لندن (ھمگام نیوز) بلوچ آجوئی لوٹوکیں گل پری بلوچستان مومنٹ ءَ وتی شنگ کرتگیں درشان ءِ تہ ءَ گشتگ بلوچ زورگیریں پاکستان ءُ ایران ءِ ھلاپ ءَ بھر ءُ بانگیں بلوچستان ءِ یکجاھی ءَ یکجاھیں بلوچستان ءِ آجوئی ءِ ھاترا جھد برجم انت، وتی جتائیں پجار ءُ آجوئی ءِ ھاترا بلوچ ءَ بے کساس کربانی داتگ انگت یکشل ءَ برجاہ انت اے پیم ءَ اگاں دگہ راجے اے سرپد بیت کہ بلوچ راج ءِ منشا ءُ رزا ءَ ابید کیت سرمایہ کاری کنت پاکستان ءَ گوں ما یکجاھی کار کنت ءُ پہ وت نپ کش ایت اے درستیں ڈیھہ ءُ قوتاں گشگ لوٹیں اے رنگیں ھر پیمیں کار بلوچ ءِ چکچینی ءِ نھاد ءِ بندگ ءِ برابر انت اے رنگیں درستیں تاگتاں بلوچ راج ءِ ھلاپ ءَ بنگیج بوتگیں چکچینی ءُ ھون ریچی ءِ ھاترا گوں پاکستان ءَ گوں یکمشتی سرپد بیں۔
درشان ءِ تہ ءَ دیمتر ءَ گوشتگ ئے دمگ مٹ بوھکیں جاورانی رد ءَ دوستی ءُ دژمنی مٹ بوّگ ءَ انت اے خطہ ءِ ڈیھہ نوکیں دستور جوڑ کنگ ءِ جھد ءُ کوشست کنگ ءَ انت اے رنگ ءَ سھودیہ اربیہ ءُ دگہ بازیں بازیں ملکانی نیمگ ءَ پاکستان ءِ اندر ءَ سرمایہ کاری ءُ دوئیں نیمگاں یک دومی ءِ کمک کنگ ءِ تپاک کتگ گوستگیں روچاں سھودی ءِ سرمایہ کاری ءِ وزیر ایشی ءَ ابید درکارانی وزیر پاکستان ءَ آیگ ءُ آئی گپ ءُ گالانی ھمے سما بیت پاکستان بدل بوّکیں جاوراں نپ چست کنگ ءُ وتی لونجانیں معشیت ءَ کوپگ دیگ ءِ ھاترا بلوچستان ءِ اندر ءَ ھستیں گرانھادیں مڈیاں گشیتریں شریداری ءُ سودا بازی کنت ءُ وتی ( عسکری ءُ اقتصادی) نپاں پورا کنگ لوٹ ایت اے رد ءَ سھودی دلگوش گور کنگ ءِ درشان بلوچ راج ءِ ھاترا بے کساس جیڑگ ءِ گپ انت ما ھچبر اے نہ لوٹیں دگہ راجے بلوچ راج ءِ نپانی ھلاپ ءَ پاکستان ءُ ایران گوں ما بلوچ ءِ مال ءُ مڈیانی لٹ ءُ پل ھمکوپگ بہ بیت۔
دومی نیمگ ءَ زورگیریں ایرانی سر وزیر ابراھیم رئیسی ءَ اے ھند کش ءُ چیلانی سبب ءَ دومی زورگیر پاکستان ءَ اتکگ ایشی ءَ چہ ھمے گمان انت گندگ بوّگ ءَ انت دوئیں زورگیر بلوچ راج ءِ ھلاپ ءَ وتی (عسکری) ءُ مالی تپاکی دیم ءَ برگ ءَ بلوچ راج ءِ چکچینی ءَ پہ گیشی آرگ ءُ یکمشتی ءِ بنیات ءَ دیم ءَ جنز انت، زورگیریں ایران یک نیمگے وت بلوچ ءِ چکچینی ءَ جوانی ءَ ھوار انت دومی نیمگ ءَ پاکستان ءَ گوں مالی ءُ عسکری نزیکی کنگ ءِ ھواری ءَ گوست ءِ وڑ ءَ دوئیں زورگیر ھوار بنت بلوچ ءَ تاوان دیگ ءِ کوشست کن انت باز رنداں اے دوئیں زورگیراں ایران ءُ پاکستان ءِ میان ءَ ھشت نکاتی کول ءُ کرارے بوتگ گمان ھمیش انت اے کول ءُ کرار بلوچ ءِ نپانی ھلاپ ءَ انت ءُ بلوچ دژمنی ءَ گوں بندوک انت ایشی ءَ چہ ابید ایران ءُ سھودی وت ماں وتی گر ءُ چیل ءُ نپانی جنگ نوں بلوچ ءِ سرزمین ءِ سر ءَ کنگ ءِ واھشت پدر کنگ بوھگ ءَ انت پاکستان اوں ھمے لوٹ ایت، بلوچ راجی جھد ءَ دومیانی پراکسی منارینگ ءِ واستا ایران ءُ سھودی ءَ زوریت بلوچستان ءِ سرڈگار ءَ بلوچاں ٹولیانی تہ ءَ بھر بہ کنت ءُ کارمرز بہ کنت۔
