برز ءُ بارگ بندیں بالاد گردیں دیم سوزا رنگ ءُ مہروانین چماں گوں لٹیں جزگ ءَ نوک بروتیں ورنا ئے کوہ ءِ ہر چُر جل ءُ کہور ءَ سرگردان گندگ بوت کس نزانت ئے کہ آئی چے گار انت کہ وہد ءُ بے وہد آ پرچے چو گردگ ءَ انت مکن کرت انت کہ تو وتی ہمراہانی پجی ءَ وت سر کوہ ءَ مہ گرد رد کپ ئے انچو بے کماری ءَ پسہ دات مئے زند نون ہمے کوہ انت ایشی ءَ زانگ لوٹاں پجارگ لوٹاں ! پدا چپی ءِ گرمیں لیوار چاریں نیمگ ءَ درچکاں چنڈینان ات کمو ھیال برتریتین انت آئی دست ءَ پلاس ءُ پیچکش ئے ات پرشتگیں ریڈیو ءِ آئی دیم ءَ ایر ات آئی ہر بند ، بند ءَ یک، یک کرت چے کنگ ءَ ئے گندئے اے پرشتگیں ریڈیو ءِ سر ءَ تجربہ کنئگ ءَ اوں پدا بے تواری ءِ سارتیں گہوش ءِ شوکار ات بیل دست ءَ انت ڈگار ءِ سینگ ءَ درگ ءَ انت کپ ،کپ کنئگ ءَ انت چے کنئگ ءَ ئے آپ کم بوتگ کڈے جنئگ ءَ اوں دانکہ آپ جم بہ بیت. کوہ ءِ برزگ ءَ گوں لٹیں رواج ءَ روگ ءَ ات چے بوتگ خیر انت کجا روگ ءَ ئے ھر گار انت رواں کاران اش. رو زرد انت کل نشتگ انت چاہ انت گپ ءُ تران انت آ گوں ھراں اوتاک ءَ سر بیت کجا دیست ئے اش سورجائی ءِ لوپ ءَ اتنت چاہ ورگ ءَ انت کمیں ھیال دگہ نیمگے ءَ شت آ نندوک انت نان پچگ ءَ انت شپ انت یکے دیمپان انت تو برو من ءَ واب نئیت من تئی جاگہ ءَ دیمپان باں. سہب انت پدا گار انت بڈے دار کوپگ ءَ انت ئے سر بیت تو بار مہ زور کہ تئی بک ھراب انت بے ارزشتیں بے بچکندے ءَ پسو رسیت ساھتے نہ گوستگ تبر دستے انت روگ ءَ انت ہمراہے جگ ءِ خاترہ دار گڈگ ءَ انت نیم روچ انت جگ ءَ نندوک انت کوھنیں ہندی شعراں گوش دارگ ءَ انت. پدا بیا بچار آئی دیم ءَ مخابرہ ایر انت ڈیٹونیٹر ایر انت وت ریموٹ ءِ جوڑ کنگ ءَ انت بیگہ انت آ وتی ہمراہ ءِ پجی ءَ وتی چیزے سال پیسر ءِ فوجی ٹریننگ ءَ کنگ ءَ انت وتی ہما فوجی ٹریننگ ءَ گہتر یات دارگ ءَ انت. درچکانی چیر ءَ نندوک سبزا رنگیں دیم کرنچیں ورناہے آئی ءَ چارگ ءَ انت اے چون بوتگ؟ اے پیسر چو نہ بوتگ ایشی ءَ اے زانت چہ کجا رستگ؟ ایش ءَ انچو ذمہ واریں مردمے چون بوتگ ؟ آ وتی جستانی پسو ءَ پٹگ ءَ ات آ ھیالانی جہلیں زر ءَ بک وران ات ادءَ چہ درکپت پدا زر ءِ جہلانکی ءَ کرکینکے دیست پدا درکپت پدا روان ات آئی ءَ دیست کہ آ اسکول ءَ وانگ ءَ انت پس آئی ءَ اسکول ءَ بارت رسینیت آ اوں پس ءِ دست گپتگ روان انت آ لوگ ءَ مات ءِ کنٹ ءَ سر ءَ ایر کنت اماں منی سر وانگ ءَ ہچ نہ کپ ایت ہزار مہر ءُ ارمان مات آئی ءَ دات تو بوان. سال ءِ گڈ سر ءَ آ چکاس ءَ سوب مند نہ بیت پت کاروبار کنت زر کٹیتگ لوگ ءَ زند آسرات انت پت وتی ناوانندہی ءَ گندیت آئی ءَ عیبے سرپد بیت کہ منی کل چک بوان انت بلے ایش وانگی وڑ ءَ نہ انت دکہ ءُ سفارش ءَ پاس