فری بلوچستان موومنٹ ءِ سروک ءُ بلوچ راجی راھشون ھیربیار مری ءِ گوں ریٹائرڈ آرمی میجر ءُ (Defence analyst) گورو آریا ءَ گوں گِند ءُ نند پہ ھمگام ءِ بلوچی وانوکاں دیم ءَ آرگ بوھگ اِنت
میجر گورو آریا : ڈیپنس آپنس ءَ من، گورو آریا شُمارا وش اَتک کن آں۔ مروچیگیں مئے دیوان ءَ ساڑی اِنت ھیربیار مری کہ آ ھچ توسیپ ءِ مُھتاج نہ اِنت۔ سرجمیں دنیا ھیربیاری مری ءَ شریں وڑے ءَ زانت، بلوچستان ءِ مھلوک آئی ءَ وتی توار سرپد بنت، ھیربیار مری کہ آ دگنیا ءِ دیم ءَ بلوچ ءِ توار ءَ چِست کنگ اِنت۔ بلوچستان ءِ راجدپتر نوہ ھزار سال کوھن اِنت چوشکہ مھر گڑھ ءِ سیویلائزشن ءَ گوں نزیکی کنت ءُ ھندوستان ءِ سیویلائزیشن ءَ چہ ھم گیشتر کوھنتِر زانگ بیت۔ بلوچستان ءَ اِے جُنز دیریں بندات بوتگ من مرچی ھمے کوھنتریں بلوچ سیویلائزیشن راج دپتر ءِ سپّیر ءُ نمائندگ ءَ گوں گپ ءُ تران کن آں۔
ھیربیار مری یکبرے پد ءَ وش اَتک ئے۔
ھیربیار مری : باز باز مِنتواراں
میجر گورو آریا : ھیربیار ساب! اِے وھد ءَ بلوچستان ءِ سیاسی ءُ مالی جاورھال چتور اَنت ما ھروھد ءَ گِندیں ویڈیو ءُ رسانکانی دروشم ءَ جاور باز نگیگ اَنت، مھلوک سک پریشان اَنت تو گُشت کن ئے جاورھالانی راستیں دروشم چی اِنت ؟
ھیربیار مری : جی ھما وھد ءَ کہ پاکستان ءَ بلوچستان زوربررد (قبضہ) کُتگ چہ ھما روچ ءَ داں روچ مروچی جاورھال نگیگ اَنت۔ اود ءَ تبائی اِنت بلوچان ءَ کُشگ بوھگ ءَ اِنت پہ آیانی مڈّیانی (وسائل) لُٹ ءُ پُل ءِ ھاترا، بلوچان ءَ چہ آیانی گواجِناں چے زبھر کنگ بوتگ، مرچی جاورھال اَنچوش اَنت کہ بلوچ وتی ھَکّ ءِ ھاترا گپ کُت ھم نہ کنت، بلوچان ءَ وتی گُلزمین ءِ سرا دگرانی دیم ءَ دست ءِ دراج کنگ ءَ مجبور کنگ بوتگ بَلے مئے سرزمین ءِ مڈّیاں چہ سرجمیں پنجاب آباد کنگ بوھگ اِنت، مئے سرزمین (بلوچستان) پاکستان ءَ چائنا ءِ چَنگُلاں داتگ مئے بلوچ راج ءِ ھلاپ ءَ پاکستان ءَ لَشکری ناشرکاری ءِ ھوری ءَ مالی ناشرکاری ھم بندات کُتگ۔
بلوچستان ءِ راجدپتر باز کوھن اِنت دگنیا ءِ نکشہ ءِ سرا اگاں چمشانکے بدی یے تاں زانگ بیت ھما وھد ءَ کہ برتانیہ ءَ ھندوستان زوربرد (قبضہ) نہ کُتگ بوتگ ھما وھد ءَ ھم بلوچستان جنوبی ایشیا ءَ شانزدھمی ءُ ھبدھمی کرن ءَ (صدی) دگنیا ءِ نکشہ ءِ تہ ءَ ھَست بوتگ۔ بلوچ وتی سرزمین ءِ آجوئی ءِ واستہ تَچ ءُ تاک کنگ ءَ اَنت۔ وتواکیں اَستانے ءِ بستار ءَ مئے گوں برتانیہ ءَ سیادی بوتگ اَنت۔ آزاتیں اِستانے ءِ ھساب ءَ ھان کلات ءَ (خان آف قلات) شاھی ءِ ٹائیٹلز ھم رستگ۔ مئے بلوچستان ءِ گوں برتانیہ ءَ برابری بنیاد ءَ سِپارتی سیادی ھم بوتگ اَنت۔
بلوچ راھشون ھیربیاری مری ءَ ھان کلات میر اھمد یار ھان گوں پاکستان ءِ منّگ نامہ ءِ بابت ءَ وتی ھیال درشان کُتگ اَنت گُشتگ کہ پاکستان گُشیت ھان کلات میر اھمد یار ھان ءَ پاکستان ءَ ھوار بوھگ ءِ منّگ نامہ ءِ سرا دزکت کُتگ ھمے سوْب ءَ بلوچستان پاکستان ءَ ھوار کنگ بوتگ۔ اِے گپ ءَ گوں راستی ءَ ھچ سیادی نیست۔ ایسکیشن تریٹی (Accession treaty)، دو تاک ءَ ھواریں دستاویزے، آئی تہ ءَ لھتیں لبز نبشتہ اِنت کہ دو مُلک ھواری ءَ (یونین) پیداک اَنت دو مُلک ءِ ھمے ھوری ءِ منّگ نامہ تھنا دو تاک ءَ نبشتہ اَنت اگاں ھمے دستاویزاں ھُورتی ءِ گون ءَ بچارئے تاں ایشی ءِ رمس ءِ ( تاریخ) تہ ءَ تپاوت گندگ ءَ کئیت، ھان کلات ءَ 27 مارچ ءَ دزکت کُتگ ءُ مھمد الی جناہ ءَ 30 مارچ ءَ ھمے کاگزانی سرا دزکت کُتگ۔ ایشی ءَ چہ اَبید دومی تپاوت ھان کلات ڈھاڈر سبی ءَ بوتگ ءُ مھمد الی جناہ کراچی ءَ نندوک بوتگ۔
آروس گُشی یے یا دو مُلکانی ھواری تاں آھانی دزکت کنوک باید یکجاہ بوتین اَنت۔ دو جتائیں ھَند ءُ دو جُتائیں رمس ءَ دزکت کنگ ءَ چے زانگ بیت کہ ھان کلات ءِ ھلاپ ءَ لَشکر کشی کنگ بوتگ ءُ بلوچستان زوربرد (قبضہ) بوتگ۔ اِدا سوال اِے ھم چِست بیت کہ اگاں دو مُلک ھواری ءَ پیداک اِتاں تاں کُجام مُلک ءِ سپّیر ءَ ھمے منّگ نامہ ءِ مراگش ءَ بَھر زُرتگ ؟ کُجام مُلک ءِ نمائندگ داوت دیگ بوتگ ؟ کئے گواہ ءِ دروشم ءَ ھوار کنگ بوتگ ؟ اِے جُستان ءَ پسّو نیست چیا کہ ھچ مُلک ءِ نمائندگ اِے منّگ نامہ ءِ مراگش ءَ داوت دیگ نہ بوتگ نہ اِے روچ ءِ شاتکامی بوتگ نہ یک مُلکے ءَ سرکاری ھساب ءَ اِے منگ نامہ ءِ مراگش ءَ بَھر زُرتگ۔ زانگ بیت ھان کلات ءَ پہ وشّی اِے منگ نامہ ءِ سرا دزکت نہ کُتگ بلکیں بلوچستان ءِ سرا لَشکر کشی کنگ بوتگ ءُ مئے زمین چہ مارا زوربرد (قبضہ) بوتگ۔
