بلوچستان ءِ آجوئی ءِ راھبند

بَند 13: بلوچانی آجوئی ءِ جُھد ءِ مستریں مول ءُ مراد ایش انت کہ بلوچانی کسمت (مقدر) بلوچانی جند ءِ دست ءَ دیگ بہ بیت۔

بَند 14: سیاسی رھبند ءِ ھما کانون ءُ ی جواز کہ آ بلوچستان ءِ تہ ءَ لس مھلوک ءِ آزات ءُ جمھوری گچین کاری ءِ رھشونی ءَ کنت (بائد انت) کہ میان اُستمانی راجانی گل(UNO) ءِ چمانی چیر ءَ بہ بیت ۔ ایشی ءَ چہ ابید دگہ آزاتیں ادارھاں چار ءُ تپاس ءِ ھک بیت ءُ آھانی چار ءُ تپاس ءِ رِد ءَ کومی ءُ میان استمانی ھالرسان

آزاتیں وڑے ءَ چار ءُ بیچار بہ کن انت۔

بَند 15: بلوچستان ءِ تہ ءَ ھچ ڈولیں سیاسی رھبند جائز ءُ کانونی منّگ نہ بیت تنا وھدے کہ آ ناجائزیں کوْزہ ءُ زورگپتی ءَ آجو مہ بیت۔ بلوچستان ءِ تہ ءَ جھگیری جمھوریت (Representative Democracy) ءُ مردمانی وت واجھی جائزیں رھبندانی رِد ءَ بیت ءُ سیاسی تاکت مردمانی بیت نہ چوش کہ آیانی نام ءَ دگہ یکے کارمرز بہ کنت۔

بَند 16: ھما سیاسی تاکت ءِ جوڑشت کہ کوْزہ گیریں راجاں بکشاتگ، آ بلوچستان ءِ مھلوک ءِ وت واجھی ءِ ھلاپ انت ۔ اے دابیں زالمیں سیاسی رھبند چہ آزاتی ءُ جمھوریت ءَ رَد انت ۔

بَند 17: جمھوریت ءَ دوبھر کنگ ءِ جیڑہ ءِ گیشّ ءُ گیوار ھما وھد ءَ بوت کنت کہ وھدے چیر دستیں راج ءِ سر ءَ ناجائزیں زوراکی ھلاس بہ بیت ۔ جمھوریت ، انساپ ءُ بنیادمانی ھکانی کدر ءُ کیمت ءِ نارہ ھُشکیں پُوچ بنت ، تنا وھدے کہ بلوچستان کالونی جیوپولیٹیکل سیمسر ءُ رھبندانی تہ ءَ انت ۔

بَند 18: راجے ءِ تہ ءَ ھما وھد ءَ شھری ءُ سیاسی ھک پُر مانا بنت کہ آئی ءَ را ناجائزیں ڈولے ءَ کوْزہ کنگ مہ بیت ءُ مھلوک جمھوری ءُ آزاتیں سیاسی رھبندانی واھگدار بہ بیت ءُ اے رھبند پہ زور چہ دری کومانی نیمگ ءَ مان لگوشگ مہ بنت۔

بَند 19: راجدپتری ناانساپی، زلم ءُ زوراکی سرجمیں وڑے ءَ ھلاس کنگ نہ بنت۔ ھچ وڑیں ھکومتی رھبندے ھما دُرھیں ناانساپیاں ھلاس کرت نہ کنت کہ یک راجے ءِ سر ءَ گْوستگ انت، بلے آزاتی، بنیادی ھک، چاگردی انساپ، برابریں موہ دیگ ءُ گزرانی لائکی ءِ رھبند ءِ سرءَ رؤکیں یک جمھوری ءُ سیاسی نزامے، ھما نزام انت کہ اے بلوچستان ءِ تہ ءَ رواج دیگ بوت کنت۔