برلن (ہمگام حال) فری بلوچستان موومنٹ ءِ ڈنّی ڈیپارٹمنٹ ءِ سربراہ عبید بلوچ ءِ پاگواجہی ءَ گوستگیں روچ ءَ جرمنی برانچ ءِ آرگنائزنگ مجلس اڑ دیئگ بوتگ۔
یات بہ بیت کہ چد ءُ پیسر ادارُکی دروشم ءَ کم وہد ءِ واستہ سنگت بھزاد بلوچ ءَ جرمنی چیپٹر ءِ ادارُکی آرگنائزر ءِ ذمہ واری دیئگ بوتگ ات۔ گوستگیں روچ ءَ گَل ءِ دیوان لوٹاہینگ بوت ءُ جرمنی برانچ ءِ نوکیں کابینہ ءِ گچینکاری کنئگ بوت انت کہ چہ اشی ءِ آسر ءَ اشفاق بلوچ بے مقابلہ ءَ آرگنائزر گچین کنئگ بوت ءُ کمیونیکیشن آفیسر ءِ واستہ عجیپ بلوچ وہدیکہ محمد علی بلوچ پریس آفیسر ءِ واستہ بے مقابلہ گچین کنئگ بوت انت۔
نوکیں آرگنائزنگ مجلس ءَ اے مسام کت کہ آ فری بلوچستان موومنٹ جرمنی برانچ ءُ گَل ءِ مقصد ءَ پارٹی رھبند ءِ چیردستی ءَ دیما بران ءَ متحدہ بلوچستان ءِ چہ زورگیرانی دست ءَ آجوئی ءِ واستہ وتی جہد ءَ شریں وڑے ءَ دیمروی بدی انت۔ نوکیں آرگنائزر اشفاق بلوچ ءَ اے دگہ باسکاں گوں وتی حیالاں درشان کنان ءَ گشت کہ آ گَل ءَ دیمروی ءُ بلوچ راجی جنز ءِ واستہ میان استمانی تَک ءَ وتی ذمہ واریاں شرّیں وڑے ءَ پیلو کن انت۔ ءُ گشت ئِے کہ بلوچ راجی جنز ءَ سوبین کنئگ ءِ واستہ الّمی انت کہ گَل ءِ باسک پاکستان ءُ ایران ءَ ہوار دمگ ءِ مَٹّ بوتگیں جیو پالیٹیکس ءُ تزویراتی بدلیانی سر ءَ وتی نگاہ ءَ ایر بکن اَنت ءُ ہمے سرجمیں سیاسی ءُ معاشی کشّاں چیلّاں بلوچستان ءِ آجوئی جنز ءِ دیدانک ءَ بچار اَنت۔ تاں کہ کارکنوک شریں وڑے ءَ دمگ ءِ بوتگیں جاورالاں سرپد بہ بنت۔