مرچی باند ءَ اگاں یکّے لوگے باڑہ ءِ سرا دنت یا آروسے ءَ ھم دو گواہ ءِ ساڑی بوھگ ھَژدری بیت آ ھم دوئیں سرانی نیام ءَ گواھانی ساڑی بوھگ ھژدری اِنت۔ مھمد الی جناہ ءُ ھان کلات ءِ نیام ءَ منگ نامہ آروسے یا یک لوگے ءِ باڑہ ءِ درور ءَ ھم سرجم ءَ نئیت۔
میجر گورو آریا : ھیربیار مری ساب من ھم لھتیں بلوچ سنگتانی گون ءَ گپ کُتگ آیانی گُشگ ھم ھمیش اِنت کہ ھان کلات ءُ جناہ ءِ نیام ءَ ھرچ منگ نامھے کہ بوتگ آ ھم اِے منگ نامہ ءِ منّگ ءَ ساڑی نہ اَنت آیانی گُشگ اِنت کہ اِے منگ نامہ بلوچانی گون ءَ یک ساز ءُ بازے بوتگ۔ من نُو کایاں دومی سوال ءِ نیمگا، بلوچستان ءِ آجوئی ءِ جُنز ءَ مزن اُگدہ ءُ تچ ءُ تاک کنوکیں سرکماش آیانی سیادی گوں تئی ءُ بُگٹی ٹک ءَ بوتگ آ پاکستانی پوج ءَ کُشتگ اَنت اِے بلاھیں ھَستی بوتگ اَنت۔ اِے وڑ چون بوتگ کہ پاکستان شمئے سرکماشیں مردماں سجھیں دگنیا ءِ دیما جنت ءُ راہ ءَ چے دُور کنت؟
ھیربیار مری : بچار ! اِے جیڑہ ءِ سرا من وتی ھمساھگیں مُلکاں، میان اُستمانی گَل (اقوام متحدہ)، یورپی یونین ءُ میان اُستمانی برادران ءَ بلوچانی کُشت ءُ کوش ءِ زمہ وار سرپد باں۔ آھاں پاکستان ءَ را مئے کُشت ءُ کوْش ءِ سرا وتسر کُتگ۔ پاکستان ءَ 30 لکھ بنگالی کُشتگ، لکھاں بنگالی زالبولانی گون ءَ بدکاری کُتگ، روچ مرچی میان اُستمانی گل ءَ یک (قراردادے) ھم پاکستان ءِ ھلاپ ءَ نیاؤرتگ، 30 لکھ بنگالیانی کُشت ءُ کوش ءِ سرا پاکستان جُست ءُ پُرس ھم کنگ نہ بوتگ۔ پاکستان برتانیہ ءُ میان اُستمانی برادرانی داشتگیں سَگ اِنت۔ ھمے واستا آ پاکستان ءِ ھلاپ ءَ گامگیج چِست کُت نہ کن اَنت، ایشی ءِ ھواری ءَ مئے ھمساھگیں مُلک ھندوستان ءَ ھم روچ ءِ مرچی مئے سرا بوتگیں زُلم ءِ ھلاپ ءَ توار چِست نہ کُتگ۔ ھندوستان مرچی ھم مارا پاکستان ءِ یک سُوبھے (صوبہ) سرپد بیت۔ ھندوستان ءِ سیاسی سروک ءُ دانشور ھم پاکستان ءِ پندلانی زد ءَ اَتکگ اَنت ءُ مارا سوبھے سرپد بنت۔
پاکستانی پندلاں چے اَبید ھندوستان ءَ ھچبر یک جُتائیں مئوکپے نہ داشتگ کہ بلوچستان یک وتواجھیں اِستانے بوتگ ءُ رند ءَ زوربرد (قبضہ) بوتگ، انّو ما ایردستیں۔ پاکستان مئے سرا زورگیر اِنت۔ ھندوستان ءِ سیاسی سروکان ءُ بیوروکریسی ءَ نیوٹرلیٹی گون ءَ چار ءُ گُزار کنگی اَت ءُ بلوچان ءَ اِیردست سرپد بوھگ ءُ مئے توار بوھگی اَت۔ وھدے ما ھندوستان ءِ بَھرے بوتین ئے ءُ پاکستان ءَ مئے زمین ءِ سرا داوا بہ کُتیں گُڑا مارا برٹش بلوچستان ءِ نام ءَ پرچا توار پِر جنّگ بوتگ اَت ؟ ایشی ءَ چہ ساپ زاھر اِنت ما یک استانے بوتگیں، ھندوستان یک جُتائیں اِستانے بوتگ مارا برٹش بلوچستان ءُ ھندوستان ءَ را برٹش انڈیا ءِ نام ءَ توار پِر جنّگ بوتگ کہ آئی تہ ءَ پاکستان ءِ سوبہ سندھ ءُ پنجاب ھوار بوتگ اَنت۔
پاکستان پندل سازگ اِنت کہ بلوچستان ءِ سئے ئیں ریاست (خاران، مکران ءُ لسبیلہ) ءَ پاکستان ءِ گون ءَ ھوار بوتگ اَنت۔ مُردنی چوش بوت کنت کہ باند ءَ اگاں پہ درور چین یا جرمنی ءَ بزور آ بُگش اَنت ھندوستانی ریاست اریانہ، امبالا، پنجاب ءِ جلندر چین یا جرمنی تہ ءَ زم بوتگ اَنت ءُ آ ریاستانی راھبر ھم بُگش اَنت ھؤ ما ھوار بوتگیں گُڑا ھندوستان یک مُلکے ءِ ھساب ءَ وتی ریاستاں دومی مُلک ءَ ھوار بوھگ ءِ اجازت ءَ دنت ؟ ھچبر نہ دنت مئے ھلاپ ءَ پاکستان ءَ ھمے وڑیں ساز ءُ باز کُتگ۔ جناہ (جناح) کئیت، جناہ بلوچستان ءِ سئے ئیں (اضلاع) لسبیلہ، خاران، مکران ءَ را ریاستی نام دنت، لبزان ءَ سر ءُ چیر کنت ءُ گُشیت کہ بلوچستان ءِ سئے ئیں ریاست پاکستان ءَ ھوار بوتگ اَنت بَلے راستی ایش اِنت کہ اِے سئے ئیں مُلک نہ بوتگ اَنت بلکیں بلوچستان ءِ (اضلاع) بوتگ اَنت ءُ مکران ءِ گورنر پرنس ابدالکریم بوتگ بد بَھتی ءَ چہ ھندوستان ءِ لھتیں سیاستدان ءُ دانشور پاکستان ءِ ھمے دروگیں بیان ءِ آماچ بوتگ اَنت اِے وڑ شر نہ اِنت ۔
میجر گورو آریا : ھیربیار مری ساب ھمے وڑا تو چہ ھندوستان ءِ دانشوراں ھچ اُمیت نہ داشتگ ھمے وڑا من ءَ ھم چہ ایشاں ھچ اُمیت نیست، ایشانی ھندوستان ءِ بَھر ءُ بانگی ءَ چہ پیسریگیں پاکستان ءِ گون ءَ رومانوی نزیکی اَنگت ھم برجاہ اِنت چوش کہ رد اِنت، یک ھرابی یے، بَلے ایشانی زھن ءَ انگت ھم یک چیزے در نئیتکگ ما اَنگت لاھور ءَ نشتگ بوتگیں، من ءَ شریں وڑئے ءَ سرپدی ھَست کہ بلوچستان ءِ تہ ءَ پاکستانی پوج بلوچ زھگ ءُ زالبوالاں جَنّگ اِنت بَلے اِدا لھتیں دانشور ھَست آیانی باروا گپ جَنّگ من ءَ وش نہ لگ اِیت آ بلوچستان ءِ باروا گپ نہ کن اَنت اِے ھندوستان ءِ گَدّار اَنت ءُ بلوچستان ءِ گموار ھم نہ اَنت۔ ھمے وڑا ترا ھم گِلّگ ھَست کہ ھندوستان ءِ دانشور بلوچستان ءِ باورا ھاموش اَنت من ھم گُشگ لوٹاں کہ شاھی دربار ءِ در توکا چے پچ کُتین اَنت ءُ ڈَنّ ءَ چے پچ کنگ ءِ کَسّے ءَ مجال نہ بوتگ اَت۔
