ہمگام بلوچی نبشتانک (چارمی بہر)
انچو کہ من پیشءَ نبشتگ ات کہ پسنیءِ مردمانءَ چست کنئگ ءُ زرّ گِرگ بوتگ۔ آیانی کہول ءِ مردم اینچو سال گوزگا پد انگت ہساب ءُ کتاب کنگ ءُ گوں مئے آزادی پسند سیاسی ءُ سِلاہ بندیں سروکاں نندگ ءُ سُہل ءُ تران ءُ گپ کنگا تیار اَنت، ہمے وڑا ہما وہدءَ ہم اے ویل ءُ ہمے وڑیں دگہ ویلانی سرا شہید کمبر مبارکءَ ہم ایکشن زورگءِ جہد کتگ، پدا آئیءِ آسر چے بوت کمبر مبارکءِ جند شہید کنئگ بوت۔
شہید کمبر مبارکءَ چہ ڈائسپوراءِ سنگتاں ہساب کتاب لوٹئتگ ءُ گلءِ تہا ہم بازیں جیڑہانی سرا ایراد گپتگ ءُ جیڑہانی گیشّ ءُ گیوّارءِ لوٹ کتگ۔
ہمے جیڑہانی سوَبءَ شہید کمبر مبارک ءُ خلیل موسٰیءِ نیامءَ مزنیں اختلافے ودی بوتگ ءُ شہید کمبر مبارکءَ گشتگ کہ پسنیءِ ہمے مردمانی چست کنئگ ءُ زر گِرگ ءُ دگہ بازیں مسلہاں توء خلیل موسٰی مئے جوابدہ ئے ءُ من ترا اے وڑ کنگا نیلاں کہ تو گلءِ سروکے ئے ءُ گَلءِ نامءِ سرا ھریگ ءُ اپسیگ کنگائے
اے گپاں دیر نہ گوستگ ات کہ کمبر مبارک شہید کنگ بوت۔
بی ایل ایفءَ بیان دات کہ کمبر مبارک عرف علی جان چیریں مشنےءِ دورانءَ شہید کنئگ بوتگ ءُ آ ڈیتھ اسکواڑءِ مردماں شہید کتگ۔
پدا شہید کمبر ویلءِ مستریں گواہ کہ اے ویلءِ رازءَ سرپد اتنت، یکے بی ایل ایفءِ وتی کماندار وارث فوجی ءُ دومی آئیءِ برات لیاقت ات۔
اے دوئیں برات ہم جنائینگ بوت انت ءُ پدا بی ایل ایفءَ بیان دات کہ اے مئے مردم بوتگ انت، بلئے اشاں کمبر مبارک شہید کتگ ما پمیشکا اے جتگ انت۔
دو متضادیں بیان “آن دی ریکارڑ” موجود انت، اولی بیانءِ تہا کمبرمبارک خفیہ مشنءِ نیام ءَ ڈیتھ اسکواڑءِ مردماں شہید کتگ، دومی بیانءِ تہا بی ایل ایفءِ وتی مردماں جتگ۔
برھال شہید کمبر مبارک لیاقتءَ جتگ ات، چیا جتگ ئِے؟
چون جتگ ئِے؟
کیا پرماتگ؟
اے ویلءَ کئی کئی دست ہوار اِنت؟
درستیں گپ چیر ءُ اندر کنگ بوتنت، ہچ گپ دیما آرگ نہ بوت۔ لیاقت ءُ وارث کُشگ ءُ سبوت گار کنگ بوت انت۔
وارث فوجی شریں فکری سنگت ءُ جْوانیں کماندارے ات، وہدیکہ آئیءِ برات شہید کمبرءَ جنت آ وتی براتءَ وت گیپت ءُ گل ءِ حوالہءَ کنت کہ گَل وت پَٹ ءُ پول ءُ جست ءُ پُرس بکنت ے کہ آئیءَ کمبر چیا شہید کتگ، کسےءَ پرماتگ یا دگہ وجہے بوتگ؟ چرے پَٹ ءُ پولءَ آئیءَ گَل بکنت ءُ فیصلہےءَ سر بہ بیت۔
چیزے وہدءَ بی ایل ایف لیاقتءَ وتی کرّا داریت ءُ پدا یل دنت۔ لیاقتءِ دماغی جاور شر نہ بنت، کراچیءَ را دئیگ بیت علاجءِ واستہ، پدا واتر کنت علاقہءَ، بلئے انگت آ زہنی نادراہ بیت۔
ہمے نیامءَ یک روچے بی ایل ایفءِ سرمچار وتی کماندار وارث فوجیءَ تیرگواری کننت ءُ کُشنت۔ بی ایل ایف بیان دنت کہ وارث مئے سنگت بوتگ، بلئے سرکاری مردماں گوں ڈیل کتگ ے ءُ کمبر مبارکءِ شہیدیءَ دست ے مان بوتگ، پمیشکا ما جتگ۔
پدا چیزے وہد نہ گوزیت لیاقتءَ ہم جننت ءُ دور دیئمنت کہ کمبر شہیدءِ کُشندہ انت ما جتگ۔ ہمے بی ایل ایف دوئیں براتانی کوشءِ زمہءَ زوریت، بلئے اشانی جنوک خلیل موسٰیءِ نزیکیں کمانڈرے بیت کہ رندا یورپءَ فرار بیت ءُ انگت ہمودا آرامیں زندے گوازینگا اِنت، آ دگہ گپّے کہ آئیءِ ملکءِ اکاؤنٹءَ چینچو زرّ ماں بلوچانی چست کنئگءِ ونڈ اَنت کہ رستگ اَنت ے۔
