ھمگام بلوچی
دومی بَھر
دنیا ءِ تہ ءَ ھچ ادیب وتی زاتی جیڑھاں گوں ادب ءَ ھمگرنچ نہ کن اَنت بلے مئے ادب ءِ اے مستریں بھر انت کہ ھرکس وتی زاتی جیڑھاں گوں ادب ءَ ھمگرنچ کن اَنت ۔ اد ءَ درست بوتنّی زانتکار اَنت ھر کسی جھد ھمیش انت کہ منی کتاب باز بہ بنت ادب ءُ راجدپتر وتی ءَ وت بزانت ھرچی ما گُشیں، نبشتہ کنیں ءُ مردم واہ واہ کن اَنت ءُ شاباشی دئے اَنت ءُ استاد ءُ زانتکار ءِ پنام ءَ دئے اَنت ھرکس پہ وت ءُ دیم ھچ پٹ پول کنگ نہ لوٹ ایت بس کتاب سرجم بہ بیت ءُ کتابی واھُنندے بہ باں پدا اکیڈمی ءُ ادراھاں ھم کتاباں نہ چار انت نہ ٹپاس انت پرچا کہ واجھانی دلدوستیں مردمانی کتاب انت ۔ ھمے وڑا بلوچی اکیڈمی کوئٹہ ءَ یک کتابے چاپ ءُ شنگ کرتگ ۔کتاب نام۔ *بلوچ* ٹک ءُ کٹم چاپ 2019 پولکار واجہ بالاچ حمید نور to the living legends and for those who know who they are and where they Belong جان محمد دشتی کتاب ءِ دومی تاکدیم ءَ واجہ بالاچ حمید ءَ نبشتہ کرتگ اے کتاب ءِ تہ ءَ سرجمیں بلوچ ٹک ءُ کٹمانی نام انچوش پہ وتگڑی نبشتہ کرتگ انت پہ دَرور تاکدیم 17 “ٹک ھوت ” ھوت ءِ کلیں کٹم 5 انت ۔ 1 ھوت، 2 ھنانی۔3 ھوتکانی، 4 نوھکانی، 5 چزانی۔ واجہ بالاچ حمید ءَ ھوتانی کلیں کٹم پنچ کرتگ انت آ ھم ھنچیں نام داتگ انت کہ ایشانی وجود نیست انت ابید چہ ھوت ءِ جند ءَ اے مزنیں ٹک کہ بلوچستان ءِ سیمی ٹک لیکگ بیت واجہ بالاچ حمید ءَ بس پنچ وتگڑیں کٹم آرتگ ھمے تاکدیم ءَ دگہ یک ٹکے نام آرتگ ئِے *سامی* ۔ سامی ءِ ھم پنچ کٹم کرتگ انت ئِے تاکدیم 16 ءَ ٹک مِید، مید ءِ کساس 50 کٹم ءِ نام آرتگ واجہ ءَ ۔ جاشک ءَ بہ گر دانکہ سندھ ءَ سجاول ءَ برو اے 50 ایں کٹمانی تہ ءَ بس لھتے یے نام ھست گیشتر وتگڑیں نام انت سیمی مستریں ءُ سیاھیں دروگ،تاکدیم 19 ٹک *جدگال*کٹم 50 انت واجہ بالاچ ھمید ءَ بزنجو، سیاہ پاد، سوپک، اُمرانی، اے جدگال ءِ ٹک ءَ ھوار کرتگ انت ءُ واجہ جان محمد دشتی ءَ اے ایشانی تسدیک ھم کرتگ کہ بزنجو، سیاہ پاد سوپک اُمرانی اے درست جدگال انت۔
گوستگیں بھرانی تہ ءَ واجہ بالاچ ھمید نور ءِ کتاب ۔بلوچ ٹک ءُ کٹم ءِ بابت تران کرتگ اَت تاکدیم 19 تاں 23ءَ جدگال ٹک ءِ بابت ءَ نبشتگ کرتگ اَت کہ جدگال کُل 256 کٹم اِنت دیمتر ءَ واجہ گش ایت کہ بزنجو، سیاہ پاد سوپک، اُمرانی، لانگو، کلندرانی، ساجدی، موسیانی، لگاری، نوتک، بجارانی اے درست جدگال انت ۔ نی واجہ ءَ چہ جست کنگ بہ بیت کہ چون جدگال انت دلیل منانک سرشون ھم بہ دے کہ اے چون جدگال بوت انت !!؟ ھچ چشیں کتابی ءُ راجدپتری سرشون ھم اے کتاب ءِ تہ ءَ نداتگ ئِے بس واجہ جان مھمد ءُ آئی گِل ءِ لھتے مردماں تسدیک کرتگ۔ گپ پدا ھما کیت کہ واجہ جان مھمد ءَ وتی کتاب ءِ ھمل جھیند ءِ لچہ ءِ بند بدل کرتگ کہ ۔”ھمل ءِ ھمراہ بے دلیں جدگال بوتگ انت” ۔ بوت کنت گڑا بکول جان مھمد ئے اے ٹک گڑا ھمل ءِ ھمراہ بوتگ انت ۔ ابید چہ اے کُٹماں کہ لھتے وتگڑیں کٹم آرتگ ءُ جدگال ءِ ٹک ءَ گون ھوار کرتگ کہ آیانی ھچ وجود ءُ جدگال ءِ ٹک ءَ نیست انت باھو ءُ دشتیاری ءُ دُز آپ ءِ سیمسراں بہ گر دانکہ سندھ ءُ پنجاپ ءَ روت ھرجاہ جدگال ھست انت بلے چشیں وتگڑیں نام زرتگ ءُ جدگال ٹک ءِ لڑ ءَ ھوار کرتگ انت چشکہ گنگو، پتّر، موتک، گوشو، انگور زئی، بداجو، سرمار، زھری چنال ءُ دیگہ چشیں بازیں نام ھست انت کہ ایشانی وجود نیست انت ۔چش وَ نہ انت کہ تو بس وتی کتاب ءِ تاکاں سیاہ بہ کن ءُ بلوچ راجدپتر ءَ سر ءُ چیر بہ کن۔ کدیم 24 بہ گر تاں 31 ٹک رند واجہ بالاچ ھمید ءَ رند ءِ 391 کٹم ءَ بھر کرتگ لھتے کٹمانی نام من دیم ءَ کاراں چشکہ چوٹا، کینگی، گزّ بُر، سرکیل(خیل)کٹوھر، دشتی، گوادری، کلگ، ھوت، میر، کھوس، ھندوانی، گونڈ، لاشاری، لاٹھی، مارستان زئی، پتّر، چائے زئی، سیاہ پاد، سوت ءُ دیگہ بازیں کٹمے ھوار انت ایشانی نام ما پیسر ءَ ھچ جاگہ ءَ اش نہ کرتگ ۔ اد ءَ کمو مردم اجکہ بیت کہ ھوت ءُ لاشاری وت جتا یک مزنیں ٹکے بلے واجہ بالاچ ھمید ءَ رندانی کٹماں ھوار کرتگ ءُ مستریں ھیرانی ھبر اش انت کہ گوادری، دشتی، کلگ اے وَ دمگ انت ایشانی نام پہ ھند ءُ دمگ ءَ گرگ بنت بلے واجہ بالاچ ءَ اے رندانی کٹمانی لڑ ءَ ھوار کرتگ انت ءُ اوگانی یک ٹکے سرکیل (خیل) ھم رند ءِ کرتگ گوستگیں تاکدیمانی تہ ءَ سیاہ پاد، اُمرانی، جدگال کرتگ انت اد ءَ واجہ ءَ رندانی لُڑ ءَ ھوار کرتگ انت۔ دگہ ھم ھبرے پدر انت کہ واجہ ءَ نبشتہ کرتگ میر، میر ھم رند کرتگ انت ۔ میر یک ٹکے یا کٹمے نہ انت میر یک کردے ھر ٹک ءُ کٹمے تہ ءَ میر ھست انت کہ آ پہ کار ءُ کرداں چہ میر گوشگ بنت۔ باید پٹ پول بہ کت ایں واجہ بالاچ ھمید ءَ ھشکیں کتابانی باز کنگ ءَ بلوچ راجدپتر ءَ چش زوالی نیمگ ءَ برگ ادارہ ءُ اکیڈمیانی مستریں دست ھوار انت ھاس بلوچی اکیڈمی کوئٹہ نباید چش ایں بے دلیل ءُ بےمنانکیں کتاب چاپ بہ کنت۔۔
روان انت۔۔۔۔۔۔۔
