زورگیری ءَ کبول کنگ تیار نہ انت آئی گچینکاری ءَ بائیکاٹ کتگ بلوچ راج ءَ سرجمیں دنیا ءَ وتی کلوہ داتگ زورگیریں ایران ءِ گوں ما سیادی بلوچ ءِ رزا نہ انت بلکیں زلم ءُ زوراکی ئے ئیگ انت پرچا کہ زورگیریں ایران ءَ توپک ءُ تاگت ءِ زور ءَ بلوچستان دزگیر کتگ وھدے کہ بلوچاں موہ رستگ آیاں آئی ءِ گچینکاری بائیکاٹ کتگ ءُ وتی کلوہ داتگ کہ زورگیری ءِ ما ھلاپ انت۔
گل ءِ جارکش ءَ بلوچ راج ءَ گوں دزبندی کتگ کہ آ دومی رند ءَ زورگیریں ایرانی گچینکاری بائیکاٹ بہ کن ات کساس ءَ کم ءَ چہ کمتر کنگ ءِ کوشست بہ کن ات بہ منارین ات بلوچ یک جتائیں راجے ءُ بلوچ ءِ جتائیں راجدپتر ءُ پجارے پرچا کہ وتا ایرانی ءُ پاکستانی کرار دیگ بلوچ ءِ جھل جنگ انت ءُ گوں وتی راجدپتر ءُ پجار ءَ ھوار گوں راج ءَ دگاھے کجام اوں گیرت مندیں راج وتی پجار ءَ ارزانی ءَ یل نہ کنت ھمے واستا بلوچ راج اوں زورگیر ءِ گچینکاریاں بائیکاٹ بہ کن انت وتی راجی ھک ءَ اَدا بہ کن انت۔
گڈی ءَ گل ءِ جارکش ءَ گوگل ءَ کارکنوکیں بلوچانی منت گیپتگ کہ آیانی سبب ءَ گوگل ءَ بلوچی زبان اونلائن رجانک ھوار کتگ امیت کنیں کہ آیوکیں وھد ءَ اونلائن رجانک ءِ کار جوان بیت۔