1 فروری 2019ءَ زامرانءِ دمگ عبدالحق ئی کلّگءَ لہتے پرومءِ مردم کہ آیانی منشیاتءِ لوڑیں گاڑیاں بی ایل ایفءِ سرمچار دارنت کہ مالاں بدی اِت، اے انکار کننت، سرمچار گڑا اشانی سرا تیرگواری کننت، چار مردم جنئگ بیت، شہدادء بہرام، نوازء نزر، مصطفٰی ءُ رحمدل اے ہمے جاگہءَ بیران بنت۔
پدا چمے ہنکینءَ کمو پشت سرمچارانی مردم کُشتگیں مردمانی مردمے گِرنت ءُ ہمے جاگہءَ کارنت آئیءِ نام ڈاکٹر اسماعیلء گلام محمد انت، بزگیں اسماعیل ءَ اے ویل ءِ جاہ ءَ دور گِرنت ءُ کارنت ہمدا ہمے مردمانی کِرّا گِرّاں چیلّ کننت ازیت کننت کُشنت ءُ دور دیئنت گوں۔
آ مردم کہ مال نہ داتگ شما کُشت ءُ دور داتنت مال دست گپت انت گڑا اسماعیل شما بزگ وسرا چیا کُشت ءُ دور دات گوں۔؟
ادا پرومیانی 5 مردم کُشگ ءُ دور دئیگ بیت ءُ منشیاتءِ بارءَ سرمچار زورنت ءُ در کاینت۔
نوں ادا 5 مردمءِ مپتء ناھکءَ کُشگ ءُ دور دئیگ، اے تہنا 5 مردم ناں 5 لوگ ءُ یک مزنیں کہولےءَ گوں وسرا یک مزنیں دژمنی یےءِ زورگ اِنت گوں وتی دوزواہیں بلوچ مہلوکءَ بس پہ منشیاتءِ برگءِ واستہ۔ اشاں ترا دگہ تاوانے نہ داتگ، تئی چاریگی نہ کتگ تئی دگہ دژمنی نہ کتگ، پہ چار کلدارءَ وتی براتءَ بُکُش ءُ بے دردی بجن ءُ دور دئے، اے کجام راجی آجوئی ءِ جنگءِ شور بندی اِنت؟
اے ویلءِ دْرچ چِداں ہلاس نہ بیت، پدا چیزے وہدءَ پد ہمے دمگءِ بی ایل ایفءِ کماندار فضل شیرءِ برات خان بلوچ جنئگ بیت۔ انچو گشنت کہ کماندارءِ برات ہمے ویلءِ ردعملءَ جنئگ بوتگ۔
خانءِ ویلءَ پد عبدالغفور جنئگ بیت کہ ہمے 5ئیں مردم کہ منشیاتءِ سرا پاٹیءَ جتگ اتنت ہمے جتگینانی تہا شاہ دادءِ برات اِنت ءُ بی ایل ایف عبدالغفورءِ جنئگءِ زمہ واریءَ زوریت کہ ما کُشتگ، اے چاریگے بوتگ ءُ سرکار ءِ ڈیتھ اسکواڑءَ گون بوتگ۔ بلئے مردمانی گشگ ہمیش انت کہ فضل شیر ءِ برات ءِ بیر ءَ ردعمل ءَ جنئگ بوتگ۔
ہمے وڑا سرمچارانی مردم ءُ اے کُشتگیں مردمانی میانءَ ہمے جنگ روان بوت۔
راجی جنگءِ پاسدارانی ہمے جنگ زاتی جنگءِ دروشمءَ مَٹّ بوت، دوئیں نیمگاں تاوان پہ بلوچءَ۔
اے ھاندان دوئیں نیمگاں تاوان بار بوت۔ یکے سرکار ءُ دومی سرمچار۔
سرکارءَ ہم اے ھاندانءِ مردم شہید کتگ انت۔ شہید ماسٹر ستار کہ اے ھاندانءِ سربراہ ءُ سروکیں مردمے ات گوں ہمراہاں سرکارءَ جت ءُ شہید کت۔ شہید ماسٹر ستارءِ دوئیں زامات شاہ داد ءُ عبدالغفور سرمچاراں جت انت ءُ شہیدءِ دوئیں گہار جنوزام ءُ چُک چورہ کت انت۔
دومی تاوان ہمے ویلءَ پد اے کہولءِ لہتے سنگتءَ وتی سِلاہ گَلءَ واتر کتگ انت کہ شما راجی جنگءَ رد کارمرز کنگا اِت ءُ مئے وتی مردماں بیگناہءَ بے دردیءَ جنئگا اِت، گڑا ما وتی جندءِ مردمانی ءُ بیگناہیں بلوچانی کُشگءَ گوں شما ہمراہداری کت نہ کنیں، دگہ چمے کہولءِ نیمگا راجی جنگءِ کمک کار ءُ دوزواہیں سنگتاں ہم وتی دست کشّئتگ ءُ جتا بوتگ انت کہ شما مئے جندءَ جنئگا اِت، گڑا ما گوں شما ہچ وڑا ہمراہداری کت نہ کنیں۔
