بلوچ اسٹوڈنٹس فرنٹ ءِ بنجاھی جارکش ءَ وتی جار ءِ تہ ءَ واجہ بابائے بلوچستان نواب ھیربکش مری ءِ بیرانی ءِ نُھمی سالگان روچ ءَ آئی ءَ را سِتک شانی ندر کُرت ءُ گْوشت کہ بابا ءِ پگر، لیکہ ءُ شھزانتی بلوچ ورنایانی گام پہ گام رھشونی ءَ کنگ ءَ اِنت۔ آئی ءِ نہ اوشتوکیں جُھد ءِ بروَرد اِنت کہ بلوچ راج ءَ وتی رژنائیں راہ گِیشینتگ ءُ دیم ءَ پہ منزل ءَ راھیگ اِنت۔ آ یک انچیں شکسے کہ آئی ءِ کِرد گْوں لبزاں درشان کنگ نہ بیت، آ وتی اندر ءَ وت یک شھزانتی ءُ لیکھے۔ بلوچ راج ءِ وشبَھتی اِنت کہ آئی ءَ را واجہ بابا ھیربکش مری ءِ وڑیں رھشونے رستگ۔
آئی ءَ دیمتر ءَ تران کنان ءَ گْوشت کہ بابا ھیر بکش مری بلوچ جُنز ءِ پامبر اِنت کہ آئی ءَ بلوچ راج ءَ را چہ گلامی ءِ سانکلانی پُروشگ ءُ تھاروکی ءَ چہ در آیگ ءُ رژنائیں کشک پیش داشتگ۔ بلوچ راجدوستی ءِ درونت بابا ھیر بکش ءَ ابید نا سرجم اِنت۔ کجام جاہ ءَ بلوچ، بلوچ راجی جُنز ءِ باوست بیت گُڑا آجاہ ءَ بابا مری ءِ نام الّم گِرگ بیت۔ بابا مری ءَ بلوچستان ءِ آ دگہ سردارانی پیم کدی ھم زَرّ ءُ ملام نہ زُرتگ ءُ زوراک ءِ پلامرزی نہ کرتگ، اگاں بابا مری ءَ وتی زاتی نپ بِہ چار اِتین اَنت گُڑا آ پارلیمانی راجکاری ءِ بھر بوتگ اَت ءُ وتی زِند ءِ روچ ئِے گْوں ھیش ءُ ھشرت ءَ گْوازینت اَنت بلے آ یک پامبرے ءِ بستار ءَ اَت، آئی را وتی بزّگیں راج ءِ پِگر اَت۔ بابا مری ءَ پارلیمان ءِ راجکاری کرتگ بلے آئی ءَ زُوت ءَ پھم اِت کہ بزّگیں راج ءِ جْیڑہ اِد ءَ گیش ءُ گیوار نہ بنت۔ چُشکہ 1955 ءِ گچینکاری بابا مری چہ سبی ءِ دمگ ءَ آزاتیں امیت وارے ءِ بستار ءَ بھر زُور اِیت ءُ گچینکاری ءَ سوبمَنْد بیت، بلے دیر نہ بیت کہ آ چہ پارلیمانی راجکاری ءِ دستکش بیت۔ بابا ھیربکش مری، اتااللّہ مینگل، گوزبکش، شھمیریں اکبربگٹی یکجا بہ اَنت ءُ آجو گل ءِ نام ءَ یک راجی گلے جْوڑ کن اَنت بلے دیر نہ بیت کہ گوزبکش چہ گل ءَ دستکش بیت۔ بلے بابا ھیربکش گْوں مھکمیں پِگر ءَ وتی جُھد ءَ برجاہ دار اِیت۔ 1962 ءَ وھدے کہ پہ اسمبلیاں گچین کاری بیت گُڑا بابا مری ءَ را آئی ھمراہ گْوش اَنت کہ تو یکبرے ءَ پد ءَ گچینکاری بَھر بہ زور گُڑا آ چہ شال ڈویژن ءَ بھر زُور اِیت سوبمَنْد بیت بلے بابا ھیربکش مری اسمبلی ءِ اولی دیوان ءَ گپّاں تچک کنت ءُ پُرجوشیں گْوشتانکے دنت گُڑا اِے گپ پاکستان ءِ سروکاناں وَش نہ بنت۔ ایشی ءَ چہ پد 1969 ءَ بابا مری نیپ ءَ ھوار بیت، یک سالے ءَ پد بِزاں 1970 ءَ بابا مری نیپ ءَ سُوبَھی کماش جْوڑ بیت۔ ھمے سال ءَ بابا مری گچین کاری ءَ یکبرے ءَ پد ءَ بھر زور اِیت بلے آ اِے بلوچ راج ءَ را اِے گپ منّارینگ لوٹ اِیت کہ بلوچ ءِ جْیڑہ پارلیمانی راجکاری نہ اِنت۔ بابا ءِ راجدوستی ءِ مھکمیں پِگر ءِ سوب ءَ 1981 ءَ واجہ دراں ڈیھ کنگ بیت ءُ اوگانستان ءَ روت۔ بیست سال دراں ڈیھ بوگ ءَ چہ د 16جلکان 1992 ءَ واتر کیت ءُ وتی جُھد برجم دار اِیت۔ بابا مری بلوچ راج ءَ را ءَ زانت ءُ سرپدی دیگ ءِ ھاتر ءَ ھک توار ءِ نام ءَ شال ءِ تہ ءَ وانگی گِردانک اڑ کنت، آئی ءِ مول ءُ مراد اِے بیت کہ بلوچ راج ءَ را آئی ءِ گلامی ءِ ھوالہ ءَ سرپدی دیگ بہ بیت۔
پاکستان ءِ سرکار چہ بابا مری ءَ بے کساس ترس ءُ بیم ءِ آماچ بیت۔ بابا مری ءَ را آ وڑ وڑیں پندلانی تہ ءَ پسّارینگ ءِ جُھد ءَ جنت، ھمے پیم ءَ جُتائیں وھداں آئی ءِ سرا بُھتام جنت ءُ آئی ءِ بگیری ءَ کیس درج کنت۔ بلے بابا ھیربکش مری ءِ پِگر ءُ لیکہ نِزور نہ بیت، آ پہ وتی بزّگیں راج ءَ جُھد برجاہ دار اِیت۔ ھمے پیم ءَ آ وتی تیوگیں زِند پہ بلوچ وشّیں باندات ءِ شوھاز ءَ گْوازینیت، بابا مری وتی زِند ءِ گُڈی روچاں کراچی ءَ جاوید مینگل ءِ گِس ءَ گْوازین اِیت، ھمے پیم 10 جلکان 2014 ءَ بلوچ راج ءِ پیامبر دروشمیں رَھشون چہ راج ءَ گِستہ بیت ءُ بیران بیت۔
بی ایس ایف ءِ جارکش ءَ بابا مری ءِ بیرانی ءِ نُھمی سالگان ءِ روچ ءَ آئی ءَ را ستک شانی ندر کرت ءُ گْوشت کہ بابا مری ءِ لیکہ ھر اَھد ءَ مئے رھشونی ءَ کنت۔ آ یک شَھزانت ءُ راجی جُنز ءِ پیامبرے اَت۔ ما آئی ءِ گرانبھائیں جُھد ءُ مُھکمیں پِگر ءَ ستک شانی ندر کن اَنت ءُ آئی ءِ پِگر ءُ لیکہ ءَ دیم ءَ برگ ءِ جُھد کن اَنت۔
