ھمگام بلوچی
برے برے مردم جیڑ اِیت کہ چون بہ کنت کہ مئے زمین ءُ راج رکّینگ بنت۔ ھون ھاری بہ بیت یا گوں لس مھلوک ءَ جنزان بہ کنت بہ گِند ئے کسے مئے پریات ءَ گْوش بہ دار اِیت کہ دُگنیا ءِ یک جاھی ءَ یک راجے ھست کہ آئی لوٹ ءُ متاہ آجوئی اِنت ،گْوش ئے ھمے میان ءَ مردم گار اِنت۔
ھستیں وھد ءَ دُگنیا جنگانی دیم پان اِنت۔ یوکرین سرا روس ءِ اُرش ءُ جیڈہ دومی نیمگ ءَ ھماس ءُ اسرائیل ءِ جنگ ءُ جدل بلے بلوچ توک ءَ گار اِنت۔ گپ بیت بلے بلوچ ءِ گپ نہ بیت ھرچ دری رسانکی ءَ بہ چار ئے پلیستین یا یوکرین جیڑہ ءَ ابید دگے ھچ گِندگ بہ بیت۔
ھماس (پلستین) ءُ اسرائیل ءِ جنگ بہ بیت یا یوکرین ءُ روس دُگنیا ھر کُجا بھر گِندگ بیت۔ بہ گِند کہ امریکہ گوں یوکرین ءَ ھوار اِنت اود ءَ ھماس ءُ اسرائیل ءِ میان ءَ امریکہ گوں اسرائیل ءَ ھوار اِنت بلے ارب ملکانی واجہ گوں پلستین ءُ ھماس ءِ پلہ مرزی ءَ گِندگ بنت۔
ھمے وڑ بلوچ ءِ زورگِر ایران پہ ھماس ءِ پلہ مرزی ءَ گندگ بیت بلے ارب ملک پدا ایران ءِ دژمنی گپ ءَ جن اَنت پدا اسرائیل کہ ایران ءِ سرا ماں شام ءُ دگے ھمسائگ ملکانی توک ءَ اُرش کنت ءُ بیھار دات پدا مردم جیش اُل اَدل ءَ گوں ھمے کاراں ھمگرنچ کن اَنت۔
ھمے وڑ پاکستان ءِ ایردستیں بلوچستان ءَ ھم کار گیش بنت مردم گْوش اَنت اے دو ئیں ملکانی توک ءَ سلاہ بندیں گلانی باج بوگ ءَ اِنت انچو زانگ بہ بیت جیش اُل اَدل اے سرجمیں کار ھمے وڑ ءُ پیم ٹھینگ بوتگ اَنت کہ گوستگیں روچاں بلوچ آجوئی لوٹوکیں گلی ءَ یک ھمے وڑ کار پیلو کتگ اِت اَنت کہ اِشی رند جیش اُل اَدل ءَ ھم ھمے وڑ ءُ پیم وتی کُتگ اَت ءُ ایران جت اِش۔
منی نز ءَ ھستیں وھد ءَ ھِندوستان مزنیں گوازی یے کنگ لوٹگ ءَ اِنت کہ اِشی دست سیدا گوں ایران ءَ ھوار اِنت۔ ھِندوستان ئِ اے واھگ ساری ءَ بوتگ کہ من وتی زمین کہ 1947 منی بوتگ من وتی زمین ءَ الّم دو بر دست بہ گِر آں بلے اے کاراں ھِندوستان تھنا کُت نہ کنت پرچے کہ چین بلاھیں زوراورے پہ پاکستان ءِ واستہ اُوشگوک اِنت۔ نو ھندوستان ءَ ایران ءِ تاوان الّم درکار بیت اِنت چمیکا ھندوستان ایران ءَ گوں نزیکی کنگ ءَ اِنت ءُ روکپتی بلوچستان ءَ ایران ءِ واھگانی پد ءَ چین ءُ ھِندوستان ھردو دیم ءَ کِنزان اَنت۔
ھِندوستان ءِ واھگ وَ ھمیش اِنت کہ پنجاب تا سِند منی اھدی زمین اَنت ءُ پٹانانی ھَند ءُ دمگ اوگانیانی دستہ دیگ بہ بنت اوگانی ھم اے لئیب ءَ گوں ما ھوار بہ بنت ءُ ایران ءِ واھگ ھمیش اِنت کہ بلوچستان سرجم منی بہ بیت ءُ ھِندوستان ءُ چین ءِ جیڑہ ھم چہ پاکستان ءِ ھلاسی ءَ ھلاس بیت پرچے کہ اگاں بلوچستان ءِ یک ٹُکرے کہ آجوئی بیت پہ من اِیمنی ھم وابے جوڑ بیت یا منی جاور ھم نہ گیگ بنت۔
اے واھگانی سرجم کنگ ءَ ھِندوستان ءُ ایران لوٹ اَنت کہ بلوچ آجوئی لوٹوکانی ریموٹ ھماھانی دستہ بہ بیت بلے باید بلوچ ھستیں جاوراں ءُ دُگنیا ءِ جیڑھاں سرپد بہ بیت ءُ وتی جُنز ءَ دیم ءَ بہ بارت چو مہ بیت کہ ھرچی لوٹ ءُ تما ایران ءُ ھِندوستان ءِ بیت بلوچ ھما راہ ءَ وتی بہ کنت۔
اگاں بلوچ جُنز ءِ سروکاں وتی ھمسائگانی لئیب ءُ گوازی نہ زانت ءُ وھدی نپ ءُ سیتانی وابی ءَ واب کپت اَنت گڈا بلوچ چہ ھستیں اِیردستی ءَ چہ ھم گنتر نیزگار ءُ بزّگ کنگ بیت ءُ پہ آئی ءَ آئی زمین، مال ءُ ملکت مُچ پُلگ بنت بلکیں بلوچ ءِ واستہ ھما اِیردستی کہ اھدی مُگل بادشاھانی بوتگ ھما وڑیں گلامی یے ودی بیت گڈا دگے ھزاراں سال سرجم بنت کہ بلوچ ھون ریچان بہ کنت پہ گلامی ءِ سانکلانی پروشگ ءِ واستہ۔
یک رندے پدا من گْوش آں ءُ باید پٹ ءُ پول بہ بیت کہ اے نیمگ (خطہ) توک ءَ بلوچ ءِ دوزواہ گوں دل پھکی ءَ کے اَنت۔ اگاں کسے ھست کہ آئی واستہ پہ بلوچ ءَ کسانوکیں دردے ھست آ اوگانی بوت کن اَنت کہ راجدپتراں آھانی نزیکی ءُ تاوانکاری بوتگ بلے ھستیں جاوراں نہ ھِندوستان بلوچ ءِ دوزواہ جوڑ بوت کنت نیکے ایران باید ھرچی ھمیشانی لوٹ اِنت ھما وڑ راجی جُنز تاب مہ گِپت ءُ بلوچ دُگنیائی جیڑھاں چہ پایدگ چِست بہ کنت ءُ پاکستان ءُ ایران ءَ چہ وتی ڈیھ ءَ بہ رکّین اِیت اے کارے کنگ ءِ واستہ بلوچ سروکانی یکّیں ٹیبل ءِ سرا آیگ الّمی اِنت کہ یکمُشتی ءُ یک راہ بندی سرا وتی وتی کاراں دیم ءَ بران ءُ جُنزان بہ کن اَنت۔