بلوچ راجی راھبر ءُ فری بلوچستان موومنٹ ءِ سروک ھیربیار مری ءِ ھندوستانی آن لائن تندجاہ the tilak chronicle ءَ گند ءُ نند ءِ بلوچی بَھر ھمگام ءِ وانوکاں پہ دیم ءَ آرگ بووگ اِنت اولی بَھر ھمگام بلوچی ھیربیار مری بلوچ راج دوستیں راھبرے اِے وھد ءَ آ لندن ءَ جاھمنند اِنت ۔ آ نواب خیربخش مری ءِ پنچُمی زَھگ اِنت ءُ فری بلوچستان موومنٹ ءِ جوڑ کنوک اِنت اِے گَلّ ءِ مول ءُ مراد بلوچستان ءِ آجوئی اِنت ۔ بلوچ راھشون ئے ھندوستان ءِ آن لائن تندجاہ the tilak chronicle ءَ مارک کنرا گون ءَ گند ءُ نند ءِ مول بلوچستان ءِ آجوئی ، بی ایل اے ، چائنا ءِ بلوچستان ءَ موجود بوھگ ، ھندوستان ءَ چہ بلوچانی اُمیت ، جنوبی ایشیا ءِ جاورانی سرا وتی ھیالانی درشان کنگ اِنت ۔ جُست : تو بلوچستان کدی ءُ پرچہ یلہ داتگ ؟ پسّو : من وتی زاتی کارانی سوْب ءَ 1999 ءَ لندن ءَ اتکگ آں آ وھد ءَ پاکستانی جنرل مُشرف ءَ منی ءُ مئے ھاندان ءِ مردُمانی ھِلّاپ ءَ بلوچستان ءِ مزنیں آمد گِس ءِ جج جسٹس نواز مری ءِ کوش ءِ کیس درج کُتگ ۔ آئی کوش ءَ چے اِستان ( ریاست ) ءَ یک تیرے ءَ چے دو شکار کنگ ءِ کوشست کُتگ ۔ آ کوش ءِ اولی مُراد ھمے بوتگ کہ آئی ءَ ایشی ءَ چے پیسر منی آریپیں پِت نواب خیربخش مری ( ھُدامُرزی ) گون ءَ ھال ءُ اھوال کُتگ ءُ بلوچستان ءِ مری ھَندّاں تیل ءُ گیس کَشگّ ءَ پہ کُمک لوٹ اِتگ چوش کہ ما نہ مَنّ اِتگ ۔ ما ھمے سرپد بہ اِیں کہ بلوچستان ءَ ھرچ دراؤکیں گواجِن بلوچ راج ءِ مَڈّی اَنت ۔ پاکستان ءِ اِے لوٹ ءِ نہ مَنّگ ءَ چے پاکستان ءَ دروگیں کیس جوڑ کُتگ ۔ آئی ءَ 500 مری ٹَکّ ءِ مردم زندانانی تہ ءَ بند کُتگ منی آریپیں پِتّ ءَ را ھم 18 ماہ ءَ زندان ءَ بند کُتگ ۔ وتی لوٹانی گَرز ءَ آئی ءَ مارا مُچّان ءَ سزا داتگ ۔ مئے سرا مُشتگیں بُھتام ( کہ زوت ایشی سرا سواڑگ بہ بیت ) ایشی ءَ اَبید 21 سال گوزگ ءَ چے رند ھم پاکستانی آمِد گسّاں مئے کیس ءِ تَکّ ءُ پھنات شریں وڑے ءَ گیش ءُ گیوار نہ کُتگ اَنت ۔ اِے نیام ءَ اِستان ءَ منی ھِلّاپ ءَ دو ءَ چے سئے کیس جوڑ کُتگ پد ءَ دُور کُتگ اَنت اِے تُرسینگے بوتگ ۔ آ من ءَ اِستان ءِ بَھر جوڑ کنگ ئے ءُ اُگدہ دیگ ئے کوشست کنگ دانکہ من وتی لوٹاں ( موقف ) ءَ چے پُشت ءَ بہ کِنزّاں من ایشانی اِے گواجار (offer) ءَ نہ مَنّ آں ۔ آ کیس جوڑ کن اَنت پد ءَ سلاہ کنگ ءَ پہ ھال ءُ اھوال کن اَنت من پد ءَ ایشانی گواجار ءَ نہ مَنّ آں ۔ پاکستان ءَ من ءَ بیھار داتگ ، لندن ءَ منی ھلاپ انٹرپول ءَ چے ریڈ نوٹس جاری کُتگ ناشر کاری ھِلّاپ ءَ کار کنوکیں آمِدگِسّاں بَرّگ ءِ کوشست کُتگ پاکستان ءَ وتی سرجمیں کوشست کُتگ کہ من ءَ بہ تُرسین اِیت بَلے شُکر اِنت کہ من وتی مکسد ءَ گوں بندوکاں ۔ من اَنگت وتی لوٹاں چے پد کنز نہ بوتگ آں من انگت وتی ڈیھ ءِ آجوئی ءُ وتی لَس مَھلوک ءِ واستا کار کنگ ءَ آں ۔ جُست : گوستگیں 21 سال ءَ پاکستان ءَ نہ شُتگ ئے ؟ پَسّو: من 1999 ءَ چے بلوچستان ءَ نہ شُتگ آں من ءَ گوں پاکستان ءَ ھِچ دست ءُ داوا نیست من بلوچستان ءِ جاھمنندے آں اگاں رواں گُڑا بلوچستان ءَ رواں ۔ جُست : بلوچستان ءِ آجوئی ءِ واستا بازیں سلاہ بندیں گَل ھَست اَنت امریکہ پرچہ بی ایل اے ءَ را ناشرکاریں گَلّے سرپد بوتگ ؟ پَسّو : 1996 – 1997 ءِ نزیک ءَ چوشکہ بلوچستان ءِ آجوئی ءِ سوچ ودّان اَت گُڑا آ بی ایل اِے آئی ءَ ھَرکس ءَ را مُھکم کنگ ئے ءُ بلوچستان ءِ آجوئی ءِ واستا کار کُتگ ۔ پاکستانی بی ایل ءِ گوں لَس مھلوک ءَ یکمُشتی ءُ روتگ جنوکیں سیادی ءَ چے تُرس ءِ آماچ اَنت ۔ 2000؁ ءَ پاکستان ءَ گوں برتانیہ ءَ تپاکی ءَ بی ایل اِے ءَ را ناشرکاریں گَلّے مَنّارینتگ ۔ پاکستان ءُ امریکائیاں اِے گپ ءِ سرگوشی ھَست اِنت ۔ پاکستان ءَ طالبانانی ھوری ءَ وتی ایجنڈہ دیم ءَ بُرتگ طالبان پاکستان ءِ ھاس ءُ ناس اَنت ۔ آھان امریکہ زور پِر داتگ ۔ امریکہ افغانستان ءِ ھوالہ ءَ ھاسیں نمائندگ زلمے خلیل زاد ءَ گوْشتگ کہ بلوچانی ھِچ کُمک کنگی نہ اِنت۔ اِے راستے کہ بلوچان ءَ ھِچ کُمک رسگ ءَ نہ اِنت ءُ اگاں افغانستان ءُ امریکہ ءَ بلوچانی کُمک بہ کُتیں گُڑا چیزاں دیمروئی کُتگ اَت ۔ من امریکہ ءِ بی ایل اِے ءَ را ناشرکاریں گَلّانی لڑّ ءَ ھوار کنگ ءِ سرا یک ٹوئیٹے ھم کُتگ کہ امریکہ ءَ سیکیولر برداشت کنوکیں ءُ بلوچستان ءِ آجوئی واستا تَچ ءُ تاک کنوکیں گَلّے ارزشت نہ داتگ چوش کہ ھِچ زبان ، ٹَک ، مزھب ءِ ھلاپ ھچبر نہ بوتگ۔ آئی بلوچانی سرجمیں ھوبیانی ھلاپ، طالبانانی سُنّی، جُتائیں زباناں ءُ ٹَک بزاں کلاسانی ھلاپ اَنت چو کہ تاجکّاں تاجکّ بوھگ ءِ سوْب ءَ کُش اَنت ، شیعاھاں شیعا بوھگ ءِ سوْب ءَ کُش اَنت ھندو ءُ سِکّھاں آھانی مزھب ءِ سوْب ءَ کُش اَنت ھما اَرزشت داتگ اَنت ۔ امریکہ ءَ پاکستانی جرنیلانی گپ گوْشداتگ کہ آھاں طالبانانی ھواری ءَ امریکہ ءَ چے زَرّ زُرتگ ءُ پد ءَ ھمائی ءِ لَشکر ءِ سپاھی کُشتگ اَنت بَلے امریکہ ءَ بی ایل اے ناشرکاریں گَلّے گچین کُتگ اِے بد بَھتی اِنت ءُ ایشان ءَ دیم ءَ اِے چیز باز گران ءَ کپان بیت ۔ جُست : بلوچستان ءِ جُنز ءَ میان اُستمانی کُمک پمیشکا نہ رسگ ءَ اِنت ایشی سوْب ایش بوت کنت کہ بلوچ تپاک نہ اَنت ایشانی کِرا مہاتما گاندی وڑیں راھبر نیست کہ بلوچان ءَ مُھکمیں دروشمے ءَ یکجاہ کُت بہ کنت ایشی سرا تو چیزے گوْشت کن ئے ؟ پَسّو : دژمن ( پاکستانی اسٹیبلشمنٹ ) ءَ اِے ناتپاکی پیداک اِے کار ءِ واستا دژمن ءَ ارباں ڈالر ھرچ کُتگ مردماناں مُھکمیں اُگدہ زمین دیگ ءِ واستا لَبّ ءُ لالچ داتگ بلکل ھمے وڑا کہ کہ برتانیہ ءَ ھندوستان ءِ مھلوک ءَ را گُلام دارگ ءَ پہ ھماھانی دولت زُرتگ ءُ پَد ءَ ھماھانی ھِلاپ ءَ کارمرد کُتگ ۔ مہاتما گاندی ھندوستان ءِ تاریک ءِ اولی راھشون نہ بوتگ آ دگہ راھشوناں چے یکّے بوتگ بھگت سِنگ ، سبھاش چندرا بوس ءُ جواہرلال نہرو ھم بوتگ اَنت تھنا گاندی ءَ نہ بلکیں اِے دُرستانی برورد ءُ دومی جنگ ءِ جھانی (جنگِ عظیم ) چے ھندوستان آجو بوتگ ۔ بازیں دُوری دژمن ءَ پیداک کُتگ ءُ دگہ بد بَھتی ءَ چے مئے وتیانی پیداک کُتگین اَنت۔ لھتیں ڈنّی کارستاں بلوچستان ءَ را بلاھیں لَشکری ارزشتیں چمّے ءَ چار اِتگ ءُ آھاں بلوچانی زھن ءَ بَھر ءُ بانگی توم ردوم داتگ ۔ وھدے ھندوستان ءِ سیاستدان ءُ اھوالکاراں ( صحافی) ” عام بلوچ ءُ بلوچ اشرافیہ ” وڑیں لبزانی کارمرد کنگ بندات کُتگ آ اسلّ ءَ زانت یا پہ نازانتی پنجابی اسٹیبلشمنٹ ءِ کُمک ءَ کنگ ءَ اَنت ءُ بلوچ کمیونٹی تہ ءَ گیشتر دُوری پیداک کنگ ءَ اَنت ۔ من وتی ھندوستانی دوستان ءَ گوْشگ لوٹاں اِے ھاس ءُ ناس والا ھیال ءَ مئے لَس مھلوک ءِ تہ ءَ پیداک مہ کن اِت بلوچ چاگرد ءِ جُتائیں نندگ ءُ پادایگ ءُ جتائیں زند گوازینگ ءِ دروشمّے ۔ مھربانی بہ کن اِت ایشی ءَ چے پیسر پوہ بہ بہ اِت ما ایران ءُ پاکستان ءِ دروشمے ءَ مئے مُلک زوربرد بوتگ۔ ھاس ءُ ناس ما دُرست ایران ءُ پاکستان ءِ گُلام جوڑ کنگ بوتگیں شُما مئے تہ ءَ تپاوت ءَ آرگ ءَ ئے چوشکہ ما دوئیں وتی آجوئی ھاترا شپ ءُ روچ کنگ اِیں ۔ اِے آجوئی جُھدے ما اِدا روسی کمیونسٹانی وڑا چاگردی رد ءُ بدلّی نیارگیں ۔ جُست : شمئے ھیالاں بلوچستان ءِ آجوئی واستا بے سلاہ بندیں جُھد گیشتر اَرزشت دار نہ بوتگ اَت ؟ پَسو : تئی ھیال آں مئے آجوئی ایمنیں وڑے ءَ پچ گِرگ بوتگ ؟ یا جَٹ ، ٹینک ءُ سلاہ ءِ زور ءَ چوش کہ بربادی آرگ ءِ مَستریں سوْب اَنت ھما وڑا مئے زمین زور گیر بوتگ اگاں زورگیر ءَ ایمنی بوتیں تاں ما ھم وڑ ءُ ڈولے در گِپتگ اَت ۔ ما لَٹّ ءُ کّٹ کنگ ءَ نہ اِنت ما لَٹ ءُ کُٹ نہ لوٹیں ما کسّی ھلاپ ءَ لَٹ ءُ کُٹ گچین نہ کُتگ ۔ میان اُستمانی کانود ءِ تہ ءَ یک شکے ( شق ) ھَست کہ مارا وتی دیمپانی ءِ ھَکّ ءَ دنت ۔ امریکہ ءَ عراق ءِ سرا پیش کپ اِیت دیمپانی دروشم ءَ اُرش کنت چو کہ آئی ءَ سرگوشی نہ بوتگ کہ عراق ءِ گوْرا تبائی مچارینوکیں سِلّاہ ھَست یا نہ ۔ آئی ءَ افغانستان ءِ سرا وتی اُرش کُت اَنت باز مُلک ایشی ءَ وتی نگھپانی ءُ مَنّوک سرپد بوت اَنت ۔ بلوچانی وڑیں نزوریں ءُ گونڈیں مھلوکے واستا اِے جُرمّے ءُ لَٹ ءُ کُٹّے ۔ بلوچ لَٹّ ءُ کُٹ ءِ ھلاپ اَنت بَلے وتی ھَکّانی نگھپانی ، وتی دیمپانی ءُ وتی زندگیانی رکینگ ءِ ھَکّ ءَ مُھکمی ءَ دار اِیت ۔۔   روان انت