نبشتانک ۔ کریم تھل
ھمگام بلوچی
مبارک کازی مئی وهد ءِ هما ورنائیں شائر ات که کدیں پیر نه بوت ، بلکیں پیری آئی ءِ وجود و نگاه ءِ تها ، دائم ءَ هست ات . پیری بلوچی ءِ لبزانک ءَ ، زانت و زانتکاری ءِ زانگ – گوئشگ بیته . و مبارک کازی ءِ تیزیں دید و زانت کدیں اندیم نه بیتگ انت .
گوئشنت مبارک کازی مرچیگیں روچ ءَ چه ما سستگ و جتا بیته ، بلے مبارک دوریں راهے نه شتگ ، پر چا که مبارک مئی ورنایانی و نوک ورنایانی زبان ءَ گون وتی بے دروریں پربنداں ، مئی شهر و کلگاں تالان انت و آئی ءِ گال مئی ازمگر و سازگرانی دلکشیں زیمرانی ساه بکشیں الهان انت ، مئی لبزانک ءِ بے دروریں گال ، هبر ، نبشتانک انت که ابدمان بیتگ و نکش انت !
مبارک کازی بے شک میرگل خان نصیر ءِ دابیں شائرے ات که آئی ءِ شائری ، سدانی دگه شائر و راجدوستانی دلاں نکش ءَ بنت و تاں بازیں سالے ، وت شائری و لبزانک ءَ درور زانگ ءَ بنت .
مبارک ، بلوچی دستونکاں ، رند چه نمیرانیں مراد ساحر ءَ نوکیں ساه بکشات و وت بلوچی شائری ءَ بے دروریں گنج بکشات !
هما داب که کدیں دگه شاه عبدالطیف بٹایی یے سندی لبزانک ءَ ، یا کجام گل خان نصیرے بلوچی لبزانک ءَ نیاتکگ و آتک نه کته ، بے شک هچ وهد و هچ زمان ، کازی ءِ دابیں شائرے بلوچی ءَ ودی نه بیت !
مبارک ءِ یاتگیری ءَ هما جوان انت که بلوج ورنایاں مزنیں جهدے په مبارک کازی ءِ ماتی زبان ءِ وانینگ ، ماں بلوچستان ءِ وانگجاهاں بکن انت ، اگں نه مئی مبارک دوستی و زبان دوستی هشکیں پوتاری یے بیت و بس !
کازی من سُتکگ و پر بیتگاں دردانی چَر ءَ
سد بر ءَ مرتگاں بے موت ءَ بلے مُرت نه کت
هچ دگه مال و متاه ، سر په سر ءَ زرت نه کت
یکے تئی ترانگ ءِ دامگ چه دل ءَ زرت نه کت
