سد سلام کاھان ءِ شھیداں بات
مَکھیں مات ءَ پہ سر اِش بکشات
سُهر سریں تیراں ما سینگ ءَداراں
آ میار جل اَنت ءُ مَڑاه داراں
پد نہ کِنزاں چہ سنگر ءَ جنگ ئے
پہ بلوچی شان ءُ گیرات ءَ نَنگ ئے
اے نواب بابا ئے یلیں بچ اَنت
پاکیں ایمان ءُ باتن ءَ سچ اَنت
میریں بالاچ ءِ همبل ءُ یاراں
پیریں مرد ئے آ سنگر ءَ داراں
رومب اِتگ دژمن سُھب ئے آتھار ءَ
دیم پہ سیاہ کوہ ءُ پیرکوھے گار ءَ
داہ ھزار پوج اَت موٹل ءُ گاڈی
گون اِتا دلار ءُ مُکبر ءُ سیاڈی
بالی ءُ جِٹاں پوش اِتگ آزمان
کُنگریں بچانی نہ روت اُستمان
ھون ریچ اَنت ڈیھہ ءَ بیراھیں سر
آجوئی جنگ ءَ گام پہ گام پیسر
دژمن ءِ تْر ایت ءُ تیر جنت دُور ءَ
داشتگ سنگر گھمر خان ءِ گُرا
گوں حمید ءُ پُلیں تل خان ءَ
شادی ءُ ابوبکر ءُ جمیل جان ءَ
جی کریم ءَ بات ءُ نصرت ءَ پُلیں
سیاہ جگر ءُ ورنا آں مِڑوک مَلیں
کُت وتا راجی دپتر ءَ نامدار
بیت توسیپ سرانی زیب ءُ سار
دژمن ءَ سوچ اَنت ءُ دیاں آس ءَ
پہ وتی مُلک ءُ ڈیھ ءُ میراس ءَ
در کپ اَنت آجوئی ءِ مادنیں راہ ءَ
پہ وتن کُربان کن اَنت ساہ ءَ
الم ءَ کیت ایں وشیں باندات ئے
تھپہ ءِ راج ءَ جوانیں سوگات ئے
شاعر۔۔ زھیر پُل