بوہان ءَ سالان گوازینان انت آئی پس ءَ کسے صلح دنت کہ تو وتی چک ءَ فلاں اسکول ءَ بوانین آئی وانگ شر انت استاد ءِ اوں شر انت تئی چک اودءَ وانت کنت پت ءِ چماں رژنائی ءِ تالان بیت چک پدا نوکیں اسکول ءَ وانگ ءَ انت پت اوں وش انت کہ بیت مہ بیت چک نون شرتر بیت پدا سال ءِ گڈ سر انت پدا چکاس بیت آسر درکئیت پت چک ءِ آسر ءِ ودار ءَ انت آئی چک کئیت چک اول پوزیشن گپتگ پت ءِ دیم تہار بیت مات گل ءَ بال بیت کہ آئی چک اولی رند انت کہ چکاس ءَ سوب مند بوتگ بلے پت ءِ دیم ءِ کرنچ ودان کن انت پدا بچکندیت منی چک تو وترا نون گیشتر تکلیف مکن تو مہ وان تو کاروبار بکن وانگ تئی وسی کارے نہ انت آ اسکول ءَ کہ تو اول پوزیشن گپتگ بزان کہ آ اسکولے دیم سیاہ انت ہما روچ ءَ رند آئی ءَ اسکولے دیم نہ دیست آئی ءِ کوپگ ءَ اوں اے بار جہل بوت نون آ وتی پس ءَ گوں کاروبار ءَ ہوار ات ہرچیز ءَ بلد ات بلے وانگ آئی وسی کارے نہ ات لوگ ءِ ہرچیز ءِ ھراب بوتین آ جوڑ کنئگ ءَ اتئے بلے کتاب آئی دماگ ءَ نہ نشت انت آ ذہین ات بلے وانگ ءِ پڑ ءَ آئی سر پر نہ بوت ٹیکنیکل کار ءَ سک بلد ات وت تجربہ کرت وت جوڑ کرت آ شہید مجید ءَ چہ مستریں براس ات وتی مستریں برات ءِ ہمراہی گون ات آئی برات روچے کجام دمک ءُ دراں دژمن ءَ پولگ ءَ ات روچے کجام ہند ءَ کارے ءَ شت آ سرپد نہ ات برات ءِ روگ ءَ رند آ دکان ءَ سنبھالگ ءَ ات آ سرپد بوتگ کہ برات انچیں کارے کنئگ ءَ انت کہ آ زانگ ءَ نہ انت وہد ءَ گوں ہوار آ سرپد بوت آ اوں ہمے راجی کار ءَ ہوار بوت آ ات شہید یحییٰ ات شہید نعیم ات خضدار ءِ دمک ءُ در اتاں روچے ءَ دژمن ءِ ریموٹ کنٹرول بم تراک بوت روچے ءَ تیر گواری. آ وتی مستریں برات ءُ آئی سنگتانی رندگیری ءَ کنان ءَ وتی کار ءَ کنئگ ءَ ات جنگ زور زرتگ ات ءُ آ اوں جنگ ءِ ترندی ءَ تچگ ءَ اتنت جنگ ءَ گیشتر ترند تر کنئگ ءَ اتنت وہد ءِ زوراک ءَ آہانی سماہ کپتگ ات سرکار لوگ ءَ چاپہ جت آ دوئیں براتی کوہ ءِ ڈولداری ءَ ودینگ ءَ کوہی زند ءِ سکی ءُ سوری ءَ ہمگرنچ اتنت ءُ وتی راجی فرض ءَ پورا کنئگ ءَ اتنت آ گوں شتکیں بالاد ءَ روچے یک نہ یک چرے ءَ گندگ بوت جست بکرتین ادءَ چے کنئگ ءَ ئے ما جنگ ءِ بہراں چیر جنگی ءِ اولی رہبند انت کہ وتی علاقہ ءَ بزان وتی کوہ ءَ چاراں راہ ءُ در ءُ آپاں چاراں. اگاں جاور نگیگ بوت انت باہد انت ما وترا ءُ وتی سنگتاں کشئت بکناں. آ کوہ ءِ زند ءَ ہمگرنچ انت بلے آ نادراہ ات کہ آئی بک ھراب اتنت بلے آئی ءَ کدی وتی اے نزوری ءَ درشان نہ کرت آ چپی ءَ اے درد ءَ سگگ ءَ ات آئی دوستداریں بیل ءُ ھمبل آئی ءَ گوں ہوار اتنت آ مدام چیزے نہ چیزے جوڑ کنئگ ءَ ات کدی تپنگ ءِ کدی واکی ٹاکی یے کدی نوکیں بارود ءِ تجربہ کنئگ ءَ ات آئی ءَ بازیں سوب مندیں تجربہ اوں کرتگ ات آئی ءَ ڈیٹونیٹر وت جوڑ کنئگ ءَ بلد بوتگ ات آ ریموٹ جوڑ کنگ ءِ ازم ءَ در برتگ ات آئی ءَ وترا ثابت کرتگ ات کہ آئی مٹ نیست اے آئی زانت ات کہ آ پہ راج ءِ آجوئی ءَ کارمرز کنئگ ءَ ات ئے
