لندن: (ھمگام نیوز) پری بلوچستان مومنٹ ءَ وتی شنگ کرتگیں درشان ءِ تہ ءَ گشتگ کہ زورگیریں پاکستان ءِ گوستگیں سر وزیر، پاکستانی لشکر ءِ کمک ءَ ھپتاد ءِ دھک ءَ بلوچ ءِ چکچینی کنوک پیپلز پارٹی ءِ بنشت ءِ ایرکنوک بھٹو ءَ پاکستان ءِ تگڑیں آمیدگس ءِ نیمگ ءَ نوکیں پیسلہ ءِ رد ءَ کہ آئی ءَ را بے میار ءَ مرگ ءِ سزا دیگ بوتگ۔
درشان ءِ تہ ءَ دیمتر گشت ئے کہ بھٹو ءَ را بلوچ راج ءِ چکچینی ءِ ھاتر کارمرز کتگ ءُ رند ءَ بھٹو ءُ پوج ءِ وت ماں وتی گر ءُ چیلانی سبب ءَ گیپتگ پاھو داتگ اِش، زورگیریں پاکستان ءِ وتگڑیں آمیدگساں پہ بہ گند ئے بھٹو بے میارے بلے پہ بلوچ چکچینی ءِ سزا ءَ بھٹو ءَ دہ ھزار رنداں پاھو دیگ بہ بوتیں کم اَت-
یات بہ بیت نوزدہ سد ءُ ھپتاد ءُ سے ءَ بلوچستان ءِ تہ ءَ زورگیریں پاکستانی لشکر ءَ بلوچ ءِ چکچینی ءَ بے کساس تاگت کارمرز کتگ، اپریل نوزدہ سد ءُ ھپتاد سے ءَ زورگیریں پاکستانی لشکر ءَ ملی ءِ ھند ءَ بلوچ ءِ ھون ریتکگ، ایشی ءَ پد ھپتاد سالی کماش لونگ ھان گوں وتی ھمراھاں شھید کنگ بوتیں ایشی ءَ پد راجی گھگیری ءِ ھلاس کنگ واستا سراوان ءُ جھالاوان ءَ داں مری دمگاں بہ گر داں کوہ سلیمان ءَ بازیں ھنداں پاکستانی زورگیریں لشکر ءَ ھون ریچی یکشلا برجاہ داشت۔
راجی گھگیری ءِ تہ ءَ گیشی ءِ گندگ آیگ ءَ پد آئی کساس یک سالے پد جولائی نوزدہ ءُ ھپتاد ءُ چار ءَ زورگیریں پاکستانی لشکر ءَ A-H 1 ھیوی کوبرا بالی پِرکانی (ھیلی کاپٹر) کمک ءَ چمالنگ ءِ بازیں ھنداں بمب گواری بندات کت ایشی ءِ آسر ءَ دھ ھزار بلوچ پیر، ورنا کسانیں زھگ ءُ جنین شھید کنگ ءِ ھواری ھزارانی کساس مردماناں ھوار جتگ ءُ چیریں جاھاں بندیگ کتگ آیاں گوں ھما ناروائی کنگ بوت کہ گوں انسانان کس چش نہ کنت پد ءَ آیاناں شھید کنگ بوت، مردمانی گشگ انت چمالنگ ءِ بازیں ھند ءُ دمگاں ھشت ھزار بلوچ ءَ گیش آوار جنگ ءُ بیگواہ کنگ بوتگ انت آھانی انوں داں کسے ءَ سرپدی نیست باریں آیانی لاشاں گوں چے کنگ بوتگ۔
