ھیمبرگ (ھمگام ھال) ژن ژیان ءِ آجوئی ءِ جُنز ءِ نیمگ ءَ جرمنی ءِ شھر ھیمبرگ ءَ یک کانپرنسے برجم دارگ بوتگ، ایشی ءِ تہ ءَ آجوئی بلوچستان جُنز (ایف بی ایم ) ءِ باسک ھم ھَوار بوتگ اَنت۔
ایف بی ایم ءِ نیمگ ءَ بانک سماء بلوچ ءَ بِستار مھمان مراگش ءَ بَھر زرتگ ءُ ایردستیں بلوچستان ءِ راجدپتر ءُ بلوچ راج ءِ دستاں چہ پَچ گپتگیں آجوئی ءِ گِرگ ءِ جُنز ءِ سر ءَ وتی ھیال درشان کرتگ اَنت۔
کانپرنس کُرد باسکانی چْیردستی ءَ برجم دارگ بوتگ، آیاں ایران ءِ کبزہ کرتگیں کردستان ءِ انوگیں جاورھال ءُ مٹ بویوکیں راجکاری جاورھالانی سر ءَ باوست کرت۔
کانپرنس ءِ مول ءُ مراد ایران ءِ کبزہ کرتگیں بلوچستان ءُ کردستان ءِ آجوئی ءِ جنز ءِ تہ ءَ زالبولانی کِرد ءَ را دیم ءَ آرگ ئیگ اِت۔ اِے سرھال ءِ سر ءَ تران کنوکاں وتی ھیال درشان کرت ءُ گْوشت اِش کہ بلوچ ءُ کُرد ایرانی کبزہ ءُ کبزہ ءِ بگیری ءَ گھگیری کنگ ءَ اَنت۔ دگنیا ءِ تہ ءَ ھر وڑیں راجکاری ءُ گھگیری جُنز ابیدِ زالبولانی ھواری ءُ سروکی ءَ نا سرجم اِنت۔
آیاں تران کنان ءَ گْوشت کہ کبزہ گیریں ایران ءِ نیمگ ءَ چہ دویں راجانی زالبولاناں نشانگ ءِ آماچ اِش کرتگ، چہ ایشی ءَ یک نوکیں آشوبے ودی بوت، لس مھلوک ءِ تہ ءَ یک نوکیں گھگیری ءِ جُنزے اھت، اِے گھگیری ءَ را دیم ءَ برگ ءُ وتی آجوئی ءِ منزل ءَ برگ ءُ رسینگ مئے زمہ واری اِنت۔
بانک سماء بلوچ ءَ وتی ھیال درشان کنان ءَ گْوشت کہ ایردستیں بلوچستان اِے وھد ءَ دو جتائیں کبزہ گیرانی بگیری ءَ جھد کنگ ءَ اِنت، دویں نیمگاں دژمنیں اِستان بلوچ راج ءِ کْوش اِش برجاہ داشتگ، بلے ایشی ءَ ابید ھم بلوچستان ءِ آجوئی ءِ جُنز ءَ را نِزور کنگ ءَ بے سوب بوتگ اَنت۔
آئی ءَ تران کنان ءَ گْوشت کہ یک سالے پْیسر بلوچ جنکّو ماھو بلوچ ءَ ایرانی درندگیں لشکر ءِ کارندھے ءَ زوراکی ءِ نشانگ کرتگ، ایشی ءِ بگیری ءَ بازیں کساسے بلوچ لس مھلوک زھرشانی ءِ واست ءَ چہ وتی لوگاں در اتکگ اِت اَنت ، اِے زھرشانی ءِ بے سوب کنگ ءِ ھاتر ءَ ایران ءِ سِلاہ بندیں لشکر ءَ زھرشانی کنوکانی سر ءَ تیری گواری کرت ءُ 113 مردم شَھمیر بوت۔ بلے بازیں کساسے ءَ وتی جانانی ندر کنگ ءَ چہ ابید ھم بلوچ لس مھلوک ترس ءِ آماچ نہ بوت، یک سالے ءِ گْوزگ ءَ ابید پاھو دیگ، زوراکیں بیگواھی، گِرگ ءُ کُشگ ءَ ابید ھم گھگیری برجاہ اِنت۔ اِے گھگیری ءَ آھود ءِ لس مھلوک ءَ را زانت ءُ سرپدی (شعور) دات، ایشی ءِ تہ ءَ زالبول ھم انچش ھوار اَنت ھمے پیم کہ مردیں آدم ھوار اَنت، چُشکہ اِے پہ بلوچ راجی آجوئی ءِ جنز ءِ واست ءَ یک جوانیں گامگیجے۔
