ھمگام بلوچی نبشتانک
شھیدی یک انچیں مارشتے اے انسان ءِ ھما جزبگاں گوں ھوار انت ایشی ءِ بیان کنگ نہ بوتگیں گپے، زند ءِ ببا دیگ ءِ مارشت ءَ کے بیان کت کنت ھر بلوچ پسگ ءِ زمین دُوستی ءِ جزبگانی کدر ءَ کنیں بلے لھتیں چیز انت آ چہ جزبگ ءُ جوش ءَ برز تر انت آ اگل ءُ مارگ سما کنگی انت مدتاں رند راھے کَشگی انت۔
سرانی کربانی ءِ جزبگ چہ کوھن ءُ کدیماں بلوچ ءَ را گون انت ءُ پیداک اے ھما سکین انت داں روچ مرچی اُوں بلوچ پسگ وتی سرانی کربانی دیگ ھچ رنگ ءَ پد کنز نہ بنت کوھنیں بلوچی شئراں تو وان ئے تاں سما کپ ایت بلوچ ءَ را کربان بوھگ ءِ جزبگ چموداں چہ بنیاد ءَ ھست انت بلے انچو سرانی کربانی دیگ ءَ پد اوں تئی راجی جنز ءَ آ رنگیں سوبمند بوھگی اَت آ رنگ ءَ سوبمند نہ بیتگ بلے نوں کہ ھستیں وھد ءَ جیڑ ئے داں ترا بازیں چیزانی تہ ءَ بدل بیان انت، نوکیں ءُ دنیا ءَ جنگانی تہ ءَ چنچو بدلی اتکگ انت جنگانی دروشم بدل بوتگ انت، ما مدام جنگ ءُ جنگ ءِ رٹا ءَ جنیں کہ مارا جنگ کنگی اِنت بلے چونیں جنگے بہ بیت آیا تھنا توپک بڑّا کنگ ءُ یک پوجی یے کشگ تھنا جنگ ءِ نام انت، ھر وھد ءَ دنیا مٹ نوک بوان انت ءُ نوکیں ءُ جدید بوت ھرچی بلے بلوچ آ کساس سر نہ بوتگ نیمگ ءُ نیم سوھی گوں کپتگ کپان ءُ پرشان جنزگ ءَ انت۔
جنگ ءِ مزنیں اَرزشتے آجوئی ءِ جنز ءِ تہ ءَ، تو وھدے گوں دژمنے ءَ گوں دیم پہ دیم بئے ترا وتی کساس زانگی انت، دژمن تاگت ءِ بابت ءَ سرپد بوھگی انت، دژمن ھر رُپک ھُنر زانگی انت کہ دژمن چونیں سیاسی ءُ جنگی رپک مئے سرا کارمرز کنگ ءَ انت اے کُل چیز ترا پوہ بوھگی انت، اے چیزانی زانگ ءِ واستا ترا شری رنگے ءَ وانگی لوٹیت ءُ مارگ لوٹ ایت آ دگہ گلامیں راجانی گوست ءَ، آیانی راجدپتر ءَ بوانیں آیاں چون وتی آجوئی گیپتگ انت ھستیں وھد ئے آجوئی گرگ ءِ توجیل چی انت، ما چتو وتی ڈیھ ءَ گیپت کنیں، ایا آجوئی گرگ ءَ پد تئی گُورا چشیں توجیل ھست کہ ھستیں وھد ءَ وتی آجوئی داشت بہ کن ئے۔
ما وتی گوست ءَ بچاریں شھید بابو نوروز کہ گوں ھمراھاں پہ دروگ گر انت ءُ کران ءِ نام ءَ جھل ءَ کار انت، سبب چی بوتگ انت، آ کجام نزوری بوتگ انت بابو ءَ گوں وتی ھمراھاں نہ پھمتگ انت ءُ رد دیگ بوتگ، زیکیں جنگ ءَ مئے مھلوک سیاسی نہ بوتگ بلکیں روایتی بوتگ انت اے مکاریں دژمنانی رپکاں سرپد نہ بوتگ انت، تئی زمین دژمن ءَ گیپتگ، ھان کلات گیپتگ ءُ بندیگ انت، چرے گپاں اَبید تو انگت رد کپ ئے، گپ ءِ تچک ءَ مانا ھمیش انت کہ ما روایتی ھساب چیز چار اتگ کہ قرآن ءِ کہ آؤرتگ گڑا ما جھل ءَ ایر کپیں پرچا کہ کران آزمانی کتابے ھر مسلمان ایشی ءِ کدر ءَ کنت، دژمن ءَ تئی نزوری زانتگ، چدو پیسر آگا ابدلکریم ھم پہ کران ءِ نام ءَ رد دیگ بیت بلے ما انگت سبک نہ زُرت دُوبر رد کپتیں نوں اد ءَ چہ پدر انت ما روایتی ھساب ءَ وتی جنز جنزینتگ انت انوں ما گوست ءِ ردیاں جیڑیں ما ابکہ بیں اے انچکیں مزنیں گپ نہ بوتگ انت آ ساھتاں آیاں نہ زانتگ انت ھما وھد ءُ ھما جاورانی ھساب ءَ اگاں تو بہ جیڑ ئے تاں آیاں پہ اے مزنیں گپ بوتگ انت آیاں نہ زانتگ کہ اے مکاریں دژمن آزمانی کتاب ءَ اوں لگتمال کنت۔