بلوچستان (جغرافیہ) ءِ ھوالہ ءَ پاکستان ءِ 44% چہ ھم گیش اِنت ءُ گواجِناں چے سرریچ اِنت بلوچستان ءِ آبادی سک کم اِنت، گریبی سک باز اِنت چیا کہ پاکستان دُرستیں گواجِنانی لُٹ ءُ پُل ءَ کنگ اِنت ءُ پنجاب ءَ بَرّگ اِنت پنجاب ءِ ھر ھَند ءَ گیس ھَست، بَلے بلوچستان ءَ چہ دراؤکیں گیس بلوچستان ءَ رسگ ءَ نہ اِنت۔ چائنا ءِ باروا اگاں گپ بہ جَنّ ئے ھیربیار مری تو بُگش چائنا بلوچستان ءَ چے کنگ اِنت چائنا کُجام کارست ءِ واھنُند اِنت ؟
ھیربیار مری : بچار ! تو پوج ءِ یک میجر رینک ءِ آپیسرے بوتگ ئے، چائنا ھندوستان ءِ ھلاپ ءَ (سٹرینگل ہولڈ) دارگ لوٹیت۔ بلوچستان چائنا ءِ اِے (سٹرینگل ہولڈ) ءِ یک بَھرے۔ سر زاھری بِلّے کہ چین گوادر ءَ یک کمرشل پورٹے جوڑ کنگ اِنت بَلے راستیں دروشم ءَ چائنا سونمیانی ءَ زمین ءِ چیر ءَ یک نیول بیسے جوڑ کنگ اِنت، جیونی ءَ نیول پورٹ جوڑ کنگ اِنت۔ اِے سجھیں پوجی سر ءُ پُر ھندوستان ءِ چاریں نیمگا گِرگ ءِ کوشستے بوھگ اِنت۔ اگاں ایشی ءَ مالی جنگ بُگش ئے یا تھنا جنگ بُگشی یے ھم رد بوت نہ کنت۔ چائنا ءِ اِے دراج مُدّتیں پندلانی سرا بوت کنت اَنّو بلوچ جنجالانی آماچ اَنت بَلے آؤکیں وھد ءَ اِے ھندوستان ءُ امریکہ ءِ واستہ جنجال پیداک کنگ بوھگ ءَ اَنت۔ مرچی ما چین ءُ پاکستان ءِ زدّ ءَ اِنت باند ءَ ھندوستان ھم چین ءِ دست ءَ رک اِت نہ کنت۔
پیسلہ ھندوستان ءَ کنگی اِنت کہ آئی ءَ اِے ھَترہ ءَ چہ درآھگ ءِ واستہ چتوریں تیاری کنگی اِنت، آؤکیں وھد ءَ چتوریں پالیسی جوڑ کُتگ ؟ تئی سیاسی سروکان گپ وَ جنّ اَنت بَلے آؤکیں وھد ءَ پہ پالیسی ءُ تیاری گندگ ءَ نہ اِت۔ ھندوستان مالی دروشم ءَ باز زورآور اِنت، آبادی ءِ ھساب ءَ دنیا ءِ تہ ءَ بلاھیں مُلکے، بلاھیں جمھوری مُلکے ھم، من ءَ باز درد بیت ھندوستان ءِ نیمگا چے ما اَشکنگیں کہ بلوچستان ءِ سیمسر گوں مئے سیمسراں جُتا اَنت پمیشکا ما کُمک کُت نہ کنیں ایا اِے ھژدری اِنت کہ یک مُلکے ءِ سیمسر گوں تئی سیمسراں ھوار بہ بنت گُڑا تو آئی ءَ سِپارتی کُمک دئے، توار چِست کن ئے یا دگہ کُمک کن ئے ؟
کیوبا ءَ بچار، آھانی اپریکہ ءِ نزیک ءَ ھچ وڑیں سیمسر نیست اِے دوئیں مُلک یکے دومی ءَ چہ ھزار مِیل دُور اَنت، کیوبا ءَ نیلسن منڈیلا ءِ واستہ ھزارانی ھَساب ءَ رزاکار دیم داتگ اَنت، ما چہ ھندوستان ءَ ھزارانی ھساب ءَ رزاکار ءِ لوٹ ءَ ھم کنگ ءَ نہ ئے۔ کیوبا ءَ انگولہ ءُ الجیریہ ءَ نیلسن منڈیلا ءَ را ٹینگ داتگ، من نہ گُش آں شُما مارا ٹینک بہ دی یے، من اِے گپ ءَ الّم کن آں شُما بلوچاں پہ آواز کم از کم چِست بہ کن ئے، یکروچے شُما گُش ئے بلوچ مئے برات اَنت آھانی واستہ توار چِست کنگی اِنت دومی روچ ءَ پد ءَ بے ھال بہ ئے؟
ترا پہ وتی راجی پائدگانی ھاترا ءُ مئے کُمک ءِ واستا ھم یک بانداتگیں پالیسی یے جوڑ کنگی اِنت۔ پاکستان ءِ بُنکی مالی سورس چی انت، یکے وَ بلوچستان ءِ گواجنانی لُٹ ءُ پُل، دومی میان اُستمانی مُلکاں چے پِنڈگ۔ وھدے کہ بلوچستان آزات بیت گُڑا پاکستان ءَ کس ارزشت نہ دنت ھمے داب ءَ میان اُستمانی مُلکاں چہ پاکستان ءَ پنڈگ ھم نہ رسیت۔ بلوچستان ءِ آجوئی نہ ایوکا بلوچاں پہ وشیں بانداتے کاریت بلکیں اِے سرجمیں (Region) ءِ امن ءُ وشھالی ءِ ھاترا کار کنیں۔
میجر گورو آریا : ھیربیار مری ساب تئی گپ من ءَ دوست بوھگ ءَ اَنت، پاکستان ءِ وتی ادارھانی رپورٹ ءِ گوْشگ ءِ پرمان ءَ 2048 ءَ داں پاکستان ءَ چینی مھلوک ءِ آبادی گیشتر بوھگ ءِ گُمان ھَست اِنت اِے وھد ءَ پاکستان چائنا ءِ مھلوک ءَ دراجیں مُدّتے ءَ پہ ویزہ دیگ اِنت پیسرا ما اِشکُتگ کہ روکپت ءَ پاکستان ءُ گوریچان ءَ چین بَلے نُو انچو سما بوھگ اِنت روکپت ءَ ھم چین ءُ گوریچان ءَ ھم چین، تئی گپ ءَ گوں من تپاک کن آں کہ بلوچستان ءِ تہ ءَ چین ھندوستان ءِ ھلاپ ءَ پوجی تیاری کنگ اِنت چیا کہ بلوچستان گواجناں چہ سرریچ اِنت ءُ ھمے راہ ءِ سرا اِنت ھم۔ مرچی باند ءَ بلوچانی سرا لَٹ ءُ کُٹ بوھگ اِنت اگاں ھندوستان وتی چَم ءُ گوشّاں بند بہ کنت کہ بلوچستان ءَ آس روک بیت بِلّے بیت بَلے آ وھد دُور نہ اِنت کہ ھمے آس ھندوستان ءَ ھم مانپوشیت چیا کہ چین ءُ پاکستان تھنا بلوچستان ءِ تہ ءَ وتی ناشرکاریاں نہ دار اَنت ءُ ایمن نہ بنت۔
