نبشتہ کار: بیرگیر بلوچ
ھمگام بلوچی
بلوچستان ءِ سرزمین سرا پاکستان وھدے زورگِر بیت گڑا آئی ابرمی مڑیاں دُزی کنت، تبی وھدی ھم آئی لُٹ ءُ پُل برجاہ اِنت ءُ پاکستان پنجاپ ءَ آباد کنت بژن اِنت کہ 75 سال سرجم اِنت بلوچستان 1948 ءَ پاکستان ءَ زورگِر کُتگ ءُ گنجیں مڑیاں بلوچ ءِ وسیّت ءَ ابید زورگِریں بے دین پنجاپیگ لیلام کنگا اِنت ءُ پنجاپ ءَ وشھال ءُ آباد کنگا اَنت بلے انگت پنجاپیگ ءِ دیم ءَ بلوچ ءِ ساہ ءَ ھچ بستار نیست اِنت۔
مرچی ما بہ چار ایں بلوچ وتی سرزمین ءِ سرا در پہ در ءُ بد ھال اِنت۔ بلوچ ءِ جاور ھما جاہ ءَ سر بوتگ اَنت کہ پہ چُنڑے نان ءُ نگن ءِ ھم مھتاج کنگ بوتگ وھدے کہ بلوچستان ءِ ابرمی مڑیاں ساڑی بئیگا ھم بلوچ ءِ جاور مٹ نہ بوتگ اَنت پرچے کہ بلوچستان سرجمیں گران نھادیں مڑیانی سرا یک زوراوریں رسترے کہ آئی نام پاکستان اِنت زورگِر اِنت۔
ما پدا بہ چار ایں پاکستان ءِ راج منّھانی (پارلیمانی) ھشکیں نام ءِ نانود پائدگ پرستیں ھما راج منّہ ءَ نشتگیں بلوچ کہ مرچی پاکستانی راج منّھانی ءِ سیاست کنگا اَنت آ پاکستان ءِ لشکر ءُ آئی ایس آئی ءِ پاداں چُک اَنت پدا وتارا بلوچ ءِ دردوار لیک اَنت وھدے کہ آ ھمے واستا پنجاپیگ ءِ لشکر وپادار بیت کہ آ آیوکیں گیچینکاری ءَ پنجاپیگ اے واجھکار ءَ سوبین بہ کن اَنت بلے پاکستان ءِ راج منّھی ءِ سیاست کنوکاں بلوچ گْوشگ من ءَ لج کنت اِنت کہ آھاں بلوچ ءِ مڑیانی سودگ گوں پنجاپیگاں جتگ ءُ لھتیں پائدگانی واستا ما گْوش ایں پنجاپیگ ءَ ھوار راجی گلامی ءِ مُھکم کنگا ھم اے برابری ءَ گوں ھوار اَنت ءُ بلوچ ءِ گلام کنگا مستریں دست ھمشانی مان اِنت۔
چے ءَ کہ پنجاپیگ ءِ لشکر ءِ لوٹ ءُ واھگ ھمیش اِنت انچو ما بہ چار ایں پنجگور ءِ سیاست ءَ بی اِن پی (مینگل)، نیشنل پاٹی، رھمت سالھ، بی اِن پی (عوامی)، پیپلز پاٹی، اسد اللہ، آگاہ شاہ، ھسین ھاجی، اتا اللہ ءُ ایدگِر وتگڑیں راجی منّہ پرستگ بہ بنت اِشاں پنجگور ءِ لس مھلوک زِھنی گلام جوڑ کُتگ۔ چِزوکے لالچ راج ءَ دے اَنت کہ مے دروگیں سیاست ءِ منوگِر جوڑ بہ بنت ءُ بیا اَنت مے گلام جوڑ بہ بنت ءُ مے پاداں بچُک اَنت۔ لالچ ءَ رد دے اَنت سولر، ڈیم، تالاب، ٹرانس ءُ نوکری دے اَنت کہ بلے کہ شپ ءُ روچ مے توسیپ ءَ بہ کن اَنت۔
مے بلوچ راج پدا ھوٹ داتگیں لالچ ءَ انچو پدا مے اسپیت ریشیں کماش ءُ مزھبی مردم کہ اِشانی گورا رو اَنت پدا ھزار تژن ءُ شِگان جن اَنت کہ گْوش اَنت من ترا ڈیم، تالاب، ٹرانس ءُ نوکری داتگ ءُ بلوچ مے گلام نہ بنت۔ بلوچ ءِ مڑی ءِ زرّام (بجٹ) ءِ پُشت ءَ اِشاں وتگڑیں سیاست ءِ نام ءِ سرا اِشاں سئودی ارب، لندن، اسلام آباد ءُ پنڑی توکا پہ وت گِس ءُ جاہ بھا زُرتگ، وتی جِند ءِ بینک ءِ زر پُر کُتگ اَنت، بس وتارا وشھال کُتگ اسلام آباد ءَ گوں کاھول ءَ نِشتگ ءُ وشیانی توکا اِنت۔
بلے وھدے کہ گچینکاری ءُ ھوٹ دیئگ ءِ وھد کیت مردمانی دگ سرا رو اَنت کہ بیا اِت مارا ھوٹ بہ دے اِت بلے بلوچ ءِ جیڑہ پاکستان ءِ سیاست نہ اِنت مارا وتارا یک سرزمینے ھست، آئی مڑی رکینگ ءُ آزاتی ءِ جُھد کنگ لوٹ اِیت نیکہ اے پاکستان ءِ وتگڑیں سیاست پرستانی رندگیری کنگی اِنت۔
مے پجار آزات بلوچستان اِنت، مے جُھد ھمیش اِنت کہ ما گلامی ءِ سانکلاں پروشیں گڑا ما پاکستان ءَ چہ آزات یک وتلوٹیں ءُ وشھالیں ملکے جوڑ بہ ایں، آئی توکا مے وشھالی ءَ گوں زِند گوز اِیت ءُ مے کامیاتیں وتن ءُ ریاست جوڑ بیت ءُ آئی کار ءُ پِگر ھمیش بیت کہ من چون وتی مھلوک ءَ وشھال کن ایں کہ آھانی تھا دگ، نادراھجاہ، پیکری، روزگار ءُ لس مھلوک ءِ دگے زِند ءَ گوں ھمگرنچیں آسراتی بہ رس اَنت کہ لس مھلوک ءِ توکا ھر یک مردمی ءَ برابری ءَ گوں ھوار کنگ بنت وانگ ءُ زانگ ءُ دراھی زمے واری درست ھوار اَنت کہ اے ملک ءِ کار اَنت بلے اے زورگِریں پاکستان مے سرا زور مُشتگ ءُ آئی لشکر، راجی منّہ (پارلیمنٹ) درست دُز ءُ زور مے سرا زوراور اَنت۔