نوں گپ اِش انت اے ھستیں وھد ءِ جنگ ءَ اوں ما انچو روایتی ھساب ءَ چارگ ءُ پھمگ ءَ انت زی دگہ دروشمے ءَ مرچی دگہ رنگے ءَ، مرچی ما لانک بستگ کہ شھید بوھگی انت، سر ببا دیگی انت دہ دہ ورنا وانندگیں ءُ زانتکاریں یکجاہ بَر دژمن ءِ دپ ءَ دے کہ کربانی لوٹ ایت ایا کربانی تھنا زندمان ءِ ھلاس کنگ ءِ نام انت جزباتاں بُرز تر بو ءُ بہ جیڑ تاں باز چیز تئی دیم ءَ پدّر بیت اگاں اے زندگ بوتیناں ایشاں دگہ ھزار بلوچ پسگ تیار کتگ ات، اگاں تو بُگش ئے کہ اے راجی جنزے کربانی لوٹ ایت من گشاں کُربانی یے نہ انت تاوانے پہ راجی جھد ءَ۔
اُول مارا اے ھیال ءُ مارشت چہ وتی اندر ءَ در کنگی انت پہ ڈیھ ءَ ھر ھساب ءَ مَرگ المی انت، جنگے بنا بوتگ شھیدی الم بیت، بلے وت وتی باتن ءَ اے گپ ءَ بہ جیڑ ئے بئی ما پہ شھیدی ڈیھ ءَ آجو کتیں گڑا ترا ھپتاد سال انت کہ شھیدیں سرانی کُربانی ءَ دیان ءُ پیداک ئے چے آسر در اتکگ نوں گپ اِش انت جنگ ءِ ھواری ءَ ھستیں وھد ءِ میان استمانی سیاست ءُ سیاسی سر ءُ پرانی سرا شریں وڑے ءَ ترا دست رَس بہ بیت مرچی دنیا تب ءُ سیاست بدل بوتگ انت ھر چیز ءَ وتی مانا بدل کتگ۔
نوکیں اھد ءِ جنگ بلوچ ءَ را آ رنگ ءَ میان اُستمانی کُمک رسگی بوتگ پرچا نہ رستگ ئے اے جیڑگ ءُ ترا ھما بیست سال ءِ کوھنیں راجی جنز ءِ تہ ئے جاور وانگ ءُ پوہ بوھگی انت، اللہ نزر، براھمدگ ءُ ھیربیار مری ءُ اے سَروکانی میان ءَ کجام نزوری بوتگ انت آ میان اُستمانی تَک ءَ جوانیں رنگے ءَ وتی ھک ءَ آرگ ءَ بے سوب انت آ کئی ردی بوتگ انت، مرچی راجی جنز پرشت ءُ پروشانی آماچ انت مارا یک نیمگ بوھگ ءُ گوں نیک نیتی ءَ وتی چیز گیش ءُ گیوار کنگی انت وتی راہ تچک کنگ ءُ جنزگی انت۔
اگاں اے رنگ ءَ کہ ما جنزگ ءَ انت ءُ اگاں ما اناگھی ما اے جنگ ءَ سوبین بوتیں، مئے آجوئی گرگ بوت دارگ نہ بیت تو وتی آجوئی ءَ داشت نہ کن ئے داں تو وتی مھلوک ءَ زانت ءُ زانگ، یا سیاسی ءُ سنچ سما ءِ نیمگ ءَ نہ بر ئے وتی ورناھاں وتی آیوکیں پدریچ ءَ نوکیں ءُ ھستیں وھد ءِ جاوراں پوہ نہ کن ئے۔
من اے پلسپہ ءِ منوک نہ آں کہ مستریں کربانی پہ ڈیھ ءَ شھیدی انت، مرگ انچیں مارشتے کہ ھرکس اے سیمسراں سر بوت نہ کنت ءُ اے کار پہ ھرکس ءَ ارزان نہ انت، بلے منی نز ءَ مرچی مستریں کُربانی ءَ ھما دیگ ءَ انت کہ وتا زندگ ءِ ئے داشتگ ءُ بلوچ ءُ بلوچستان ءِ باندات ءَ کارانی گیش ءُ گیواری ءَ جھد ءَ انت، شھیدی یک روچے کسہ یے آسر بیت، بلے اے جاوراں زندگ بوھگ ءُ رنج ءُ ڈکی سگگ اوں اَرزانیں کارے نہ انت، مارا روایتی بوھگی نہ انت سیاسی بوھگی انت جزباتی اوگاماں چہ در کپگی انت ءُ آیوکیں بلوچستان ءَ پہ تیاری کنگی انت۔