مشکے ( ھمگام نیوز )بلوچ راج گوں ھما راجاں ھوار اِنت کہ آیاں بھ زوراکی ءِ دیم ءَ سر جھل نہ کرتگ ءُ ایردستی نہ من اتگ ، مروچی ھم درانڈیھ بہ بیت یا گلزمین بلوچ راج ھرچ وڑیں سکی سگگ ءَ اِنت ءُ وتی آجوئی ءِ جھد ءَ دیم ءَ برگ ءَ اِنت۔اے گپ 11 اگست ، سوگند سرسبزی روچ ءِ درگت ءَ بی این ایم مشکے ھنکین ءِ چیردستی ءَ برجاہ دارگ بیتگیں مچی ءَ تْران کنان بی این ایم ءِ ھنکینی راھشوناں درشانتگ اَنت۔
گوں مراگِش ءَ تْران کنان استاد مھران ءَ گْوشتگ کہ بلوچستان چہ بِندات ءَ آجو ءُ وت واجھیں ڈیھے بوتگ پہ بلوچستانءِ پھریزگ ءَ بلوچ ءِ پیر ءُ کماشاں وتی ھون ریتکگ ءُ بلوچستان پھز اتگ۔اے گپ راستے کہ دری زوراکانی زوراکیانی آماچ بوتگ بلے بلوچستان ءُ بلوچ راج ءَ بھ دری راجانی ایردستی نہ من اتگ ءُ پہ وتی راجی آجوئیءِ پھریزگ ءِ مدام جاڑیگ بوتگ۔
آئیءَ گوشتگ وھدے انگریزاں بلوچستانءِ بادشاہ میر مھراب ھانءَ ھمے گْوشتگ کہ تو منی پرمان ءِ پابند ءُ منی کوتلی بہ بہ ئے بلے مھراب ھان انگریزانی ایردست بیگ ءَ ساڑی نہ بوت پمیشکا انگریزاں گوں وتی لشکر ءَ بلوچستانءِ سر ءَ ارس کرت ءُ 1839 ءَ بلوچستان زور گیپت۔ ھمے ایردستی ءِ بگیری ءَ بلوچاں ڈیھ پھزی ءِ راہ گچینت ءُ انگریز ءِ بگیری ءَ چیرکی جنگ بنا کرت ءُ انگریز ماں بلوچ گلزمین ءَ پہ ایمنی ءَ نندگ ءَ نہ اشت اَنت ، ھمے ارشانی پد ءَ پہ انگریزاں باز جیڑہ ودی بوت۔
دیمترا آئی ءَ گْوشتگ وھدے دومی جھانی جنگ ءَ پد انگریز چہ ھرچ نیمگ ءَ ایردستیں راجاں ماں بست گڑا آ چہ اے دمگ ءَ در کپگ ءَ لاچار بوت ، چہ انگریز ءَ در کپگ ءَ 11 اگست 1947 ءَ بلوچستان ءِ آجوئی سرسبز اِت ءُ بلوچ یک رندے پد ءَ وتی گلزمین ءِ وتواجہ جوڑ بوت اَنت۔آجوئی ءِ رسگ ءَ پد آیاں نوکیں دودانی پد ءَ گچینکاری کرت۔ بلوچستان گوں جھان ءِ کوپگے ءَ دیم ءَ جزگ ءَ ساڑی اَت ، آئی ءِ دو پارلیمان اَت اَنت ، جھگیرانی پارلیمان (زیریں پارلیمان ) ءُ گچینی پارلیمان ( بالائیں پارلیمان)۔بلے انگریزاں اے دمگ ءَ پہ وتی سیتانی پانک ءَ پانگے پکار اَت پمیشکا آیاں ھندوستان دو جاہ ءَ ونڈ کرت ءُ پاکستان ءِ نام ءَ ڈیھے جوڑ کرت۔وتی جھانی سیتانی دیمپانی ءَ پہ انگریزاں بلوچستان ءِ آجوئی مزنیں اڑاندے اَت ، آیاں چیراندری پاکستان ءِ کمک کرت ءُ بلوچستان پاکستان ءِ ایردست کنائینت۔