ھیربیار ساب، مئے ڈیپنس آپینس ءَ باز مھلوک چاریت چوشکہ سوشل میڈیا ءِ تندجاہ پیسبُک، ٹوئیٹر، یوٹیوب ءِ تہ ءَ مارا مھلوک شریں وڑئے ءَ چارنت ءُ گوشدارنت، من چہ ترا چے زانگ لوٹاں کہ تو ھندوستان ءِ ھکومت ءَ چے پیگام دیگ لوٹ ئے؟ مئے لوٹ ھمیش اِنت کہ اِے گند ءُ نند ءُ گپ ءِ رپ ءَ چہ ھندوستان ءِ (پالیسی ساز) ادارھانی تہ ءَ بیئس (بحث) دوبر بندات بہ بیت۔ وھد ءِ سرا گُشنت ما بلوچانی گون ءَ اِنت، بلوچ مئے برات اَنت، سنگت اَنت۔ اگاں بلوچ شمئے برات اَنت گُڑا زمین ءِ سرا چیزے بہ کن اِت پیش بہ دار اِت تھنا دپ ءَ گپ جَنّگ ءَ ھچ نہ بیت مئے ھکومت ءَ لھتیں اَمّلی (عمل) کار کنگ ءُ پیشدارگی اِنت۔ تو بُگش ھندوستان ءَ چے تئی لوٹ چی اَنت آئی ءَ چونیں گامگیج چِست کنگ لوٹیت، چوش کہ تو پیسرا گُشتگ اَت کہ ھندوستان وتی پارلیمنٹ ءِ تہ ءَ بلوچستان ءِ بابت ءَ یک کرار دادے دیم ءَ بیاریت، پارلیمنٹ ءِ تہ ءَ مَنّگ بہ بیت کہ بلوچستان زوربرد (قبضہ) بوتگ ءُ میان اُستمانی گَل (یو این) ءِ تہ ءَ بلوچانی بابت ءَ توار چِست بہ کنت ایشاں چہ اَبید تئی گوں ھندوستان ءِ ھکومت ءُ مئے اِستانی ادارھاں گون ءَ لوٹ چی اَنت ؟
ھیربیار مری : جی من گُشگ لوٹاں کہ ھندوستان ءِ ھکومت بلوچستان ءِ بابت ءَ گپ جَنّگ ءَ چے پیسر وت ھندوستان ءِ واستہ چیزے بہ کنت، شمئے راجی سوت (قومی ترانہ) ءِ تہ ءَ پنجاب ءُ سندھ ءِ نام ھَست اَنت شُما اَنگت وتی ھمے ھَندانی واتر ھندوستان ءَ ھوار کنگ ءِ داوا ھم نہ کُتگ، شمئے سیاستداناں پگر کنگی اِنت پاکستان نام وت پنجاب اِنت، شمئے راجی سوت ءِ تہ ءَ روچے کروڈ مھلوک سندھ ءُ پنجاب ءِ نام ءَ گیپت، شُمارا لوٹ اِیت شُما وتی بُنکی ھند (سندھ ءُ پنجاب) آں واتر ھندوستان ءَ ھوار کنگ ءَ پہ گامگیجے چِست بہ کن اِت۔
منی ھیالاں بلوچستان ءِ بابت ءَ بیوروکریسی ءِ بدلی ءَ وھد باز لگیت، سیاستدان پدا ھم وتی تب ءُ مئیلاں بدل کُت کن اَنت، بلوچستان ءِ واستا ءُ ھندوستان ءِ پائدگ ءَ پہ من کالج ءِ وھد ءَ یک چیزے مار اِتگ، وھدے من ھندوستان ءِ سنگتانی گون ءَ گپ کُتگ آھاں ھر وھد گُشتگ کہ اگاں پاکستان بہ پروشیت گُڑا ھندوستان ھم پروشیت، اِے کُجام سائنسی زانت اِنت کہ اگاں پاکستان پروشیت شُما ھم پْروش اِت؟ پاکستان یک پوجی آمریتے، پاکستان ءَ سیاسی سروک ھم پوج ءِ درچِنگ ءَ چہ اُگدھانی سرا کاینت، چوشکہ ھندوستان یک جمھوریتیں مُلکے شُما وتا اینچو نِزور چیا سرپد بئیت؟
میجر گورو آریا : ھیربیار ساب، تئی گپ راستی ءَ گوں بندوک اَنت، پاکستانی پنجابی ھروھد گُشنت کہ پاکستان ءَ جمھوریت اِنت، اِمران ھان سلیکٹڈے نہ اِنت الیکٹڈے، آ اُلُس ءِ آواز اِنت ءُ باجوا ءَ گوں آئی ءِ جیڑھاں ھچ دست ءُ داوا نیست، اِے گپّانی تہ ءَ چینچو راستی ھَست ؟
ھیربیار مری : جی باجوا رندی گپّے من گُشاں ھندوستان ءَ پہ جناہ اَنگت زندگ اِنت، بوت کنت پاکستان ءَ مُرتگ، جناہ اِے واستہ زندگ اِنت کہ آئی ءَ ھندوستان بَھر ءُ بانگ کُتگ۔ ایشی ءَ چہ رند لیاکت الی ھان، جنرل ایوب، جنرل یھیا، جنرل زیا الھک، زولپکار الی بُھٹو، بے نزیر بُھٹو، نواز شریپ ءُ مرچیگیں امران ھان اِے دُرست پہ ھندوستان ءَ جناہ اَنت چی ءَ کہ جناہ ءَ شمئے مُلک ھندوستان پروشتگ ءُ اِے مردم ھم شمئے کشمیر ءَ پروشگ ءُ بَرّگ لوٹ اَنت۔ شُما گَل مہ بئیت پاکستان شُمارا یل کنت یا آئی ءَ وتی پالیسیانی تہ ءَ بدلی آؤرتگ، اودا جمھوریت اِنت یا اِمران ھان اُلُس ءَ آؤرتگ، من شُمارا گُشگ لوٹاں کہ پاکستان ءَ کس پوج ءَ چے اَبید ھچ کُت نہ کنت، بس ھندوستان ءِ مھلوک ءَ اِے گپ وتی زھن ءِ تہ نندارینگی اِنت کہ جناہ پہ شُما اَنگت زندگ اِنت جناہ ءِ پالیسی ( ھندوستان ءَ پروشگ ءِ پالیسی) اَنگت زندگ اِنت، منانُک اَنّو دھلی ءَ بوتگیں جیڑہ اَنت، اودا ھندو ءُ مسلمانانی ءَ نام ءَ جنگے پیداک کنگ بوتگ اَت کہ اودا بازیں مردمے مُرتگ، اِے پاکستان ءِ نوکیں ٹیکٹیکل سُر ءُ پُرے کہ ھندوستان ءِ ھر ھَند ءَ گڑ بڑ کنگی اِنت پاکستان ءِ جیڑگ اِنت کہ کشمیر ءِ تہ ءَ ناشرکاری ءَ چہ آئی ءِ کارپد پَدّر بنت چوشکہ نُو ھندوستان ءَ کسان مزنیں توکی جیڑھانی تہ ءَ دَؤر کنگی اِنت ءُ دژمن ءِ دُرستیں پندلانی سرا آپ پریچگی۔
