بلوچ ءُ آئی سرڈگار ءِ لُٹ ءُ پُل مروچی ایں ھبرے نہ انت بلکیں کوھنیں سرھالے ءُ جاورانی مٹ بوھگ ءَ نوکتریں اڑ ءُ جنجالانی دیمپان اِنت۔دُگنیا ءَ چم سک دے ئے سرجمیں وت واجہیں استاناں چار ئے یا سائنسی دروشم ءَ بچارئے گُڑا ترا ریاست تشکیل یا جوڑ کنگ ءَ ٹیریٹوری ءِ باز پکار بیت کہ بلوچ ءِ کِرا گوں بازیں ابرمی وسائلاں ھست ءُ مانیت ،بلوچ ءِ وت واجھی سوال ءِ مرچگیں اھد ءَ مھنا اوں ھمیش اِنت کہ ایشی ءَ چہ توکی ءُ دری دستاں چوں بہ رکین اِیت،پہ اشی پھازگ ءَ بلوچ مروچی بازیں سال اِنت وتی جان جپا دئیگ ءَ ابید وتی نُگرئیں سر اوں ببا داتگ انت۔ بلے وتی سرڈگار ءِ دستیگ نہ کنگ اگاں یک وبالے اگاں پاکستان ءُ ایران اَنت داں دُومی نیمگ ءَ بلوچ ءِ یک ناسرپدیں گل ءُ لیڈرشپے اوں ھست اِنت۔
من اے نبشتہ ءَ چہ بازیں ٹرم ءُ دروراں چہ دُور دارگ ءِ جھد کناں تاں وتی ھیالاں تچک ءَ راج ءَ سر کنگ ءِ جھد کناں۔ بلوچ اگاں گوں دِل پھکی ءَ ایپ بی ایم ءُ بی این ایم ءَ دیما ایر بہ کنت ءُ وتی اندری جنجال آں بہ شوھازیت بے سوب نہ بیت بی این ایم بل واسطہ یاں بُگش ئے بلاواسطہ بلوچ ءِ یک نہ بوھگ ءِ ھاترا وت جُستے کہ پہ گیشواری ءَ پشت کپتگ۔بی این ایم ءِ سرکماش تچک ءَ ماں دری ملک ءُ میڈیا ءَ اے گپ ءَ کنت کہ من ءَ گوں ایران ءَ ھچ وڑیں دست ءُ داوا نیست ،اد ءَ ھما گپ منی مازگ ءَ پُترایت کہ وھدے سنگت ھیربیار گوں ھمراھاں جرمنی ءَ گوں سنگتاں گِند ءُ نندے کنت ءُ اُود ءَ چہ سادک سھید واجہ ءَ جُست گیپت کہ تو ایران ءِ بلوچانی چیا گپ ءَ کن ئے بزاں تو ایران ءِ کبزہ کُتگیں بلوچستان! سنگت پسہ دنت کہ شما شھیدانی روچ ءَ دار اِت پہ ہمے ھاترا کہ میر مھراب خان ءِ رپتن ءِ روچ سینزدہ نومبر اِنت ،گشیت اگاں میر مھراب ءَ من اِت گُڑاں آئی دور ءِ بلوچسان ءِمن لوٹوکاں ،بزاں اد ءَ ایران ءُ پاکستان نیست ،من سرجمیں بلوچستان ءِ واجھاں ءُ آئی پہ جھد کناں۔
بیزار کہ بی این ایم فارس ءِ ھلاپ ءَ کار بہ کنت وتی بنکی اسٹیٹمنٹ بی این ایم ءَ مٹائینت ،گلام مھمد ءُ آئی سنگتانی ھزمتے سودا مروچی گوں آئی دژمن جنگ بوھگ ءَ اِنت،کمبر چاکر ءُ زاھد کُرد ءِ جھدانی برورد مروچی ایرانی رجیم ءِ مننگ اِنت۔ایپ بی ایم بِلے کہ نوک اِنت آئی سیاسی سفر چہ بی این ایم ءَ رند بندات بیت بلے ایپ بی ایم ءِ کول ءُ کرارانی تہ ءَ ھچ وڑیں مان گیش نیست ۔