بــــــــوم و پــشـــُــک
الکسی ٹالستوی _ کریم بلوچ ـ تهل
گِـیـتـِـچک و چــِــش ءِ درچکے ءِ ٹـنگے ءَ ، اسپیتیں بومئ ــ اسپیت چُش که ماه ــ کدوگ بستگ ات و گوں وتی هپتیں چوکواں آبات ات . جند ءِ هپتیں چیپلاں . شپے یک برے آئیا بال کت و په مُـشـکے ءِ گِرَگ ، یا اسپیدهے ــ هامرگے ــ ورگ ءَ شت .
یک برے چه گیتچک ( بلوط ) ءِ نیمگ ءَ جنگلی و کوهی پشکے روان ات . اشکتی که چون بوم ءِ چوکواں جریک جریک کنگ انت . گیتچک و چش ءِ سرا سر کپت و آهانی گپت و وارت . هر هپتینان ءَ . رند چه ورگ ءَ ، هموداں هما گرمیں کدوگ ءَ وپت و واب کپت !
بوم برگشت ، گوں وتی گردیں و مزنیں چژمانی چارست ، دیستی که پشک اوداں واب انت . سرجمیں هالاں سرپد بیت .
پــِـشـّــَـلــُک جنگلی یے ــ بوم گوں دلکشیں توارے گوئشاں بیت ــ ، بــِـلــّـی که شپ همداں بمانیت ، جنگل سک سارت انت .
پشک که چه واب ءَ جه سرتت و وابگینک ات ، سرپد نبوت و هشتی که بوم کدوگ ءَ مان ببیت . آهاں یک و دگر ءِ کِرّ ءَ دراج کش بیت انت . بوم جُست کت :
_ پشلک پرچا تئی بروتاں هونین انت ؟
_ ماتی من ٹپی بوتاں و وتی ٹپ اوں لِست !
_ چه کجا تئی سر و پُشت پر پُٹ انت ؟
_ بانزے منا زورانسری چست کنگ و برگ ءِ جهد ءَ کت و من وتا په زور چه آئیا رکینت و درشتاں !
_ پشلک پرچا تئی چماں ترپ انت ؟
بوم گوں وتی پادانی پانچرّاں ، پشک ءَ وتی امبازاں گپت و گوں وتی سُنٹاں ، آئی ءِ چماں کش ات و ایربرت و آئی ءِ جان ءَ سُنٹ جناں بیت و گریواں گوئشتی :
_ بومَــلـُـکاں ! هپتیں بوملکان ءَ پشک وارت انت !