آ زہری ءِ کوہاں پند جنئگ ءَ ات کدی یک سنگرے ءَ گندگ بوت کدی دومی ءَ. آئی ءَ وتی بزگیں مھلوک ءِ جاور دیستگ اتنت ہمے جاوراں چہ مھلوک ءِ کشئگ ءِ جوزہ ءَ گوں جنزاں ات آئی یک مہروانین سنگتے گشتگ ات کہ ما یک سنگرے ءَ نندوک اتاں گڑا نا گمان ءَ دژمن ءِ ھال رست ما دوئیں یکیں سنگر ءَ نندوک اتاں نون جنگ بنا بیت ہمے ھیالانی تہہ ءَ اتاں مئے چم دژمن ءَ سک اتاں مارا ادءَ دژمن ءَ جنئگ ءِ اجازت نیست کہ ایشی ءَ چہ مئے کار ھراب بنت ما چارگ ءَ اتاں کہ اگاں دژمن مارا دیست گڑا جنگ المی انت ما نندوک یک دومی ءَ گوں وتی زند ءُ جدوجہد ءِ بابت ءَ یک یک گپ گشتاں. شہید نثار منی چماں چاراں گشت ئے کہ نزاناں ما زندگ باں یا مراں بلے دانکہ منی مرک ءَ رند آزادی ءِ خاترہ تپنگ کسے دست ءَ ات من زندگاں. دانکہ منی تپنگ کسے کوپگ ءَ ات پہ آزادی ءَ بلوچستان ءِ دمک ءُ در گر ءُ گٹاں رمبگ ءَ ات من زندگاں. شہید نثار اے گپ کرتگ ات دژمن اوں کور بیت آہاں نہ گندیت. پدا شہید نثار وتی ہمراہانی پجی ءَ بلوچستان ءِ آجوئی ءِ بیرک ءَ کوپگ ءَ کرتگ ات روان ات. قلات خضدار حب چوکی ءَ وتی راجی ذمہ واریاں پورہ کنئگ ءَ ات. آئی کوپگ ءَ یک کارے ذمہ واری دیگ بوتگ ات کہ آ چیزے سنگتانی ہواری ءَ سوراب ءَ نندوک ات کہ کدی سنگت ھال دینت ءُ ما دژمن ءَ گوں ریموٹ کنڑول بمب ءَ چنڈ ، چنڈ کناں روچ گوزان اتنت آ ودار ءَ نندوک اتنت نیم روچ انت سنگت کوٹی ءَ نندوک انت نثار درکپیت کہ گاڑی ءِ فٹنگ ءَ بچاراں چو مہ بیت دژمن ءَ جنئگ ءِ وھد ءَ بمب کار مہ کنت آ گاڑی ءِ چار ءُ تپاس ءَ کنت بلے وھد آئی ءَ موہ نہ دنت بمب ترکیت ءُ شہید نثار ءُ آئی دو سنگت شہید گلزار عرف حاجز شہید کرم خان عرف طارق 8 نومبر 2012 ءَ شہید بنت . شہید رمضان ءِ بچ شہید مجید ءَ رند شہید حئی عرف نثار اوں وتی پس ءَ گوں ہوار بوت آئی برات ھشکیں چماں گوں آئی شہید بوتگیں ھمراہ ءُ پت ءُ کستریں برات ءِ ھمراہی ءَ آئی ءَ گندگ ءَ ات. آئی ھمراہ چہ یک خواری کشیں دلپاکیں مہراوانیں سنگتے ءَ چہ زبہر بوتگ اتنت وطن وتی اے پسگ ءَ وتی سینگ ءَ جاگہ داتگ ات وطن وتی اے وڑیں بچانی سرا ناز کنگ ءَ انت کہ آ وتی مات ءِ رکھگ ءَ ھچ وڑیں جاورے ءَ چک ءُ پد نہ بوتگ ات آ وتی ھون ءَ گوں وتی کرد ءَ نبشتہ کرتگ ات ءُ مارا چہ جتا بوتگ ات بلے آئی جند مرچی مئے ھمراہ نہ انت بلے آئی راجی کوھیں کرد گام گام ءِ سرا وتی راج ءِ رھشونی ءَ کنگ ءَ انت وطن ءِ خاترہ مرتگیں چوشیں راجی کارست ابدمان انت..
