پاکستان ءِ ایٹم بمب ءُ دنیا ءِ زمہ واری
ندکار: قاضی بلوچ
(ہمگام بلوچی نبشتانک )
28 مئی 1998 ءَ پاکستان ءَ ماں بلوچستان ءِ دمگ چاگیءَ راسکوہ ءِ دلبند ءَ وتی ایٹم بمب چکاس اِت ءُ بلوچ زمین ءِ دلبند پِلُّشینت۔ پاکستان ءِ ناشرکاریں استان ءَ اے ایٹم بمب ہندوستان ءِ ایٹم بمب ءِ چکاسگ ءِ زِدّ ءَ چکاس اِت ءُ بلوچ سرڈگار ءِ دلبند ءَ آسے روک کُت کہ ھمے آس ءَ بلوچ مَھلوک سچان بوت، تاں روچ ء مرچی ھم بزگریں بلوچ مھلوک ھمے آچ ءَ سُچان انت
اَنچو گُشاں بنی آدم وت پسند انت، وتی اھدءِ
فلسفی میکیاولی (Machiavelli) ھما مردم منگ بوتگ کہ آئی ءَ بنی آدم ءِ تب درگیتکَگ کہ بنی آدم ءِ اَبرم چون اِنت؟ میکیاولی ءِ گشگ اِنت کہ بنی آدم وت پسند اِنت، بلے ھا self-Aggrandizement ءِ لبز ءَ کارمرز کنت، بزاں انسان دومی ءِِ دیما وت ءَ گیشتر مُھکم ءُ بُرز تِر کنگ ءِ کوشست کنت، Thomus Hobbes ھم ھمے لیکہ ءِ منوگِر اِنت. گشگ ءِ متلب اِش انت کہ وھدےمردم وت پسند بیت ھا تھنا وتی جند ءِ تھا بَند بیتَ، دِگرءِ واستہ نہ جیڑ ایت، دگر ءِ سرا اُوست ھم ندار ایتِ، پمیشکہ وتی زندءِِ رکینگءِ واستہ وت جُھد کنت چاھئے آ جُھد دومی مردُم ءَ نُکس ءُ توان بار بہ کنت. ھمے وڈا استان، کہ آھانی چلاھینوک(Govern) ھم انسان اَنت، بزاں مُلکانی تہا ھم وت پسندی ءُ زدِ ءُ کنّت ءِ پولینگ مان. وھدے ہندوستان ءَ ایٹمی بمب چکاس اِت گڈا پاکستانءَ ھم ھمے زِد ءَ بلوچستان ءِ دلبند ءَ آس روک کُت تاکہ ہندوستان ءُ ایدگہ مُلک بزان اَنت کہ منی کِرا ھم اے انسان کُشیں ازباب است اِنت.
ہندوستان مرچی دنیا ءِ سِیمی دیمرؤکیں مستریں معاشی اِستان جوڈ بوتگ، دنیا ءِ دراہیں مھکمیں ءُ دیما شُتگیں اِستان (Developed states) ہندوستان ءَ یک ذمہ واریں استانے زان انَت ءُ آ ھندوستان ءِ گوما بیپار کنگ ءَ انت. بلے دومی نیمگ ءَ اگاں ماں پاکستان ءَ بچار ایں, گڑا اے پدر بیت کہ مرچی Multinational Companies بجاھے اِدا آھگ ءُ تجارت کنگ ءَ آ وتی تیوگیں Industries ھاں بند کنگ ءَ انت ِ، ایشی ءِ یک سوَب یے ھِش انت کہ ِادا استان ءِ جوڈ کرتگیں مزھبی ناشرکار دنیاءِ واستہ ھترہ جوڈ بوتگاں ءُ جاور ھال انچو نگیگ اَنت کہ ادا دَری مردم آھگ ءَ (visit ) ھچ پیم ءَ ساڈی نیاانت. دُنیا اَمودا بیپاری کنت کہ ھودا جاور ھال ایمن اَنت، پرچہ کہ وھدے دنیا وتی زرّاں یک کاریے ءِ وستہ جنت گڈا آ اے امیت ءَ داریت کہ ھمے جتگیں زرّ پائیدگ بیار اَنت بلے پاکستان ءِ سیاسی ءُ چاگردی جاور ھال ھمے پیما اَنت کہ دنیا ھچ رنگ ءَ پاکستان ءِ سرا بیسہ کنگ ءَ تیار نہ اِنت پرچہ کہ اے استانے نہ انِت بلکیں ناشرکارانی ھَڈایے، اَنچو کہ پہ ایشیا دگنیا ءَ لبز ‘terroristan’ کارمرد کُت کہ “It is not Pakistan rather it is terroristan”بزاں اے ناشرکارانی لوگ اِنت. ھمے ناشرکاریانی سوب ءَ، امیت اِنت کہ ھاؤکیں ماہ ءَ پاکستان ءِ نام ءَ Financial Action Task Force ھما مُلکانی رِدا کَنت کہ ھا ناشرکاراں کمک کنگ ءَ اَنت، پرچہ کہ اے گپ نو دنیا ءِ دیم ءَ سھرا بوتگ کہِ پہ نیکرائی ناشر کاراں پاکستان ءِ زمین کارمرز بوھَگ ءَ اِنت، ءُ ھمے ناشر کار ماں دُنیا ءِ ایدگہ استانانی سرا ارش کنگ ءَ اَنت، کہ اے مُلکانی تہا ہندوستان ءُ اوگانستان ءِ نام پیش پیش اَنت. دومی نیمگ ءَ FATF ءَ اے گپ ھم پدر کتگ کہ پاکستان وتی لس مھلوک ءِ زرّاں ڈنّ ءَ گیر کانودی دیم دیگ ءَ اِنتِ، بزاں منی لانڈرنگ کنگ انت.