پاکستان ءَ دھلی ءِ تہ ءَ ھندو ءُ مسلمان یکے دومی ءِ ھلاپ ءَ بَرگ ءِ کوشست کُتگ، جناہ ھمینچو ھندوستان ءِ دژمن بوتگ، ھمینچو بلوچستان ءِ ھم دژمن بوتگ۔ جناہ ءَ بلوچستان زوربرد (قبضہ) کُتگ، ھمے وڑا آئی ءَ ھندوستان ھم پروشتگ، جناہ تھنا ھندوانی دژمن نہ بوتگ بلکیں آ مسلمانانی ھم بلاھیں دژمنے بوتگ۔ آئی ءَ مسلمان سئے بَھر ءَ کُتگ اَنت، بنگلادیش ءُ پاکستان چوشکہ آ پیسرا ھندوستان ءِ دمّگ بوتگ اَنت۔
آئی ءَ انگریزانی پندل دیما بُرتگ اَنت آ انگریزانی ایجنٹے بوتگ۔ نہ آ ھندوستان ءَ ھندوانی ھمدردے بوتگ نہ آ مسلمانانی توار بوتگ۔ اگاں ھندوستان بَھر ءُ بانگ مہ بوتیں مرچی ھندوستان اِے (Region) ءِ بلاھیں ءُ مُھکمے مُلکے بوتگ اَت ءُ اِد ءِ جاھمنند مسلمان ءُ ھِندواں ھوار دُرست مالی ءُ دگہ ھوالہ ءَ مُھکم ءُ وشھال بوتگ اِتاں۔ انگریز چالاک بوتگ اَنت آھاں دراج مُدتیں پندلے سازاِتگ۔ انگریزاں زانتگ کہ اگاں ھندوستاں یکّے بہ بیت انگریزاں چہ زیادہ مُھکم تِر بیت، انگریزانی گِر ءُ دار ءَ چہ درکئیت۔ انگریزانی پاکستان ءِ جوڑ کنگ ءِ مول ءُ مُراد ھم ھمے بوتگ کہ پاکستان انگریزانی ازمت ءَ بہ کنت ءُ آ اِے کار ءَ شریں وڑئے ءَ کنگ ءَ انت ھم۔
میجر گورو آریا : ھیربیار مری ساب، ھر وھد ءَ ما اِش کنگ اِیں کہ پاکستانی پوج بلوچستان ءَ مھلوک ءَ را لَٹ ءُ کُٹ کنگیں، مھلوک ءَ زور چِست کنگ ءُ بَرّگ ءَ اِنت، ما اِے ھم دیستگ کہ بازیں مردمے ءَ سلاہ چِست کُتگ ءُ کوہ ءَ درکپتگ اَنت بلوچستان ءِ آجوئی ءِ پہ جَنگ ءَ اَنت، پاکستانی پوج ءَ جَنّگ ءَ اَنت ءُ وت ھم شھید بوھگ ءَ اَنت، بلوچ راج اِے سلاہ بندیں جَنگ ءَ چون چاریت؟ بلوچستان ءِ زالبول ھم اِے جد ءُ جُھد ءَ پہ واھگدار اَنت، زھرشانی کنگ ءَ اَنت ءُ گُشگ ءَ اَنت کہ مئے لوگ واجہ کوھاں شُتگ اَنت ءُ وت اود ءَ روڈانی سر ءَ سیاسی دروشم ءَ زھرشانی کنگ ءَ اَنت، بلوچستان ءِ توار بوھگ ءَ اَنت۔
ھیربیار مری : سلاہ ءِ چِست کنگ ءِ جُست ءِ سرا من ترا دومی جنگ ءِ جھانی ءَ ھوالہ ءَ دئے آں، وھدے یورپ ءِ سرا جرمن اُرش کن اَنت، آھاں وتی پاسپانی کُتگ ءُ جرمن ءِ زورگیری (قبضہ گیری) نہ مَنّ اِتگ، مرچی اگاں بلوچستان ءِ بلوچ یا کُردستان ءِ کُرد وتی پاسپانی ءُ آجوئی ءَ پہ سلاہ چِست کن اَنت گُڑا آھاں ناشرکاری ءِ مُھر جَنّگ بیت، اِے دوپوستی یے، نازیانی گون ءَ جَنگ کنگ آجوئی، جمھوریت ءُ انسانی ھَکّانی واستا بوتگ، بَلے وھدے بلوچ وتی پاسپانی ءَ پہ سلاہ چِست کن اَنت آئی ءَ را ناشرکاری ءِ مُھر جَنّگ بیت چوشکہ پاکستان ءِ مئے ھلاپ ءَ دوستریں بُھتام اِنت۔ دگنیا ءَ زانگ لوٹیت کہ پاکستانیانی وھم ءُ گُمان ءَ ھم نہ بوتگ کہ آ پاکستانے جوڑ کن اَنت، بَلے ھما وھد ءَ بلوچستان دگنیا ءِ نکشہ ءِ تہ ءَ بوتگ، اِے مئے پِت ءُ پیروکی زمین اِنت، ما وتی تاریکی پَجّار ءَ دروگ ءُ بے بُنیں ریاستے ءَ پہ پرچا کُربان بہ کن ئے؟ وتی دیریگیں تاریک ءَ یل کنگ ءُ وتا پاکستانی گُشگ وتی جند ءَ بے شرپ کنگ ءُ وتی بستار ءِ کم کنگ اِنت۔ پاکستانی پروپکنڈھے کہ آئی تہ ءَ مھلوک ءَ گُشگ بوھگ کہ پاکستان ءِ متلب لا الہ الا اللہ اِے دُرست جوڑینتگیں کسّہ اَنت دانکہ مھلوک ءَ بے وکوپ ءُ گڑ ءُ منج بہ کنت ءُ آھانی زھن ءَ مزھبی گنوکی ءَ گیش بہ کنت دانکہ آ مزھب ءِ نام ءَ کارمرز بہ کنت ءُ پاکستان ءِ سلکاری ءُ پاکستانی پنجابیانی پائدگانی پاسداری ءَ بہ کنت۔
ھندوستان ءَ لوٹیت کہ پاکستانی پنجاب ءُ سندھ ءَ دوبر ھندوستان ءَ ھوار کنگ ءَ پہ گامگیجے چِست بہ کنت، پنجاب بلوچستان ءُ سندھ ءِ مڈّیاں لُٹ ءُ پُل کنگ ءُ ھندوستان ءِ ھلاپ ءَ کارمرز کنگ اِنت، پھٹانانی ورناھاں ھندوستان ءِ ھلاپ ءَ کارمرز کنگ اِنت، وھدے منی پِت نواب ھیربکش مری افغانستان ءَ بوتگ آئی ءَ سویت یونین ءِ پروشگ ءَ چہ رند پاکستان ءِ دوستیگیں تالبانانی کُمک ءَ بلوچستان ءَ راہ دیگ بوتگ، تالبانانی لوٹ بوتگ کہ نواب ھیربکش مری دگہ مُلک ءَ نہ بلکیں واتر بلوچستان ءَ راہ دیگ بہ بیت۔ من وھدے 1992 ءَ واتر بلوچستان ءَ شُتگ آں گُڑا من اودا دیستگ کہ مُلا ءُ جھادی کشمیر ءِ جھاد ءَ پہ پوست ءُ چندہ یکجاہ کنگ ءَ بوتگ اَنت، منی گُشگ ءِ مول ایش اِنت کہ پاکستان ءِ نیمگا کشمیر ءِ جھاد ھچبر ھلاس نہ بیت ھندوستان اِے سوچ اِیت کہ کمو مالی بکشیش دیگ ءَ پہ پاکستان وتی پالیسی ءَ بدل کنت یا شر بیت گُڑا اِے بوت نہ کنت۔ پاکستان ءَ چہ امریکہ ءَ بلین ڈالر زُرتگ آئی ءِ کیسگ اَنگت ھالیگ بوتگ اَنت، امریکہ ءَ چہ زَرّ ئے زُرتگ ءُ پد ءَ وتی (پراکسی) آنی کُمک ءَ چہ امریکہ ءِ سئے ءُ چار ھزار پوجی کُشتگ اَنت ئے۔ پاکستان امریکہ ءِ لالچ ءُ زور دیگ ءِ سرا نئیتکگ گُڑا ھندوستان ءِ نیمگا داتگیں داتگیں لب ءُ لالچ ءَ پہ چون کشمیر جھاد ءَ چے دزکش ءَ بیت ؟
