نبشتہ کار: چاکر بلوچ
ھمگام بلوچی
19 فروری 2018 ءَ شہید نورالحق جان بارگ ءُ شھید ضیاء جان پنام دلجان بِہ خضدار ءِ دمگ تراسانی ءِ کوھانی تہ ءَ گوں بلوچ راج ءِ دُژمن پنجابی لشکرءَ دیم پہ دیمی جنگ ءَ شھید بوت انت۔ اے جنگ ءَ راجی جُھدکار شھید بارگ ءُ دلجان سوبین بوت انت پرچہ کہ دژمن گوں وتی قوت ءُ طاقت ءَ مِڑ اِتگ اِت اَنت ءُ شھید بارگ ءُ دلجان گوں وتی یک یک نَلوکیں توپکاں دژمن ءِ ھلاپ دیم پہ دیم ءَ ھما وھد تک جنگ یشلا برجہ داشت اِش کہ شھیدانی توپکانی تیر ھلاس بوت انت ، یک نیمگ ءَ جنگی سامان توپکانی تیراں دم برت ءُ دومی نیمگءَ دژمن گوں ھزارانی کساس ءَ سامان آؤرت یک بلاھیں آپریشنے بندات ئِے کرت۔ گڑا شھیدانی پیسلہ ھمے بوت کہ وتی گُڈّی تیر وتی جندیں سرا سینگار کن ایں ءُ ابدمان بہ اِیں، بلے دژمن ءِ دیمءَ دزگیر نہ بہ اِیں ءُ وتی سر ءَ جھل نہ کن اِیں۔ ھر وڑیں بنی آدم چشیں پیسلہ کرت نہ کنت شھید بارگ ءُ شھید دلجان وتی وتی توپکانی گُڈّی تیر وتی جان ءَ سُپْت ءُ بلوچ راج دپتر ءِ تہ ءَ وتی نام نیمران کرت اِش، دومی نیمگ ءَ دژمن ءَ بچار ءَ گڑا 1971 ءِ سال ءَ ماں بنگال ءَ 93000 پنجابی فوجیاں وتی 93000 ھزار توپک انڈین لشکرے دیم ءَ دور دات ءُ وتی وتی زندگی بچارینگ ءِ کوشست اش کرت۔ بلے مئے شھیداں وتی کِرد نشان دات کہ بلوچ لگوریں راج ئے نہ انت ءُ بلوچ ءِ ماساں شیر دلیں زاگ پیداک کتگ، بلوچ پہ سرزمین ءَ وتی سرانی ندّر کنگ زانت، چشیں شھیدانی سرڈگار کدی گلام بوت نہ کنت ، آ روچ دور نہ انت کہ بارگ ءُ دلجان ءِ سرزمین ءَ آوانی شعور ءُ پگر ءِ راھشونی ءَ بیت ءُ بلوچ پہ ابدی وشھال بیت، شھید بارگ ءُ شھید دلجان ءِ شھادت منی واستہ ءَ یک گرانیں گپے شہ ماں شھید بارگ ءُ دلجان جتا بوتگ انت۔ بلئے آوانی پگر ءُ زانت ءُ سوچ داتگیں سبک مارا یات انت آ پگری دروشم ءَ شہ بلوچ راج ءَ جتا نہ انت ءُ ھر بلوچ گس ءِ تہ ءَ زندگ انت، ما آوانی شھادت ءَ پریشان نَہ بَہ ایں۔۔ پرچہ کہ شھید بارگ جان منا مدام ھمے گپ ءَ را گشت پہ بلوچستان ءَ شھید بوھگ وش بھتی یے ، انون من سمجھگ ءَ آں شھید بارگ ءُ شھید دلجان وش بھتیں سنگت اِت آں۔ آوانی واب پیلو بوت انت آ چوں دنیا ءِ مزن نامیں جُھدکارانی وڑ ءَ پہ وتی گلزمین ءَ ندر بوت انت ءُ وتی نام راجدپتر ءِ تاکانی تہ ءَ پہ مدامی نبشتہ کرت۔ من کدی پہ شھید بارگ ءُ شھید دلجان ءَ ارس نہ ریچاں، نہ پہ ایندگہ بلوچستان ءِ شھیداں ارس ریچاں ، من درستیں شھیدانی جھد ءَ سلام کن آں، شھیداں سُھریں ھونانی ریچگ ءِ مبارک بادی پیش کن ایں۔ چوشکہ مبارک قاضی وتی بچ کمبرو ءِ شھادت ءَ پد گشیت:
منی اللہ، منی مولا، منی رب!!
اجب ھیران باں وھدے من جیڑاں
منی رنگیں شرابی گندہ کارءَ
تو چونیں بے بھائیں گوھرے دات
من یک سِل کارے آں، من چے بزاناں
بلے انچو من زاناں مالک الملک!
شھیدی لئیب لئیب ءَ کیسگ ءَ نیئت
تو اے داد ءَ ھمک شکس ءَ نہ بکش ئے
ترارا پہ منا لکّ مھربا انت
منا بلے زمانگ ماں جَسّاں جَنت
تو کمبرؔ تنگئیں تاجے سرا دات
من گوں واجہ ابا مبارک قاضی ءِ ھیال ءَ سد در سد تپاک کن ایں شھیدی لیئب لیئب ءَ کیسگ ءَ نئیت، شھیدی تاج بھتاورانی سرا سینگار بیت ، من پھر بندیں وتی درستیں شھیدانی سرا کہ آوان اے تاج وتی سرا پوش اِتگ ءُ شھیدانی ھون ءَ راجی جُھد جنزان انت ءُ پہ منزل ءَ راوان انت یک روچے کئیت ھمے ھونانی سُھریں رنگاں گلزمین چہ گلامیءَ آجو بیت ، ھمے ھاترا من شھید بارگ ءُ شھید دلجان ءِ سرا پھر بنداں بلے ارس نہ ریچاں۔
