چیرجنگ (دی گْوریلہ وار)

نبشتہ کار: ھُدا وشک ءُ مھمد پاروک بلوچ

ھمگام بلوچی

اولی بھر

اے گپ ءَ ما دْراھیں بلوچ جْوان سرپد ءُ زان ایں کہ دنیا ءِ تہ ءَ زیردستیں راجانی بُنگیج کتگیں چیرجنگ (گْوریلہ وار ) پہ وتی راجی آجوئی ءُ ڈیھ ءِ وتواجھی ءِ جُنزاں سد در سد سوبین بیتگ ءُ زیردستی ءِ سانکل سِستگ ءُ آجو بیتگ انت۔ بِل اِت ئِے کہ کمیں دیر ءُ کمیں زیت البت سوب اش پَکّ زورتگ ءُ ماں جنگ ءِ پِڑ ءَ یکمُشت ءُ گیدی ءِ بلاھیں بلاھیں زوراکاں پروش دات بلے لھتیں وتگڑیں چیرجنگ ھست انت کہ چَہ آیانی نابودی ءُ بے ابرامی ئیں جُھدانی سوب ءَ بے سوب بیتگ انت انچشوکہ ھندوستان ءِ بگیری ءَ کشمیر، ھستیں وھد ءِ اوگانستان ءَ تالبانانی چیرجنگ ءُ اسرائیل ءِ بگیری ءَ پلستینی اَربانی چیرجنگ کہ آیاں چیرجنگ ءِ نام بنام کت ءُ ایشانی بے سوبی ءِ بابت ءَ من نبشتانک ءِ گڈی بھر ءَ گپ جن آں۔

پیسر ءَ ما گْوریلہ وار (چیرجنگ) ءِ بارو ءَ گپ جن ایں کہ اے چونیں جنگے ءُ ایشی ءِ راجدپتر ءُ رھبند چے اَنت۔ چوناھیگا اے سپینش گالے کہ ایشی ءِ اولی بَھر کہ “گْورا” انت، بزانت ” جنگ” اِنت ئِے ءُ دومی بَھر “یِلہ” ءِ بزانت “ھلاسی” انت بزاں “جنگ ءِ ھلاسی” ھما جنگ کہ درآمدیگی زورانسریں دژمن ءَ تئی سر ءَ بُنگیج کت، تئی ڈیھ ئِے زیردست کت ءُ پہ تئی راجی پجّار ءَ گار ءُ بیگواہ کنگ ءَ تئی چُکچینی ءَ کنگ انت گُڑا تو پہ ھمے جنگ ءِ ھلاس کنگ ءَ دژمن ءِ سر ءَ جنگ بہ کن ئے۔ دومی بزانت ایش انت ئِے کہ چیرجنگ ھما نزوریں راجانی جنگی جُنز انت کہ زیردستیں راج ءِ راجی زرمبشت ءَ سرپد ءُ آگاھیں لس مھلوک بے لب ءُ لالچ ءَ بلاھیں زورآور ءُ ٹوھیں دژمن ءِ بَلدیں لشکر ءِ سر ءَ تْرُند ءُ ھبکّھیں اُرشاں کن انت ءُ دژمن ءَ جانی، زَرّی (اِکونومی)، کار ءُ باری نُکس ءُ تاوان دے انت کہ دژمن ءَ راج ءِ زیردست کنگ گِران کپ ایت۔

بزاں درآمدیگیں دژمن ءَ ھر وھد ءَ شپ داں روچ وتی مرزی ءِ ھساب ءَ کسانیں جنگانی بیھار ءُ سردردی ءَ بہ دے ئے کہ آئی ءِ جنگی تب پروش ایت ءُ دل سْیہ بیت، آئی ءَ زیردستی ءِ ھرچگاں گیشتر کنان ءُ بزگ ئِے کن ئے۔ ھمیشی ءِ سان دژمن ءِ راج ءِ لوگ لوگ ءَ کپ انت کہ دژمن ءِ لس مھلوک ءَ گِرانبھائی بیت ءُ دژمن جند ءِ تہ ءَ پروش ءِ مارشت ودی بنت ءُ جند ءِ لس مھلوک وتی راجداری ءِ سر ءَ اجبیں سوالاں جُست بہ گِر انت۔

ماں چیرجنگی ءَ گلامیں راجانی کسانیں جنگولی گل دژمن ءِ لشکری کاروان، بُنجل ءُ سنگرانی سر ءَ کمیں وھد ءُ ساھت ءَ اناگتی ءَ تْرُندیں جنگی اُرشاں کن اَنت ءُ ھاسکن ھما جاھاں کہ دژمن ءِ بیرانی ءَ جْوانیں موھے رس ایت، چَہ آئی ءَ پائدگ زور اَنت ءُ دژمن ءَ گیشتر زیانی دے اَنت۔ توری لد ءُ گیابان بِہ بنت توری کوھانی گَٹّ ءُ گَرے بِہ بیت یا توری دگ ءُ شھدگے بیت درآمدیں دژمن ءِ جنگی کاروان ماں کسانیں وھد ءِ تُْرند ءُ اناگتی اُرُشانی دیمپان بیت ءُ جانی تاوان ءُ بیرانی ءِ آماچ بیت ءُ دژمن ءَ انچو بے وانک ءُ ژند بیت کہ دژمن جنگ ءَ گیشتر وتی پھریزگ ءُ پدکِنِزگ ءِ بارو ءَ ھیال بہ کنت۔ گْوریلہ وار ءَ چیرجنگی جنگول وت ءَ را ماں کسانیں کسانیں گالانی تہ ءَ بَھر کن انت ءُ بازیں دمگ ءُ آتراپاں شِنگ ءُ شانگ بنت۔ جاورانی تب ءِ رِد ءَ وتی جِند ءِ موکل ءُ مرزی ءَ لڈ ءُ بوج کن انت ھچ وڑیں مُلکاری تبک ءِ سانمند نہ بنت۔

نی ما چیرجنگ ءِ تبکانی بابت ءَ گپ کن ایں کہ منی جِند ءِ پٹ ءُ پولکاری ءِ ھساب ءَ چیرجنگ دو رنگ ءِ بنت یکے کہ چیرجنگ ءِ گل وتی جِند سرکار ءِ زالمیں راجداری ءِ بگیری ءَ بُنگیج کنت ایشی ءَ را ما مُلکاری شست ءِ چیرجنگ گْوش ایں ءُ دومی کہ یک زیردستیں راجے ءِ ڈیھ یک درآمدگ ءُ زورآوریں راجے ءَ زیردست کتگ ءُ زیردستیں راج گوں ھمے درآمدگیں زورانسر ءَ ھچ وڑیں سْیادی یے نہ دار ایت ناں کہ زبان ءُ دودمان ءُ نیکہ دود ءُ ربیدگ ءِ نزیکی یے ھست انت ئِے انچوشکہ ھمے گلامی ءِ سانکلانی سِندگ ءِ چیرجنگ گْوش انت ئِے بزاں راجی آشوب ءُ زرمبش ءِ چیرجنگ مُدام سوبین بیتگ اَنت لھتیں سوبین بیتگیں چیرجنگانی درور ایش انت کہ چہ 1953 تاں 1958 ءَ پیڈل کاسٹرو ءُ چی گویرا ءِ سرکماشی ءَ کیوبا ءِ لشکری پُلامرزی ئیں زورانسری ئیں پاگواجہ پُلجینسیو بٹیسٹا ءِ بگیری ءَ چیرجنگ سوبین بیتگ ءُ چہ ھمے جنگ ءَ چیرجنگ ءَ بے کساس وشنامی یے گپت

“روان انت”