ھندوستان ءَ یک مُھکمیں گامگیجے چِست کنگی اِنت ءُ بلوچانی سْرپ ءَ اوشتگی اِنت۔ ھمے وڑا بلوچانی زالبول دگّانی (سڑک) سرا وتی راج ءِ توار ءَ چِست کنگ ءَ اَنت ءُ مئے مھلوک کُربانی دیگ اِنت آ پاکستان ءِ وھدی ءُ دروگیں پجّار ءِ منّگ ءَ تیار نہ اَنت۔ مارا پہ وتا پاکستان گُشگ یک دُژمانے، بلوچ ءَ وش نئیت کہ کس ئے آئی ءَ پاکستانی بُگشیت، مسلمانی نام ءِ سرا پاکستان ءَ مئے زمین زوربرد (قبضہ) کُتگ بَلے مئے گون ءَ برابری بنیاد ءَ براتی نہ کُتگ۔ منی راج ءِ سرا لَٹ گواری کُتگ، پاکستانی ٹارچر سیلاں چہ سلامتی واتر آؤکیں بلوچے ءِ گُشگ اَت کہ وھدے پنجابی پوج آھان ءَ گار ءُ بیگواھی ءَ رند تیر جَنّگ ءَ بوتگ اَنت گُڑا آیانی سپاھیگ اللہ اکبر کنگ ءَ بوتگ اَنت انچو سما بوتگ کہ آ یک کاپِرّے ءِ سرا تیرگواری کنگ ءَ اَنت۔ مئے سرا تیرگواری ءِ وھد ءَ اللہ اکبر کنوکیں پاکستانی نہ زان اَنت کہ بلوچ ایشاں چے باز پیسر مسلمان بوتگ اَنت ءُ پاکستانی کدی مُسلمان جوڑ بوتگ اَنت، پاکستان کدی پہ اسلام ءِ ٹھیکیدار جوڑ بوتگ، آ مارا اسلام ءِ درس ءَ دئینت؟ ما پاکستانیاں چے شرتریں مسلمانیں۔ مئے کِرا اسلام ءِ بُنکی دروشم اِش اِنت ھندو، کرسچن، مسلمان، بُدھ مَت یا سکھ دُرستاں برداشت بہ کن دُرستانی گون ءَ براتی ءُ برابری بنیاد ءَ سیادی بہ بنت۔ پاکستان ءِ اسلام ھمے گُشیت کہ نہ بلوچ، ھندو، سکھ، مسیھی، ءُ بُدھ مَت دُرستان ءَ بہ جَن ءُ ھلاس کن، ایشی ءَ پہ ما تیار نہ ئے ءُ ما گنوکیں سوچ ءِ ھلاپ ءَ جَنگ کنگ اِیں۔ ما وتی پِت ءُ پیروکی انسانی سیادی بزاں ھِندو، سکھ ءُ دگہ مزھبانی پاسپانی کُتگ ما ایشانی اِے انسان دوست ءُ مزھب دوستیں پالیسیاں دیم ءَ بَرّگ اِیں ءُ چاگرد ءِ دیمروئی ءَ پہ کار کنگ اِیں۔
میجر گورو آریا : جی راست اَنت بلوچ راج یک انسان دوستیں راجے، ھر مزھب ءِ سِتک داروکانی باز ازت ءُ شْرپ ءَ کن اَنت، ھنگلاج ماتا (نانی مندر) بلوچستان ءَ اِنت اود ءَ روچ مروچ ( پوجا پاٹ) بیت، مئے مزھب ءَ را بلوچاں باز اِزت ءُ شرپ داتگ ءُ پاسپانی ھم کُتگ۔
ھیربیار مری ساب اگاں بچارئے مزھبی گنوکی سرجمیں پاکستان ءِ کُنڈ کُنڈ ءَ ود اِتگ، سھودی ءُ دومی مُلکاں چہ ایشاں زَر رسگ اِنت، پاکستان ءَ بلوچستان ءَ مدرسہ پچ کنگ بندات کُتگ، پاکستان لوٹیت کہ بلوچستان ءَ ھم آ اسلام ءُ مزھب ءِ نام ءَ (ریڈکیلائزیشن) بہ کنت، بلے بلوچستان اِے ھَند ( ریجن) ءِ اولی بَھر اِنت کہ اد ءِ مردماں چہ وتا مزھبی گنوکی ءَ چہ دُور داشتگ آ اَنگت ایشی ءِ زدّ ءَ نئیتکگ اَنت۔ اود ءَ راج دوستی ءِ جزبہ باز گیش اِنت۔ ھمے جزبہ من سندھ، گلگت بلتستان ءُ پاکستانی زوربردیں (مقبوضہ) کشمیر ءَ نہ دیستگ۔
بلوچانی تہ ءَ ھمے جزبہ چون پیداک بوتگ کہ مُلک ءِ واستا وتی جانانی دیگ؟ اِے سرھال ءِ سرا تو چیزے دانک بُگش۔
ھیربیار مری : مئے راجدپتر، مئے چاگردی روتگ انچو مُھکم اَنت کہ آ پاکستانی دروگیں پروپکنڈہ ءَ چہ ھراب نہ بوتگ اَنت۔ بوت کنت لھتیں ناسرپدیں ورنا بوتگ اَنت آ پاکستان ءِ پندل ءِ آماچ بوتگ اَنت ءُ کشمیر ءَ شُتگ اَنت جنگ اِش کُتگ۔ من 1992 ءَ افغانستان ءَ چے بلوچستان ءَ واتر اَتکگ آں۔ من رسانکدرانی تہ ءَ ونتگ اَت کہ پنجگور ءِ پنچ بلوچ ورنا کشمیر ءِ جھاد ءَ شھید بوتگ اَنت۔ ما افغانستان ءَ بلوچستان ءِ آجوئی ءِ جُنز ءَ پہ کارا بوتگیں من زیادہ روس ءَ ھم شُتگ آں۔ وھدے ما بلوچستان ءَ اَتکگیں ما دیستگ کہ پاکستانی پوج ءَ بلوچستان ءِ اُلُس ءِ یک بَھرے بلوچ راجی جُنز ءَ چہ دُور کُتگ۔ آھان ءَ مزھبی گنوکی نیمگا گامزن کُتگ ءُ کشمیر ءِ جنگ ءَ پہ راہ دیگ لوٹ اِتگ اَت۔ وھدے مئے وتن دوستیں لَشکر (فورس) افغانستان ءَ چے بلوچستان ءَ کئیت ءُ سرجمیں بلوچ چاگرد ءِ تہ ءَ دؤر کنت مھلوک ءَ را سرپدی دنت کہ پاکستان ءِ دروگیں پجّار نہ منّگی اِنت مئے وتن دوستیں لَشکر ءِ کوشست ءَ چے پاکستان ءِ اِے پندل بے سوب کُتگ ءُ بلوچان ءَ پد ءَ واتر راستیں راہ ءَ آورتگ۔ مئے جپاہ ءُ کاراں چے بلوچ راج پد ءَ گوں جُنز ءَ ھمگرنچ بوتگ۔ تو دیستگ کہ گوستگیں بیست سالانی تہ ءَ بلوچ پہ کشمیر یا افغانستان ءَ جھاد ءِ جنگ کنگ ءَ پہ نہ شُتگ۔ یک ءُ دو ناسرپدیں بوت کنت شُتگ اَنت بَلے گیشتری اُلُس وتی گُلزمین ءُ مُلک ءِ پاسپانی ءَ پاکستان ءِ ھلاپ ءَ جنگ کنگ ءَ اَنت۔ انوگیں وھد ءَ ھچ بلوچ ھندوستان یا افغانستان ءِ ھلاپ ءَ جنگ کنگ ءَ نہ اَنت۔ راجدپتر گُشیت کہ بلوچ مِسر ءِ شھر ھَلب ءَ چہ اَتکگیں مئے ھزاراں سالی ئیں راجدپتر مارا دومی مزھب ءِ ازت ءُ برداشت ءِ درس ءَ دنت۔ مئے اِے کوھنیں راجدپتر ءَ را پاکستانی ساز ءُ باز ءَ اسر کُت نہ کُتگ۔
