نبشتہ کار: کریم بلوچ
ھمگام بلوچی
ناکو قدیر و آئی ءِ همراهاں چیا 5154 روچ شالکوٹ ( کویٹه ) ءِ هال نبیسی اداره ءِ دیما زهر شانی ءَ نشتگ انت ؟
مرچی 5154 روچ انت که بلوچ جهدکار واجه ناکو قدیر بلوچ ءِ همراهی ءَ بلوچستان ءِ شالکوٹ ءِ « هال نبیسی » اداره ءِ دیمپدیم ءَ ، وتی گار کتگیں مردمانی شوهاز ءَ که پاکستان ءِ چاریگی ادارهاں دزتگ و برتگ و بیگواه کتگ انت ؛ زَهر شانی ءَ نشتگ انت.
5154 روچ ! بلے گوئش ئے هم پاکستان ءِ سرکار و هم آئی ءِ هون واریں جرنیل و کرنیل و چمچهاں کَرّ و گوش اش سیه چُپت و چمان اش کور و بے میم انت۔
جهان ءِ ڈمکراسی ءِ پوتار کنوکاں هم گوئش ئے کور و کر و پهک مرتگ و بیگواه بیتگ انت که بلوچانی درداں نه مارگ انت و ناکو قدیر و ایدگه بلوچ زهرشانیں بلوچاں که ماں شالکوٹ ءِ هال نبیسی اداره ءِ دیمپدیم ءَ نشتگ انت نه گند انت و چه رستریں و انسان دژمنیں پاکستان نه لوٹگ انت که اے کشت و کوش و مردمانی دزگ و بیگواه کنگاں بَند به کنت۔
باز بژنی گپے که جهان ءِ دولت و هاکتاکاں پاکستان و ایران ءِ بلوچ کشیاں ایر نه جنگ انت و بلوچانی درداں نه نبیسگ انت . بلے بلوچ ورنا وت جهد بکن انت که یکدست تر به بنت ، تاں وتی راج ءِ هالاں جهان ءَ سر کت بکن انت !
ناکو قدیر و آئی ءِ همراهاں چیا 5154 روچ شالکوٹ ( کویٹه ) ءِ هال نبیسی اداره ءِ دیما زهر شانی ءَ نشتگ انت ؟