اگاں پاکستان ءِ نام اِدا، بزاں اے اِستانانی رِدا ھوار کنگ بوت، گڑا پاکستان ءِ نزوریں معیشت ءِ سرا بلاھیں ءُ ٹوہیں اثرے کپیت. Economists ھانی گشگ انت، پاکستان معاشی نزوری ءِ نیمگ ءَ روان بِیت ءُ انچو گمان بیت کہ آ وامانی تہا بُکیت کہ چرائی ءِ سوب ءَ آ پرشت ءُ پروش ءِ آماچ بیت. انچو کہ دومی مزن جنگ ءَ رند بازیں سلطنت مالی بدھالی ءِ آماچ بوت ءُ پُرشت ءُ پروش ءِ آماچ بوت انت ءُ پدا Decolonization ءِ اَھد بِندات بوت، بِزاں درْاھیں زُور گِپتگیں اِستاں آجو بوت اَنت
برزِ ءِ گپانی تہا زاھر انت کہ پاکستان دنیا ءِ تہا بازیں وھدءَ اَست بوت نکنت، اِشی ءِ متلب اِش اِنت کہ پاکستان ءِ جوڈ کُرتگیں ایٹم بمب ناشرکارانی دست ءَ کاانت کہ اے پہ تیوَگیں دنیاَ ءِ واستہ یک بلاھیں ھترہ یے ، ناشرکار ھر کجا بلوٹاں ایشاں کارمرز کُت کناں. اے گُمان ھم رَد نہ اِنت کہ پاکستان ءِ پُرشگ ءَ پیسر پاکستان ءِ ایٹم بمب ناشر کارانی دست ءَ اَتک کُت کناں. پاکستان گوستگیں 71 سال ءِ تہا بمبانی رکینگ وتی جاگہ ءَ وتی جند ءِ مردماں security دات کُرت کنگ ءَ نہ اِنت، ھمک روچ ملک ءِ دراہیں ھند ءُ دمگاں کُکّار ءُ سلوات اِنت. اے گپ امریکہ ءُ ھا دگہ استاناں وت ھم جتگ کہ پاکستان وتی ایٹم بمباں رکینت نَکنتَ، بوت کنت اے ناشرکارانی دست ءَ بیاانت.
ساری ءَ اے بمب ناشرکارانی دست ءَ بیا اَنت، دنیا زُت گامگیج یے بزوریت ءُ پاکستان ءَ چَریے بمب آں زِبھَر بہ کنت، دنیا پاکستان ءَ چرے بمب ءَ بیران ءُ نادرہ بوتگیں بزگریں بلوچ پُسگانی جُست ءَ ھم بہ کنت ءُ آئی ءَ سزا بہ دانت ، اے انسان کُشیں بمب اَنچیں جاہ یے ءَ چکاسگ بوتگ کہ اُودا لَس مھلوک بزاں بلوچ زند گوازینگ ءَ انت. ھمے جوہری تراک ءِ سوب ءَ اے ھند ءُ دمگ آں جاھ منندیں بلوچ مھلوک جتا جتائیں بیماریانی آماچ انت،َ ناں تھنا لس مھلوک اے ایٹم بمب ءِ زھر ایں سان ءِ آماچ انِت، بلکیں گوات ءُ موسم ءِ تہا بدلی آھگ ءِ سوب ءَ دلوت ءُ جناور ھم وڈ وڈیں نادرہ یانی دیم پان اَنت.