بلکیں آ تچکا چہ زورآوراں بلوچ ءُ آئی آزاتی ءِ جھدے کنگ ءَ اِنت۔انگت 1970ءِ جنگ تازگ اِنت کہ پاکستان ءَ ایرا ن ءِ ھمراھی ءَ بلوچ ءِ نسل کُشی کُت بلے مروچی پدا بی این ایم ءِ لیڈرشپ ءَ وتارا ایران ءِ کُٹ نادینتگ۔ گجر ٹھیکدار ایونس وتی زھم ئے آورت تاں اشانی اوپار نہ شُت ،پدا ایران ءَ پاکستان ءِ سلاہ ءُ سوجاں گُلزار اشانی دستاں دات،بی این ایم ھاموش اَت ،واھد کمبر کہ بلوچ جنگی پیش بندیانی اڈ دئیوک اَت ایران ءَ پاکستان ءَ را (اینڈ اؤور) دست ءَ دیائینت، کمو سال پیسر سمیر ءُ ھانی ھم ایران سرکار ءَ پاکستان ءِ گُشگ ءِ پدا شھید کُت اَنت، گوستگیں ماہ ءَ پرومے دِلاور اوں ایران ءَ شھید بوت،بی این ایم ءِ وتی باسک سنگت دوست گوں چُک ھمراہاں ایران ءَ ٹوپ ءُ بمبانی آماچ کُرت اَنت بلے بی این ایم ءَ درشانے دات کہ ایران نہ اِنت مئے سنگت پاکستان ءَ جتگ بزاں دُنیا بزانت کہ ایران منی نزیکیں سنگت اِنت ءُ ایپ بی ایم ءِ کارانی سرا اثرئے بہ کپیت،اے و درسیں نام کہ من بُرز ءَ داتگاں پاکستان ءِ کبزہ کُتگیں بلوچستان ءِ جھمند بوتگ انت ءُ بی این ایم یا ایران ءِ یکیں لیڈرشپ ءِ مردم بوتگ اَنت ،نوں ایران چننچو مگربی بلوچستان ءِ مردم ٹوپ ءُ بمب جتگ بی این ایم ءُ اللہ نزر گُشے زاناں گُنگ آں۔
اشانی مدام بے سریں بھتامے ایپ بی ایم ءِ سرا اِنت کہ ھیربیار گوں سنگتاں ڈن ءَ نشتگ بٹاک جنت، ڈاکٹر نسیم منی ھیالاں مشکے دیریں یل داتگ ءُ شتگ، ھمل ھیدر اوں اشاں ڈن ءَ نادینتگ ملک ءَ نہ انت اشانی یک زمانگے مزنیں واجہے اَت، چیرمین ھلیل اوں خدابادان پنجگور ءَ ودی نہ بیت ءُ اشاں ھوار دگہ باز ھست ،اِیشانی ڈنی ملکاں نندگے سرا سوال پرچا ایر نہ بیت۔ من نہ لوٹاں کہ نبشتہ ءَ گِلگے بہ کناں بلئے راستی ءِ چیر دئیگ بدگمانی ئے بیت۔ شمس ءَ گدان ٹی وی ءَ سنگت ھیر بیار مری جواب دنت کہ آزات ما پیسرا اوں بوتگاں بلے وتی آزاتی داشت نہ کُتگ،آئی ھیال چُش بیت کہ پہ آزاتی ءِ دارگ ءَ مارا انگت مھکمیں ،ادارہ نیست،جوانیں لٹریچر ے کمی اِنت، ری کنسائیلشن نہ گواھیت،ھواری ءُ یک بوھگے سرا کس سِدک کنگا نہ اِنت، ہرکس وتی پارٹی پالٹکس ءِ چکّ ءَ کپتگ ،بلوچ ءِ ویلیوز ءُ ھد بندیانی سرا باوست نیست ،بی این ایم چُشیں چِیزاں کِمار نہ کنت پرچہ کہ آ چو من اسٹیٹ ایکٹرزانی ڈولا اِنت، کدی کہ قومی سوال کیت چہ جاھے کہ دینا در بئیت یک مھکمیں پِگرئے ءِ ھلاپ ءَ پاد کیت،انوگاں کہ میر یار تچکی ءَ استان ءِ واھگاں لوٹیت ءُ بلوچ کاز ءَ انٹرنیشنلائز کنگ لوٹیت،بی این ایم آئرا وتی مھلوک ءَ تان سر بوھگ ءَ بازیں پندلے ساز آیت۔ اللہ نزر ءُ نسیم ھمے واھگ داشتگ اَت کہ کدی انڈیا مارا کمک کنت ءُ ما چہ پاکستان ءَ جُتا باں ،ہمے کہ انڈیا گوں پاکستان ءَ مِڑ اِت اشانی تامر بند یلا بیثاں۔ بلے وھدے کہ ازرائیل ایران ءَ جنت اِشانی دوست دارانی گپ دیم ءَ آھت کہ شما وتی پادانی سرا اُشت اِت کس کس ءَ آجوئی نہ دنت بلے نسیم ءُ نزر ءِ باریگ ءَ ما بادشاہ جوڑ بیں۔ ایرت بچارئے تاں بلوچ ئے گوں ازرائیل ءَ نزیکی بلوچ ءِ سیکیولر بوھگے شون اِنت،بلوچ مُلایے کہ مگربی بلوچستان ءَ نشتگ گُشیت کہ اسرائیل ءِ جنگ گوں ایران ءَ نیکرائے نہ اِنت،پالیسانی جنگے ءُ ایران ءَ جنگ پہ مشرقی وسطی ءَ نیکیں پالے بلے مئے مردم پدا گُشاں ایران ءِ ھلاپ ءَ بلوچانی جنگ انگت سائنٹفک نہ اِنت۔ ایپ بی ایم ءَ پہ بلوچ ءِ سیکیولر کنگ ءَ شپ ءُ روچ کُتب مروچی کہ آئرا موہ رستگ پرچہ ایران ءِ ھلاپ ءَ تگاں مھکم مہ کنت۔ ایران ءَ کہ اسرائیل جنت بی این ایم ھاموش بیت ءُ وتی بلوچانی ھزمتے ءِ ھلاپ ءَ کڈائیت ،ایران ءِ گوں اسرائیل ءِ جنگ ءَ پاکستان ءِ کمک نیکراھی ءِ سوب ءَ انت ءُ بی این ایم ئے ءُ بی این ایم ءِ خاموشی نا ایوکا اے گپ ءِ شون ءَ دنت کہ آئی پناہ زرتگیں جاہ ءَ دژمن سرعام کمک کنگ ءَ انت بلکیں بلوچ ءِ سیکیولر نہ بوھگ ءِ سرا ایران ءُ پاکستان یک اَنت بی این ایم ءِ ھچ وڑیں ڈاکیومنٹسانی سرا کار کنگ ءَ نہ اِنت کہ آئی جھد بہ مانیت ءُ آئی چک ءَ بلوچ ءِ سوال بہ گیشیت ،ھمے وھداں ما گندیں کہ ایپ بی ایم بلوچ ءَ را منشور ءِ دنت ءُ کانسٹیٹیونشنل راھنبدانی ھساب ءَ بلوچ ءِ باندات ءَ سرپد کنگ ءِ بلاھیں جھدے کنت ءُ ایشی ءَ بازیں زباناں رجانک اوں کنت کہ مئے لوٹ ءُ ھاجتاں دُگنیا سھی بہ بیت۔دومی نیمگ ءَ ایران ءِ ھلاپ ءَ یک روڑمیپے دیم ءَ کار اِیت کہ آئی چکّ ءَ وتی آزاتی ءِ راہ ءَ بہ گیش ئے ۔ آزاتی پہ پوتاری نہ بیت آئی ھاترا ادارہ، آئین،مھکیں گل، پارن پالیسی ءُ یک سوشل کیپٹلے پکار بیت ،اے درسیں کاراں بی این ایم چہ دوراں گِندگ نہ بیت، بلے ایپ بی ایم اشانی سرا گوں سِدکیں دلے کار کنگ ءَ انت ءُ لہتیں آسرال مھکمی ءَ درا اَنت ۔
دیمترے بھرانی ھاترا ودار کن اِت۔
