نبشتہ کار: ھدا وشک ءُ مھمد پاروک بلوچ
ھمگام بلوچی
*نُھمی بھر*
• زیردستیں راج ءَ زیت استانی بھر (سٹیٹ، پرونس) ءَ نیم وتواجھی ءَ بہ دے کہ زیردستیں راج وتی سرکار ءَ وت گچین ایت ءُ اڈ کنت، زیردستیں راج ءِ ورناھاں پوریاگِری ءُ شھر ءُ دمگاں ھر وڑیں بُنکی آسراتی ءُ دیمروی بہ دے کہ چیرجنگول ءِ جِند ءِ راج چیرجنگ ءَ کُمک مہ کنت ءُ نبا لس مھلوک ءِ تہ ءَ گلامی ءِ مارشتے ودی بیت۔ درور کہ روس ءَ چچنیا ءُ ھندوستان ءَ کشمیر ءَ را داتگ انچوشکہ تو ھچبر نہ اشکت کہ کشمیر ءَ ورگی آپ، لین ءُ بے پوریاگِری ءِ جیڑھے وَ ھست۔
• زیردستیں راج ءِ چیرجنگول ماں جنگی پِڑ کُشگ بہ بنت بلے دزگِر کنگ ءُ رند ءَ ھچبر کُشگی نہ اَنت بلکیں راجداری پولیس ءُ آمیدگِساں شھار کنگی اَنت کہ ترامگیج وت سرکاری رھبند ءِ ھساب ءَ سزا یا مُز بہ دنت ئِے۔بزاں سرکار ءِ ھر ترامگیج ءَ وتی کار کنگ ءِ موکل ھست انت ءُ ھر ترامگیج وتی کاراں سرکاری رِد ءُ رھبند ءِ ھساب کنت۔
• چیرجنگول ءِ کھول کہ شھراں نشتگ انت سرکاری لشکر آیاں ھچبر تکانسر نہ کنت بلکیں آیاں گوں وشیں دابے ءَ دزبندی کنت کہ وتی زھگ ءُ براتاں بہ گْوش اِت کہ سِلاہ دور دے اَنت نبا جنگ بہ بنت ایشی ءِ مزنیں دور کشمیری رَدیں چیرجنگول بُرھانی وانی انت کہ آئی ءِ پت، برات ءُ گْوھاراں سرکار ءَ شپ داں روچ رھوت کت کہ بُرھان سِلاہ دور بہ دنت البت پت ئِے کہ مزن شھدربرجاہ ءِ اُستادے منّ اِت ئِے کہ سرکاری لشکر ءَ مُدام گوں آیاں وشتبی ءَ گپ کُت، ھچبر لوگ ءِ ازت اش لگتمال نہ کتگ۔
• وتی راج ءِ سر ءَ ٹوھیں سِلاہ انچوشکہ بالی گراب ءُ پِرکیانی تیرگواری ھچبر مہ بیت کہ چریشی ءَ راج وت ءَ زیردست پھم ایت ءُ لس مھلوک گیشتر گُڑ ایت دومی راج ءِ ورنائیں نودربر ءُ بےگناھیں ورنا ھچبر چِست، کار ءُ بیگواہ کنگ مہ بنت چی ءَ ایشانی سر ءَ لٹ شاپی، کُشگ ءُ دگانی سر ءَ لاشانی دور دیگ راج ءِ زِد ءِ تہ ءَ زورانسر ءِ ھلاپ ءَ پِٹ ءُ زھرے ودی کنت بلکیں راجی گلامی ءِ مارشتے ودی بیت پد ءَ ایشی ءِ پائدگ چیرجنگولاں رس ایت اے آسر ءَ ھرکسے آیانی گل ءَ ھوار بیت ءُ زورانسر پروش وارت۔
نی گُڈسری ما زورانسر ءِ پروش ورگ ءِ سر ءَ گپ کن ایں کہ اگاں زورانسر ءِ سیاسی ءُ لشکری رھشوناں وتی جیڑھانی توجیلے درگیجگ ءَ بودی نیست گُڑا زورانسر ءِ لشکر زیت چیرجنگ ءَ پروش وارت ءُ گلامی ءِ سانکلاں سند ایت۔ چوناھیگا ھمے پروش زیردستیں راج ءِ لس مھلوک ءِ راجی زرمبشت ءُ آگاھی ءِ وازمند انت کہ اگاں راج ءِ تہ ءَ راجی گلامی ءِ مارشت ءُ راجی جُنز ءِ آگاھی ھست گُڑا زیت اگاں نہ انت ئِے گُڑا دیر وت آگاھی یے زور ایت۔ وھدیکہ چیرجنگ دْراج ءُ تْرُند بیتگ گُڑا زورانسر پروش وارت ءُ لھتیں پروش ورگ ءِ نشانی ایش انت۔
• زورانسر سیاسی جُھدکار ءُ لس مھلوک ءِ لوگ ءُ ھنداں ماندار ایت ءُ آیانی سر ءَ بے کساس لٹ شاپی کنت۔
• سرکاری ترامگیج انچوشکہ پولیس ءُ آمیدگِس ءِ ھچ وڑیں بستارے نہ بیت یا ھمے ادراہ ھم سرکاری لشکر ءِ سان زور اَنت۔
• ھر شپ ءُ روچ زیردستیں راج ءِ ورناہ چِست، گار ءُ بیگواہ بنت یا لھتیں روچاں رد لٹ شاپ ءُ تیر وارتگیں جون اش دست کپ انت
• چیرجنگ ءِ ھرچگ سرکار ءَ انچو بے وانک کنت کہ سرکاری لشکر چہ زیردستیں راج ءِ گدار، کاسگ چٹّ، دُزّ ءُ ڈنگاں ودی کنت ءُ چیرجنگولانی ھلاپ ءَ کارمرز کنت کہ ھمے دمگ ءِ ھر جاہ سوھو اَنت۔
• زورانسر چہ زیردستیں راج ءِ راجی زبان ءَ سَک تُرس ایت پمیشکا ماں وانگجاھاں گلامیں راج ءِ زھگ ءُ پدریچ ءَ آئی جِند راجی زبان ءِ وانگ ءُ نبیسّگ موکل نہ دنت چی ءَ کہ دژمن وَ زانت وھدیکہ راج ءِ مھلوک زبان دوست بیتگ گُڑا گلامی نہ منّ ایت ئِے۔
• زورانسر وتی مجگ ءَ ھمے نادْراھی ودی کنت کہ اے راج نی ما لٹ ءُ بوٹ ءِ زور ءَ منّینّ ایں۔
بلے چہ چُشیں زُلم ءُ زورانسری ءَ زیردستیں راج ءِ لس مھلوک گیشتر گُڑ ایت ءُ تکانسر بیت پد ءَ ابرمی گلامی ءِ مارشتے ودی بیت۔
شالا زورانسری ءَ پروش بات، گلامی ءَ پِٹ بات ءُ آجوئی زندگ بات۔
ھلاس