مئے لھتیں نادانیں سنگتاں گُشتگ کہ بلوچ مئے برات اَنت ما بلوچستان ءِ توار ءَ چِست کن ئے بَلے آھانی ھچ کار گِندگ ءَ نئیتکگ۔ پاکستان ءَ مئے راج ءَ را گیشتر لگتمال کُتگ۔ انّو پاکستان سھودی ارب، امارات ءُ دگہ مُلکاں چہ پِنڈگ زورگ ءُ بلوچستان ءَ مدرسہ جوڑ کنگ اِنت ءُ گوستگیں ھِشت ماھانی تہ ءَ اِے کار ءِ ھمنواہ گیشتر گِندگ ءَ اَتکگ۔ اَشکنگ ءَ پیداک اِنت انوگیں وھد ءَ لھتیں بلوچ کشمیر ءِ جھاد ءَ جَنّگ بوتگ۔
ھمے نادانیں سنگتاں بلوچ ءِ واستا توار چِست کنگ ئے گپ وَ کُتگ بَلے مئے توار شریں دابے ءَ دیم ءَ نہ بُرتگ من روس ءَ اھوالکاری ءِ ڈگری گیپتگ وھدے روس پروشت ھما وھد ءَ ھم من وتی ھم پگریں (ڈیموکریٹس) ایں سنگتانی کُمک ءَ وتی سپارتی گاڑی ءِ گون ءَ آھان ءَ ورگ دیگ ءَ شُتگ آں۔ سویت یونین ءِ پروشگ ءَ چے رند من زیادہ ءَ افغانستان ءَ شُتگ آں۔ اودا روس ءِ ھپتاد ٹن بروکیں اِے وھد ءِ روسلان جھاز، افغانستان ءَ پہ ورگ، دوائی ءُ دگہ کُمکی سامان بُرتگ اِش۔ یک روچے یک اھوالکارے روس ءِ یک وزیرے ءَ چہ جُست کنت کہ سویت یونین پروشت، روس جوڑ بوت انگت ما پرچہ افغانستان ورگ ءُ کُمک رسینگیں؟ ھمے وزیر ءَ باز جوانیں پسّوے داتگ کہ اگاں ما افغانستان ءِ اُلُس ءِ کُمک نہ کُت گُڑا آ گُشنت کہ روس ءِ راج ءَ مئے کُمک نہ کُتگ۔ مئے نزیکی گوں افغانستان ءِ راج ءَ اِنت اِے نہ کہ زور کئی اِنت۔ ھمے داب ءَ ھندوستان ءُ بلوچستان ءِ راج ءِ نزیکی ھم یکے دومی ءِ گون ءَ اَنت۔ ما ھندوستان ءِ اُلُس ءَ چہ اُمیت واریں باند ءَ اگاں بلوچ ءِ سرا جنجالے بئیت آ ھندوستان ءِ راج ءَ چہ گِلگ کنت۔ شمئے راھشون ءَ بوت کنت بیھال کنت بَلے راج یات کنگ بیت۔ شمئے سروکان گُشنت کہ آ بلوچانی واستا توار چِست کن اَنت بَلے وھدے آ بلوچانی گون ءَ نہ اوشتیت تاں کُمک نہ رسگ ءِ سوْب ءَ مئے مھلوک گِلگ الّم کنت کہ تو آ وھد ءَ کُجا بوتگ ئے کہ مارا کُمک ءِ زلورت بوتگ۔
میجر گورو آریا : ھیربیار مری ساب، تو مارا بُگش کہ پاکستانی پوج ءِ تہ ءَ بلوچ رجمنٹ ءِ نام ءَ یک رجمنٹے ھَست بَلے وھدے من جُست ءُ پُرس کُتگ تاں ھمے بلوچ رجمنٹ ءَ بلوچ سک کم اَنت، ھمے رجمنٹ ءَ گیشتر پنجابی اَنت۔ مئے ھندوستان ءَ سکھ رجمنٹ ھم ھَست، منی سیادی گوں کماو رجمنٹ ءَ اِنت ھمے رجمنٹ آں ڈنی ھم ھَست اَنت بَلے گیشتری نیم ھماھانی بنت کہ آھانی نام ءَ اَنت سکھ رجمنٹ ءَ سکھ گیشتر اَنت ءُ کماو رجمنٹ ءَ کماونی ءَ چہ زورگ بنت۔ پاکستان ءَ بلوچ رجمنٹ جوڑ کُتگ بَلے لھتیں بلوچ زرتگ ئے بس پہ پیشدارگ ءَ دگہ دُرست پنجابی اَنت اِے متلب چون ؟ بھروسہ ءِ نیستی اِنت یا دگہ جیڑھے ؟
ھیربیار مری : جی، پاکستانی پوج ءِ تہ ءَ انوگیں بلوچ رجمنٹ ءِ پُژدر ایش اِنت کہ وھدے برتانیہ بلوچستان ءِ سرا زورگیر بوتگ ھما وھد ءَ انگریزاں اِے رجمنٹ جوڑ کُتگ وھدے برتانیہ بلوچستان ءَ چہ درکئیت انگریز ھم اِے رجمنٹ ءَ چہ درکاینت، بلوچ ھم درکاینت تھنا رجمنٹ ءِ نام پشت کپیت۔ ایشی ءَ را رند ءَ پد ءَ پاکستان بلوچ رجمنٹ ءِ نام ءَ چہ دیما کاریت۔ پاکستان شریں وڑئے ءَ زانت کہ ھچ بلوچ پاکستان ءَ پہ جنگ نہ کنت۔ لھتیں کم زانت ھَست کہ پاکستان ءِ پروپکنڈہ ءِ آماچ بنت بوت کنت لھتیں تُرس ءَ چہ مجبوری ءَ چے وتارا پاکستانی گُشیت دل ءَ چے ھچ بلوچ وتا پاکستانی منّگ ءَ تیار نہ ئے۔ انوگیں وھد ءَ ھم اگاں یکّے ساپ ءُ نیامی رائے یے ءِ جوڑ بوتگیں گیلپ پولے ایر بہ بیت راستی وت پدّر بیت کہ سد در سد بلوچ پاکستانی (نظام) ءَ نہ مَنّ اَنت۔ پاکستانیت بلوچ ءِ سرا زور مُشّگ بوتگ بَلے پاکستان ءِ واستا جنگ کس نہ کنت۔ ما اِشکُتگ کہ وھدے بلوچ بنگلادیش ءِ جَنگ ءَ شُتگ اَنت تاں آھاں بنگالی آجوئی دوستیں مھلوک ءَ گوں سنگتی کُتگ آھان ءَ گُشتگ اِش کہ بجّن اِت اِے پاکستانی پوج ءَ را ۔ زانگ بیت کہ بلوچ ءِ ابرم ءَ پاکستانیت نیست۔ من وتی بلوچاں گُشگ لوٹاں کہ مجبوری بیت یا کُجام ھم جنجال ءُ جیڑہ ساپ ساپ بُگش اِت کہ پاکستان مئے دژمن اِنت۔
