جــوانـیــں مردم چـونـیـن انـت ؟

ترینوک : کریم بلوچ

« نفسیات » زانت یا « روانشناس » گوئشیت : جاندراهیں مردم هما انت که گوں وتی چاگرد ءِ مردماں ، مدام جنجال نه کنگ انت ، بلکیں وتی چاگرد ءِ مردمانی دل وشی و جهدکاری ءِ سوب بینت ! گیش چه کچه و ئیب گرگ ءَ ، هر جهدکار ءِ جهد ءِ ستای ءَ کننت و ساڑاینت ! گیش چه ئیب گندی ءَ ، کارانی جوانی ءِ نیمگ ءَ گیشتر دلگوش دینت ! گیش چه وت گلایی ، مردمانی دیما آهانی جوانیانی منوگر و ستا کنوک بینت ! گیش چه ایشی که وت ءَ پیش دارنت ، جهد ءَ کننت که درستانی جهداں به ساڑاینت و وتی جهد ءَ آهانی جهد ءِ یک بهرے به زاننت ! جوانیں و جاندراهیں مردمانی کش ءَ ، ایدگه مردماں ، وتی جوانیاں گهتر دیست و مارست کن انت ! جاندراه و جوانیں مردماں جوانیانی نیمگ ءَ گیشتر دلگوش کن انت و مدام آهانی باره ءَ هبر کن انت ! جوانیں و جاندراهیں مردم دیوان داریں مردم انت و گوں وتی گوئشکند و جوانیں هبراں ، مردمانی دلوشی و تپاکی ءِ سوب بینت ! جوانیں مردم هما انت که تو آئی ءَ گندئے ، آئی ءِ تها دوتل و دوپوستی نیست و وتی گپ ءَ هما دمان ءَ گوں شیرکنی ترا گوئشیت ! وتی سسا و پگر ءَ جوانی ءَ کاربست کنت . مردمانی ازت ءَ کنت . شما آئی ءِ سرا باور کرت کنیت . آئی ءِ کش ءَ شما وت ءَ ایمن مارگ ایت ! جوانیں و جوڑیں مردم ءَ گلایگ پکار نه انت ، هر دمانے ءَ نه ٹگلیت و بدل نه بیت . باپاری و سودا کنئگ ءِ راه و رهبنداں مان نه بیت ! جوانیں و جوڑیں مردم هما انت که گوں وتی کِرد ءَ شما را ایمنی ءِ مارشت دات کنت . آئی ءِ کش ءَ شما وتی لائکی و جوانی ءَ گهتر سرپد بئیت . هما جوانیاں که ایدگرانی کش ءَ گندگ نه بیگ انت ! شما جوانیں مردمانی کش ءَ ، وتی وَس و توان ءَ گهتر سرپد بئیت ! چشیں و اے دابیں مردماں لائک انت مئے زندمان ءِ بهرے ءَ جاگه دیگ به بنت !