بیان ءِ تہ ءَ دیمتر گوشتگ ئے کہ سھودی اربیہ یا کجام ملکے پاکستانی پنجاب ءَ ھرکجا سرمایہ کاری ءُ کاروبار کنت ایشی ءَ پہ بلوچاں ھچ انکار نیست، بلے ما دنیا ءَ تچکیں گالاں گوں گشگ لوٹیں بلوچستان پاکستان ءِ بھر نہ انت بلکیں بلوچستان پاکستان ءِ زورگیپتیں ھندے بلے اے زورگیری اول روچ داں انوں بلوچ ءَ نہ کہ مّن اتگ ءُ نا کہ ھاموش بوتگ بلوچ ءَ گلامی ءِ بنداتی روچ ءَ گھگیری کتگ ءُ دنیا ءِ دیم ءَ تچک کتگ کہ بلوچستان ءُ پاکستان جتائیں ھستی انت ءُ کسے ءَ کہ پاکستان ءَ گوں ھمتوار بوتگ ءُ پاکستان ءِ ھمراداری کنت بلوچ آئی ھلاپ ءَ گھگیری ءِ ھک ھست انت پرچا کہ یک نیمگے بلوچستان ءِ راجی مڈیانی لُٹ ءُ پل زمین ءِ چیر ءِ مال ءُ مڈیانی بھیپار ءَ بلوچ راج ءَ ابرمی ءُ مالی ھچ وڑیں نپ نہ رس ایت دومی نیمگ ءَ اے پیمیں درستیں سرمایہ کاریاں چہ رستگیں درستیں زراں پاکستان ءِ زورگیریں ریاست پد ءَ بلوچ راج ءِ چکچینی ءَ پہ کارمرز کنت چش کہ بلوچ راج اجتماعی نپانی ھاترا مزنیں تاوانے۔
درشان ءِ تہ ءَ دیمتر ءَ گشتگ ئے سھودی اربیہ ءُ ایدگہ ھلیجی ملکاں اے دمگ ءِ تہ ءَ وتی سیاسی مکسدانی پورا کنگ ءِ ھاترا بلوچستان ءَ سرمایہ کاری ءِ نام ءِ سرا گوادر ءُ ایدگہ جاھاں نند انت ءُ وتی ملکانی پھریزگ ءَ پہ جنگ کنگ لوٹ انت، بلوچ اے رنگیں رپکانی ھلاپ انت سھودیہ اربیہ ءُ ایدگہ درستیں ملکاں کُڈن کنیں کہ چو چین ءِ وڑا اے ھنداں وتا پھر ءُ شاھیگان کنگ ءِ رپک کارمرز کنگ ءُ بلوچ راجی آجوئی واستا بوّکیں سیاسی گھگیری ھلاپ ءَ ھچبر پاکستان ءِ ھمراہ مہ بنت بلوچ ءِ ھوناں وتی دست ءُ دامن ءَ داگ دار مہ کن انت۔
انچو کہ مرچی پلستین ءِ جیڑہ ءَ درستیں ارب دنیا یورپ ءِ کمک ءُ اسرائیل ءَ سرمایہ کاری ءَ ایرجنگ ءَ انت ءُ یک نیمگے اود ءَ لس چک ءُ جنیناں کشگ ءُ نشانگ جوڑ کنگ ءَ انت دومی نیمگ ءَ یورپی ڈیھہ اسرائیل ءِ مالی ءُ عسکری کمک کنگ ءَ انت بے پرواھی ءُ مناپکی کنگ ءَ انت وتی کاروبار ءَ پہ ھمے جنگ ءِ بھر انت ھمے رنگ ءَ پد ءَ بلوچ اوں جیڑیت یک نیمگے زورگیریں قوت بلوچ بلوچ ءِ چکچینی ءَ دزگٹ انت، بلوچ ءَ تاگت ءِ زور ءَ گلام دارگ ءِ واستا گوستگیں ھپتاد ءُ شش سال بلوچانی کوش ءَ ھوار انت ءُ دومی نیمگ ءَ سھودی ارب ءُ دگہ ھلیجی ملک پاکستان ءِ زورگیتپیں بلوچستان ءِ مال ءُ مڈیانی لٹ ءُ پل ءَ پاکستان ءِ لونجانیں معشیت ءَ کوپگ دے انت وتی بے پرواھی سابتی ءَ دے انت ءُ بلوچ راج ءِ چکچینی ءَ پاکستان ءِ ھمراھداری ءَ پہ کرد پیش دار انت۔
اے کار تچک ءُ ساپیں رنگے ءَ دو دیمی ءَ پدر کنت اود ءَ یک نیمگے ارب ڈیھہ پہ پلستین گُر انت ءُ گریو انت ءُ پد ءَ دومی ڈیھانی پالیساں بے پرواھی ءُ مناپکی کرار دے انت بلے پد ءَ وت زورگیپتیں بلوچستان ءَ اندر ءَ یک انچیں زورگیرے ءِ ھمراھداری ءَ کنگ ءَ انت چش کہ آ وت بلوچ ءِ ھستی ءِ ھلاس کنگ ءِ رند ءَ انت۔