مئے ھزاراں سالی ئیں راجدپتر اِنت من وتی بلوچ بوھگ ءِ سرا پھر بنداں۔ ھمے داب ءَ یک ھندوستانی یے ءَ ھم وتی پنچ ھزار سالی راجدپتر ءِ سرا پکر اِنت۔ پاکستان ءِ وتی ھچ راجدپتر نیست، پشلّی ءَ آ برے گُشنت آ ارب اَنت، برے گُشنت آ تُرک اَنت، برے گُشنت آ ایرانی اَنت۔ راستی ایش اِنت پاکستانی بُن ھِشت ءَ چہ ھندوستانی اَنت آھاں وتی مزھب بدل کُتگ ءُ مسلمان بوتگ اَنت نام زُرتگ ارب، تُرک ءُ ایرانیانی۔ نہ اِے ادیگ اَنت نہ اُدویگ اَنت۔ اِے بیچارگیں پاکستانیاں وتی راجدپتر ھم بیھال کُتگ۔ اِے پریشان اَنت کہ اِے برو اَنت تاں کُجا؟ نی کس ایشاں وتیگی نہ کنت۔ پاکستانی مردماں وتی پجُار نیست اِنت ۔ایشانی مُلک ءِ نام ( پاک ستان ) اِنت۔ منی گُشگ اِنت پاک کس نہ اِنت۔ مئے مزھب ءِ تہ ءَ گُشنت پاک تھنا اللہ ءُ آئی ءِ رسول اَنت۔ مُلکانی تہ ءَ چے چے گَندگ کاری بیت۔ اِے چون پاک گُشگ بنت؟ پاکستان وتی دروگیں پگر ءُ لیکھانی سرا پنجاب راج ءَ را رد دات کنت بَلے بلوچ ءَ رد دات نہ کنت۔
میجر گورو آریا : ھیربیار ساب، تئی ھیال چی اِنت، دیم ءَ پنچ، دہ یا پانزدہ اِیں سالانی بلوچستان آؤکیں وھد ءَ تو چون چارئے۔ یک مُلکے وتی آجوئی ءَ پہ تچ ءُ تاک کنگ اِنت بلوچستان ءِ جُنز ءَ تو کُجام جاہ ءَ داں سر بوھگ ءَ گندگ ئے؟
ھیربیار مری : مئے ایمان ءُ جزبہ اِنت کہ ما روچے نہ روچے الّم ازات بہ اِیں۔ مئے چمانی دیم ءَ ھندوستان برتانیہ ءَ چہ آزات بوتگ، روس دوسد سالی جد ءُ جُھد ءَ چے رند منگول ءِ چَنگُلاں چے آزات بوتگ، مئے آجوئی ھم پَکّا اِنت۔ دہ یا پانزدہ چینچو ھم سال بہ لَگیت مئے آجوئی ءِ جد ءُ جُھد ھچ وڑا نہ اوشتیت۔ بِلّے کہ پاکستان مئے سرا وڑ وڑ بُھتام ایں مُکدمات جوڑ بہ کنت۔ مارا ناشرکار بُگش اِیت۔
اِے وھد ءَ من وتی ھمساھگیں ءُ براتیں مُلک ھاس ھندوستان ءَ گُشگ لوٹاں کہ تو ھم امریکہ ءِ گوستگیں پاگواجہ (صدر) روزولٹ ءِ وڑا پیسلہ داریں کدمّے چِست بہ کن دومی جنگ ءِ جھانی وھد ءَ آئی ءَ اٹلانٹک چارٹر آؤرتگ ءُ یورپ ءَ گُشتگ کہ آئی ءَ وتی کالونی آن ءَ آجوئی دئیگی اِنت۔ آئی ءَ اِے پیسلہ ءَ چہ بازیں یورپی مُلکے ءَ آجوئی گیپتگ۔ ھندوستان ءِ سروکاناں ھم ھمے وڑیں گامگیجے چِست کنگی اِنت۔ شما گُشئے کہ ھندوستان بلاھیں مُھکمیں مُلکے۔ شُما مارا وتی ھمساھگیں مُلکے ءِ مَنّگ ءَ ھم تیار نئے۔ مارا چے ھرچی بوت کنت ما کنگ اِیں۔ چائنا ءِ ارادگ ءِ ھلاپ ءَ ءُ پاکستانی زوربردی (قبضہ گیریت) ءِ دارگ ءَ پہ ما وتی وس ءُ واک ءَ کار کنگ اِیں۔ ما سرپد بہ اِیں کہ بلوچ وتی ھمساھگیں ءُ دوستیں مُلک ھندوستان ءَ چہ گیشتر کار کنگ اِنت۔ ھندوستان ءِ گوْرا مڈّی ھَست مئے بلوچانی گوْرا مڈّی نیست۔ ھندوستان وتی زور ءُ مڈّیاں شریں وڑئے ءَ کارمرز کنگ ءَ نہ اِنت۔ پاکستان ءَ بچار آ ھر ھند ءَ کشمیر ءِ سر زاھری ھمایت ءَ کنگ اِنت۔ انّو یورپ ءَ دُرستانی گوشّاں کشمیر ءِ توار رسینتگ ئے کہ کشمیر ءَ زُلم بوھگ اِنت، کشمیر زوبرد (مقبوضہ) اِنت۔ ھندوستان ءَ انسانی ھمدردی ءِ بنیاد ءَ ھم بلوچستان ءَ پہ ھچ نہ کُتگ۔ من ھر وھد شمئے دانشورانی مزمون (مضامین) آں چاراں آھانی تہ ءَ آجوئی دوستیں بلوچانی نیام ءَ آ بھر ءُ بانگی یک لکیرے کشگ ءَ اَنت۔ پلاں آجوئی پسند بلوچ مڈل کلاس ئے، پلانی اپر کلاس، پلان ءَ جنگول ءِ سیادی گوں مڈل کلاس ءَ اِنت، پلانی سردار کلاس ئے، اِے وڑیں ھیال پاکستانی پروپکنڈہ ءُ بیاناں مُھکم کن اَنت۔ چوش کہ بلوچستان ءُ ھندوستان دوئیناں پہ پائیدگ مند نہ اَنت۔ گپ وھدے آزاتی دوست ءُ آزاتی ءِ جنگولانی سرا کئیت گُڑا کلاسی گپ ءُ سوچ ءِ ھچ گُنجائش پشت نہ کپ اِیت۔
میجر گورو آریا : ھیربیار ساب، تو بلکل راست گُشگ ئے من پد ءَ واتر ھمے گپ ءَ گُشگ لوٹاں کہ ھندوستان ءِ چپّی دست ءَ لھتیں انچیں دانشور ءُ سیاستدان نشتگ۔ آھاں پہ وتا یک ھاسیں زھنیتے جوڑ کُتگ۔ بلوچستان ءَ پہ ایشانی مئوکپ چَپ وَ ھَست اِنت بَلے من ایشان ءَ ھندوستان ءِ دژمن ھم سرپد باں۔ اِے وڑیں سوچ داروکیں مردم راستی ءَ سرپد نہ اَنت۔ مارا ایشانی دیم ھم دارگی اِنت۔ ھیربیار ساب یکبرے پد ءَ تئی باز باز منتواراں کہ تو وتی گران بھائیں وھد کَش اِت ءُ مئے گون ءَ گپ کُت ءُ مئے چاروکاں پہ وتی ھیال درشان کُت اَنت۔
بلوچستان زندگ بات