استاد مھرا ن ءَ گْوشتگ کہ یازدہ اگستءِ دارگ ءِ مول ھمیش اِنت کہ ما وتی پہ آجوئی ءِ گرگ ءَ کرتگیں مسام ءَ یات بہ کن ایں، سوگند ءَ بہ سبز این ءُ پاکستان ءُ دری ٹیکاں ھمے کلوہ ءَ بہ شکسا ایں کہ بلوچستان ءَ وھدے چہ انگریز وڑیں زوراکی ءَ وتی ڈیھ ءِ آجوئی پچ گیپتگ گڑا پاکستان ءِ بنیاد ءُ منک ءُ اینچو مگیم نہ اَنت کہ بلوچستان ءِ سر ءَ وتی سردستی ءَ برجاہ داشت بہ کنت ، الم آ زوراکی کنت ، کشت ءُ کشار کنت انچوش کہ داں انیگ ءَ آئی ءَ ھمینچو بلوچ کشتگ کہ انگریزاں وتی سد سال ءِ سردستی ءِ میان نہ کشتگ ، گار ءُ گمسار نہ کرتگ۔ پرچا کہ زوراک مدام ھمے وش منی ءَ بیت کہ آ گوں زوراکی ءَ راجانی وتواجھی ایرموش کرت کن اَنت بلے مردم ءِ گْوستانک چوشیں زوراکیانی سوبمندی ءِ گواھی نہ دنت۔
آئی ءَ گوشتگ کہ بلوچ راج جھان ءَ گوں ھما راجاں ھوار اِنت کہ آ راجاں بھ کسی ایردستی نہ من اتگ جھان ءِ مزنیں زوراکاں گوں ھوار ھما راج کہ اسلام ءِ نام ءِ سر ءَ سھرائی ءَ وت ءَ بلوچ ءِ دوست پیش کنت بلے چیراندری منگلی ریچیں سیاہ مار ءِ پیم ءَ بلوچ ءَ وت ءَڈنگ ئِے جتگ۔بلوچ ھچ ناسرپد نہ اِنت بلوچ جْوانے ءَ سرپد اِنت کہ من ءَ پہ وتی راجی سیت ءُ پہ وتی آیوکیں پدریچ ءِ آجوئی ءُ پہ آئی ءِ پانک ءَ چی کنگی اِنت۔
بی این ایم ءِ گْوستگیں سی سی باسک ڈاکٹر شئے ءَ تران کرتگ ءُ گْوشتگ مروچی مئے اے مچی ءَ ھما مردم ساڑی اَنت کہ آیانی گسانی تہ ءَ یک یک شھیدے ھست اِنت ، ھما شھید کہ آیاں پہ وتی راج ءِ باندات ءَ جیڑ اتگ ءُ وتی ساہ نْدر کرتگ اَنت۔ آیانی لیکہ ءُ سسا سک بلند ءُ برزاد بیتگ اَ نت پمیشکا ما آیانی رندگیری کن ایں۔
دیمتر آئیءَ گْوشتگ یازدہ اگست ھما روچ اِنت کہ بلوچ ءَ را سد سال ءَ رند چہ انگریز ءَ آجوئی رس اتگ ۔زوراک ءُ گیشواھی کنوکیں راجاں مدام دگہ راجانی پل ءُ پانچ بیڑ برتگ انچوش پہ بلوچ ءَ ھم مدام آیانی نپت ءُ بیراں گْورتگ بلے بلوچ ءَ سر داتگ ، وتی منگہ ءُ ماتیں گلزمین نہ داتگ۔انچوش کہ ما گپ اش کرتگ کہ الی مھمد مینگل ءِ ، نورا مینگل یا کہ ھمل جیھند ءُ بلوچ ھان ءِ ، اے ھما مردم بوتگ اَنت کہ ایشاں گوں زورگراں جنگ کرتگ۔انگریز سد سال ءَ بلوچستان ءِ سر ءَ سردست اَنت بلے گڈ ءَ بلوچاں آ چہ وتی سرڈگار ءَ در کرت اَنت ءُ آجوئی گیپت پمیشکا اے روچ ءِ پہ بلوچاں مزنیں ارزشتے ھست۔
آئی ءَ درائینت ، اے مزنیں گپے کہ مئے مردم ھمینکس کہ در پہ در بیتگ اَنت ، بلے آیاں وتی مول ءُ لیکہ یلہ نہ کرتگ ، گوں وتی سسا ءُ شھیدانی جھد ءَ بندوک اَنت۔ واری ءُ بزگی سگگ ءَ اَنت بلے چہ وتی مول ءَ پشت ءَ نہ شتگ اَنت۔ اے پہ ما بلائیں گپے کہ مروچی ما وتی کار یلہ کرتگ ءُ اد ءَ مچ بیتگ ایں کہ چار گپ گوش دار ایں۔ اے بلوچ راج ءِ آیوکیں پدریچ اِنت۔ درست اے گپ ءَ بہ زان اَنت کہ بلوچ ءَ مروچی وتی جنگ ھما ھنداں آؤرتگ کہ نی منزل چماں اندر اِنت ، اوست پزور اِنت۔ بوت کنت کہ آجوئی ءِ جنگانی تہ ءَ پند سک دراج بہ اَنت ، پنجاہ سال ، سد سال گْوز ایت بلے اے دْرچ کہ روگ ءَ اِنت وتی منزل ءَ الم سربیت۔