یات بہ بیت پاکستانی زورگیریں لشکر آ وھد ءِ سر وزیر بھٹو ءُ رزا شاہ پھلوی ءِ بنکی رھبند یک بوتگ چمالنگ ءَ بمب گواری ءُ بلوچ چکچینی ءِ ھاترا زورگیپیں ایران ءَ نا تھنا کوبرا ھیلی کاپٹر داتگ بلکیں زورگیریں ایران ءِ جنگی جھازانی ھواری پائلٹ اوں گوں بوتگ انت زورگیریں پاکستان ءَ زوگیریں ایران ءِ ھیلی کاپٹرانی ھواری ءَ پائلٹانی اوں کمک گوں بوتگ، چکچینی امنچو بیمانک بوتگ کہ زوگیریں لشکر چار جاہ ءَ بھر بوتگ ڈیرہ گازی ھان داں سبی ءُ دادو تاں نوشکی اے درائیں ھند لشکر ءَ انگیر ءَ کتگ انت ترندی ءَ گوں زورگیریں لشکر ءَ وتی کار آسر کتگ، چمالنگ ءَ بلوچ چکچینی ءُ بلوچ راج ءِ ھستی ھلاس کنگ ءَ مرچی داں دوئیں زورگیر ایران ءُ پاکستان ءِ ھواری بوتگیں زوراکیانی یاتاں نوک کنت گوست ءَ بہ گر داں انوں ایران ءُ پاکستان بلوچ ءِ چکچینی ءَ یک دومی ءِ کمک ءَ بلوچ ءِ راجی پجار ءُ زندمان ءِ ھلاس کنگ ءِ جھد ءَ انت۔
دومی نیمگ ءَ بلوچستان ءِ وتگڑیں اسمبلی ءَ زورگیریں پاکستان ءِ لشکر ءِ گچین کتگیں باسک ھد ءَ چہ گیش وپاداری کنگ ءِ جھد ءَ انت بھٹو ءَ راجی ھیرو یے درجہ دیگ ءِ کراردادے پاس کرتگ بلے وٹگڑیں بے آپانی گپاں ابید بھٹو ءَ بلوچ راج، بلوچ ءِ چکچینی کنوک ءُ وتی کاتل پھمیت، اے درائیں دلاراں کرون ازم ءِ بنیاد ءَ پارلیمنٹ ءَ آرگ بوتگیں مردمانی درور ھمیش انت چش کہ سکندر آزم ءَ ایران ءَ داریوش سیمی ءَ را ھمے گشت ءُ مرگ ءِ سزا دات کہ ” تو داریوش ءَ گوں وپادار نہ بوتگ ئے گڑا تو یک مقدونین ءِ بادشاھے ءِ چتو وپادار بوت کن ئے” پد ءَ ھمے پیم ءَ لھتیں بھاڑائی بلوچ دلار بے آپاں بلوچ ءِ کارمرز کنت ءُ بے سر ءُ سامانی ءَ چگل دنت ئے اِش، بلے اے وتگڑیں بلوچ انت ءُ بلوچ ءِ چکچینی ءَ کنوکانی ھواری ءَ پاکستانی لشکر ءِ ھمدرد انت زانگ بیت ایشاں چہ راجدپتر سبک نہ زرتگ، ھما راجدپتر ءَ سرگوز کن انت آیاں راجدپتر بدیں کرداراں گوں یات کنت۔
درشان ءِ تہ ءَ گوشت ئے کہ پاکستانی آمیدگس آں زورگیریں لشکر ءِ کمک ءَ پیپلز پارٹی ءِ وش کنگ ءُ وتی بنزہ ءِ رکینگ ءِ ھاترا بلوچ چکچینی ءِ مستریں کارست بھٹو ءَ بے میار گش ایت ایشی ءَ ھواری ءَ یک برے پد ءَ پیپلز پارٹی ءِ نیمگ ءَ لشکر ءِ کاسگ لیس سرپراز بگٹی ءَ بلوچستان ءِ سرا مُشتگ چش کہ پیپلز پارٹی ءُ لشکر ءِ ھواری ءَ نا تھنا بلوچ ءِ چکچینی ءَ برجم داریت بلکیں ایشی ءَ چہ گیشتر بلوچ ءِ چکچینی ءِ تہ ءَ گیشی آرگ ءِ واستا باڈھائی مردماں دیم ءَ کاریت کہ وتی پالیسی ءَ آسرے ءَ داں سر بہ کنت ءُ دومی نیمگ ءَ بلوچستان ءِ سرڈگار ءِ سرا ھستیں مڈیانی لٹ ءُ پل ءِ تہ ءَ گیشی آرگ بیت۔